អាជ្ញាធរបានអនុញ្ញាតឱ្យកូដករណាហ្គាជិត២០០នាក់ដែលជាប់នៅក្នុងមណ្ឌលចត្តាឡីស័ក ខណ្ឌព្រែកព្នៅ វិលត្រលប់ទៅផ្ទះវិញអស់ហើយ កាលពីវេលាម៉ោង៨យប់ ថ្ងៃទី៨ ខែមីនានេះ។
តំណាងកូដករណាហ្គាវើលដ៍ អ្នកស្រី ណុប ទិត្យបូរ៉ាវី បានប្រាប់ វីអូឌី នៅព្រឹកនេះថា អាជ្ញាធរបានអនុញ្ញាតឱ្យសមាជិករបស់អ្នកស្រីវិលត្រលប់ទៅផ្ទះវិញកាលពីយប់មិញនេះ បន្ទាប់ពីអាជ្ញាធរបានបរាជ័យក្នុងការបញ្ចុះបញ្ចូលឱ្យក្រុមកូដករផ្ដល់សំណាកធ្វើតេស្តរកជំងឺកូវីដ-១៩។
បើតាមអ្នកស្រី ណុប ទិត្យបូរ៉ាវី នៅថ្ងៃពុធនេះ កូដករណាហ្គាវើលដ៍សម្រាកមិនធ្វើកូដកម្មនោះទេ ដោយសារកូដករមួយចំនួនអស់កម្លាំង ដោយសារត្រូវជាប់ក្នុងមណ្ឌលចត្តាឡីស័កមួយយប់ពីរថ្ងៃ និងម្យ៉ាងទៀតពួកគេនៅទន្ទឹងរង់ចាំស្ដាប់លទ្ធផលកិច្ចប្រជុំរបស់រដ្ឋមន្ត្រីក្រសួងមហាផ្ទៃ លោក ស ខេង ជាមួយភាគីពាក់ព័ន្ធនៅរសៀលថ្ងៃពុធនេះ នៅឯសាលារាជធានីភ្នំពេញ។
សូមជម្រាបជូនថា ក្រុមកូដករណាហ្គាវើលដ៍ (Naga World) ជិត២រយនាក់ (១៨៣) ត្រូវបានអាជ្ញាធរចាប់បញ្ចូលទៅក្នុងរថយន្តក្រុងបញ្ជូនទៅមណ្ឌលចត្តាឡីស័ក ក្នុងខណ្ឌព្រែកព្នៅ ជាថ្មី បន្ទាប់ពីពួកគេបានចេញមកធ្វើកូដកម្ម ដើម្បីទាមទារដំណោះស្រាយវិវាទការងារពីក្រុមហ៊ុនកាស៊ីណូណាហ្គាវើលដ៍ កាលពីថ្ងៃចន្ទដើមសប្ដាហ៍នេះ៕
