ស្ថានភាពសេរីភាពសារព័ត៌មាននៅកម្ពុជា ឆ្នាំ២០២១ កាន់តែអាក្រក់ បើប្រៀបធៀបនឹងឆ្នាំ២០២០ ខណៈអ្នកកាសែតចំនួនជិត១០០នាក់បានរងការធ្វើទុក្ខបុកម្នេញ។
យោងតាមរបាយការណ៍របស់មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ហៅកាត់ CCIM ស្ដីពី «ការប្រឈមរបស់អ្នកសារព័ត៌មានឯករាជ្យប្រចាំឆ្នាំ២០២១» បានរកឃើញថា ស្ថានភាពសេរីភាពសារព័ត៌មាននៅកម្ពុជា ឆ្នាំ២០២១ កាន់តែអាក្រក់ បើប្រៀបធៀបនឹងឆ្នាំ២០២០។
មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ និងសម្ព័ន្ធអ្នកសារព័ត៌មានកម្ពុជា (ខេមបូចា) បានកត់ត្រាពីការធ្វើទុក្ខបុកម្នេញទៅលើអ្នកសារព័ត៌មានចំនួន៥១ករណី ឬស្មើនឹងអ្នកសារព័ត៌មានរងគ្រោះចំនួន៩៣នាក់ (៥នាក់ជាស្ដ្រី) ដោយក្នុងនោះ អ្នកសារព័ត៌មានចំនួន៣២នាក់ត្រូវបានចាប់ឃាត់ខ្លួន ហើយ២៤នាក់ប្រឈមបណ្ដឹងផ្លូវច្បាប់ និង១៨នាក់ទៀតអះអាងថាទទួលរងការគំរាមកំហែងនិងការធ្វើទុក្ខបុកម្នេញ។
យ៉ាងណាក្ដី CCIM សង្កេតឃើញថា មានការលេចឡើងនូវតួនាទីកាន់តែសំខាន់របស់ពលរដ្ឋអ្នកសារព័ត៌មានក្នុងការរាយការណ៍ព័ត៌មានពីសហគមន៍ ហើយពួកគេក៏ជួបនូវការប្រឈមបញ្ហាស្រដៀងគ្នានឹងអ្នកសារព័ត៌មានអាជីពដែរ។
ប្រធានវិទ្យាស្ថានប្រជាធិបតេយ្យកម្ពុជា លោកបណ្ឌិត ប៉ា ចន្ទរឿន មានប្រសាសន៍ថា អ្នកសារព័ត៌មាននៅតែជួបបញ្ហាប្រឈមនៃការធ្វើទុក្ខបុកម្នេញផ្នែកផ្លូវច្បាប់ រាងកាយ និងផ្លូវចិត្ត ដោយលោកចាត់ទុកបញ្ហាទាំងនេះថាជាបញ្ហាប្រឈមគួរឱ្យបារម្ភ ខណៈការប្រឹក្សាយោបល់និងការគាំពារពីស្ថាប័នរដ្ឋនៅមានកម្រិតទាបនៅឡើយ។
ករណីនេះ លោកបណ្ឌិត ប៉ា ចន្ទរឿន យល់ថា បើរដ្ឋាភិបាលមិនមានវិធានការទប់ស្កាត់បញ្ហាប្រឈមទាំងនោះឱ្យបានទាន់ពេលទេ នឹងធ្វើឱ្យប៉ះពាល់ដល់ស្មារតីអ្នកសារព័ត៌មានក្នុងការបំពេញតួនាទីរបស់ខ្លួន ដើម្បីរួមចំណែកជួយសង្គមជាតិផងដែរ ។
លោកបន្ថែមថា៖ «បើសិនជាស្ថានភាព [ការរិះគន់ និងការរើសអើង] នេះនៅតែបន្ត វាអាចធ្វើឱ្យប៉ះពាល់ដល់ទឹកចិត្តនិងស្មារតីអ្នកសារព័ត៌មានក្នុងការបំពេញតួនាទីនិងកិច្ចការរបស់ខ្លួននៅក្នុងសង្គមផងដែរ»។
