រដ្ឋមន្ត្រីក្រសួងមហាផ្ទៃ លោក ស ខេង នឹងកោះប្រជុំជាមួយភាគីពាក់ព័ន្ធនៅថ្ងៃទី៩ ខែមីនា ស្អែកនេះ ដើម្បីស្វែងរកដំណោះស្រាយវិវាទនៅក្រុមហ៊ុនកាស៊ីណូណាហ្គាវើលដ៍។
យោងតាមលិខិតអញ្ជើញមួយច្បាប់ចេញផ្សាយកាលពីថ្ងៃទី៤ ខែមីនា ប៉ុន្តែ វីអូឌី ទើបទទួលបាននៅថ្ងៃអង្គារនេះ បានឱ្យដឹងថា កិច្ចប្រជុំនេះនឹងធ្វើឡើងក្រោមការចូលរួមដោយផ្ទាល់ពីលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ នៅឯសាលារាជធានីភ្នំពេញេ នៅវេលាម៉ោង១រសៀល។
ប្រភពដដែលបានឱ្យដឹងថា កិច្ចប្រជុំនេះក៏មានការអញ្ជើញចូលរួមពីរដ្ឋមន្ត្រីក្រសួងការងារ លោក អ៊ិត សំហេង, រដ្ឋមន្ត្រីក្រសួងយុត្តិធម៌ លោក កើត រិទ្ធ, រដ្ឋមន្ត្រីក្រសួងសុខាភិបាល លោក ម៉ម ប៊ុនហេង, អគ្គស្នងការនគរបាលជាតិ លោក នេត សាវឿន, អភិបាលរាជធានីភ្នំពេញ លោក ឃួង ស្រេង, ប្រធានសាលាដំបូងរាជធានីភ្នំពេញ លោក តាំង ស៊ុនឡាយ, ព្រះរាជអាជ្ញាអយ្យការអមសាលាដំបូងរាជធានីភ្នំពេញ លោក ច្រឹង ខ្មៅ រួមទាំងស្នងការនគរបាលរាជធានីភ្នំពេញ លោក ស ថេត និងមេបញ្ជាការកងរាជអាវុធហត្ថរាជធានីភ្នំពេញ លោក រ័ត្ន ស្រ៊ាង ផងដែរ។
សូមជម្រាបជូនថា ក្រុមកម្មករណាហ្គាវើលដ៍បានធ្វើកូដកម្មអហិង្សាកាលពីថ្ងៃទី១៨ ខែធ្នូ ឆ្នាំ២០២១ ដើម្បីទាមទារលក្ខខណ្ឌការងារ៩ចំណុច ជាពិសេសទាមទារឱ្យក្រុមហ៊ុនទទួលយកថ្នាក់ដឹកនាំសហជីព និងកម្មករណាហ្គាវើលដ៍ សរុប៣៧៣នាក់ ចូលធ្វើការងារវិញ។ ប៉ុន្តែរហូតមកដល់ពេលនេះ មិនទាន់មានដំណោះស្រាយនៅឡើយទេ។
ផ្ទុយទៅវិញ ថ្នាក់ដឹកនាំសហជីពនិងសមាជិកសហជីពសរុបចំនួន១១នាក់ហើយដែលត្រូវបានចាប់និងឃុំខ្លួននៅឯពន្ធនាគារព្រៃស ដោយតុលាការចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និង «បំពានវិធានការទប់ស្កាត់ការឆ្លងរាលដាលជំងឺកូវីដ-១៩»។