អ្នកនាំពាក្យក្រសួងព័ត៌មាន លោក មាស សោភ័ណ្ឌ មិនបានឆ្លើយតបយ៉ាងណាទេ នៅរសៀលថ្ងៃនេះ ដោយថាជាប់រវល់ប្រជុំ។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា លោក ណុប វី មានប្រសាសន៍ថា ប្រសិនបើការរើសអើងនិងបញ្ហាប្រឈមអ្នកសារព័ត៌មាននៅតែកើតឡើង គឺលោកមានការព្រួយបារម្ភជាខ្លាំង ប្រសិនបើគ្មានការទប់ស្កាត់ទាន់ពេលវេលានោះទេ។
លោកផ្ដល់ជាអនុសាសន៍ថា ដើម្បីទប់ស្កាត់កុំឱ្យមានបញ្ហាប្រឈមបែបនេះកើតមានឡើងទៀត រដ្ឋាភិបាលត្រូវពង្រឹងការអនុវត្តច្បាប់លើអ្នកប្រព្រឹត្ត ដើម្បីបញ្ចប់វប្បធម៌និទណ្ឌភាពលើអ្នកសារព័ត៌មាននៅកម្ពុជា។
លោកមានប្រសាសន៍ថា៖ «បើករណីកើតមានឡើង យើងត្រូវធានាថា ករណីនោះត្រូវបានដោះស្រាយដោយប្រសិទ្ធភាព និងឆ្លើយតបប្រកបដោយវិជ្ជមាន មិនមែនការធ្វើមិនដឹងមិនឮ។ មួយទៀត វាជារឿងនិទណ្ឌភាព ដូច្នេះយើងត្រូវដោះស្រាយដោយការដាក់សកម្មភាពជាក់លាក់ ដើម្បីបញ្ឈប់និទណ្ឌភាពនៅប្រទេសកម្ពុជា។ កុំឱ្យជនល្មើសរួចខ្លួន ហើយជនរងគ្រោះនៅតែបន្ដត្រូវបានរំលោភបំពានបន្ដទៀត។ ហើយយើងត្រូវបន្ដការអប់រំឱ្យទូលំទូលាយ ដើម្បីឱ្យជនរងគ្រោះដឹងពីវិធីសាស្រ្តតាមផ្លូវច្បាប់ក្នុងការឆ្លើយតប»។
បើតាមការសិក្សាស្រាវជ្រាវរបស់ CCIM បានឱ្យដឹងទៀតថា អ្នកជំនាញផ្នែកព័ត៌មាននិងអ្នកពាក់ព័ន្ធ មិនរំពឹងថា ស្ថានភាពសារព័ត៌មាននៅឆ្នាំ២០២២ អាចនឹងល្អឡើងវិញនោះទេ ដោយសារការបន្ដរឹតត្បិតផ្នែកនយោបាយនិងបទដ្ឋានច្បាប់ផ្សេងៗ ដែលផ្ដល់អំណាចកាន់តែច្រើនដល់រដ្ឋាភិបាលក្នុងការគ្រប់គ្រងប្រព័ន្ធផ្សព្វផ្សាយនៅកម្ពុជា។
អង្គការអ្នកកាសែតគ្មានព្រំដែន កាលពីពេលថ្មីៗនេះ បានបន្តផ្ដល់ចំណាត់ថ្នាក់សេរីភាពសារព័ត៌មាននៅកម្ពុជា ឆ្នាំ២០២១ ស្ថិតនៅក្នុងរូបភាពអាក្រក់ដដែល ដោយនៅលេខរៀងទី១៤៤ ក្នុងចំណោម១៨០ប្រទេសនៅលើពិភពលោក។ សេរីភាពសារព័ត៌មានដែលអង្គការនេះវាយតម្លៃ បង្ហាញថា កម្ពុជាបានធ្លាក់ចុះ៣ឆ្នាំជាប់ៗគ្នាចាប់តាំងពីឆ្នាំ២០១៧មក ៕