កាលពីថ្ងៃម្សិលមិញ ក្រុមកម្មករណាហ្គាវើលដ៍ ១៨០នាក់ទៀត ត្រូវបានអាជ្ញាធររាជធានីភ្នំពេញចាប់បញ្ចូលក្នុងរថយន្តក្រុងបញ្ជូនទៅមណ្ឌលចត្តាឡីស័កនៅខណ្ឌព្រែកព្នៅ បន្ទាប់ពីពួកគេចេញមកធ្វើកូដកម្មជាថ្មី។
នៅក្នុងសេចក្ដីប្រកាសព័ត៌មានមួយរបស់រដ្ឋបាលរាជធានីភ្នំពេញ នៅថ្ងៃទី៧ ខែមីនា ម្សិលមិញនេះ បានចោទប្រកាន់ក្រុមកូដករណាហ្គាវើលដ៍នេះ ថាបានធ្វើកូដកម្មក្រោមការអូសទាញនិងញុះញង់របស់មនុស្សមួយក្ដាប់តូចក្នុងជួរបាតុករក្រុមហ៊ុនណាហ្គាវើលដ៍ តាមការបង្គាប់បញ្ជារបស់មនុស្សមួយក្រុមដែលនៅខាងក្រៅ ដែលចិញ្ចឹមចិត្តរៀបចំសេណារីយ៉ូឱ្យមានរូបភាពផ្សេងៗ ដើម្បីកេងចំណេញ។
សេចក្ដីប្រកាសនេះបានបន្ថែមថា៖ «លើសពីនេះទៀត ក្រុមនេះបានលើកហេតុផលពន្យល់ ឆក់ឱកាស ប្រើប្រាស់ និងរៀបចំក្រុមបាតុករដែលជាអតីតបុគ្គលិក និងបុគ្គលិកក្រុមហ៊ុនណាហ្គាវើលដ៍ ឱ្យធ្វើបាតុកម្មខុសច្បាប់មុនថ្ងៃ ៨មីនាមួយថ្ងៃ គឺនៅថ្ងៃទី០៧ ខែមីនា ឆ្នាំ២០២២នេះ ដើម្បីយករូបភាពនានាពីការអនុវត្តវិធានការសុខាភិបាលប្រយុទ្ធប្រឆាំងនឹងជំងឺកូវីដ-១៩ ការរៀបចំសណ្ដាប់ធ្នាប់សាធារណៈ របៀបរៀបរយសង្គមរបស់អាជ្ញាធរមានសមត្ថកិច្ច សម្រាប់ធ្វើការបកស្រាយទៅជារូបភាពអវិជ្ជមានផ្សេងៗតាមការចង់បានរបស់ពួកគេ»។
ដោយឡែក ទាក់ទងការឃាត់ខ្លួនកូដករណាហ្គាវើលដ៍១៨០នាក់ កាលពីម្សិលមិញនេះវិញ អាជ្ញាធរបានអះអាងថា អាជ្ញាធរបានអញ្ជើញក្រុមបាតុករទាំង១៨០នាក់ទៅមណ្ឌលចត្តាឡីស័ក រាជធានីភ្នំពេញ ដើម្បីធ្វើតេស្តរកវីរុសកូវីដ-១៩ តែប៉ុណ្ណោះ។ អាជ្ញាធរក៏បានចោទប្រកាន់ក្រុមកូដករទាំង១៨០នាក់ថាមិនសហការផ្ដល់ព័ត៌មានទាក់ទងឈ្មោះ និងអត្តសញ្ញាណរបស់ខ្លួន ដើម្បីឱ្យក្រុមគ្រូពេទ្យយកសំណាកធ្វើតេស្ត។
អាជ្ញាធរបានព្រមានអនុវត្តវិធានការច្បាប់ ដោយពិន័យអន្តរការណ៍ជាប្រាក់ពី១ ០០០ ០០០រៀល ទៅ៥ ០០០ ០០០រៀល។ ហើយក្នុងករណីមិនរាងចាល នឹងពិន័យទ្វេដង។
គិតត្រឹមរសៀលថ្ងៃទី៨ ខែមីនានេះ បុគ្គលិកណាហ្គាវើលដ៍ទាំង១៨០នាក់នៅមិនទាន់ដោះលែងវិញនៅឡើយទេ៕