ប្រធានាធិបតីរុស្ស៊ី លោក វ្លាឌីមៀរ ពូទីន នៅថ្ងៃសុក្រនេះ បានបើកភ្លើងខៀវដើម្បីនាំយកយុទ្ធជនរាប់ពាន់នាក់មកពីមជ្ឈិមបូព៌ា ដើម្បីចូលរួមជាមួយខ្លួនក្នុងការប្រយុទ្ធប្រឆាំងនឹងអ៊ុយក្រែន។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
លោក វ្លាឌីមៀរ ពូទីន ថ្លែងថា៖ «ប្រសិនបើអ្នកឃើញមានមនុស្សទាំងអស់នេះ ដែលមានគោលបំណងពិតប្រាកដ ហើយមិនមែនដើម្បីប្រាក់ មកជួយប្រជាជនដែលរស់នៅក្នុងតំន់ Donbass នោះ យើងត្រូវតែអនុញ្ញាតឱ្យពួកគេធ្វើនូវអ្វីដែលពួកគេចង់ធ្វើ និងជួយពួកគេឱ្យទៅដល់តំបន់ជម្លោះ»។
នៅក្នុងកិច្ចប្រជុំមួយនៃក្រុមប្រឹក្សាសន្តិសុខរបស់រុស្ស៊ី រដ្ឋមន្ត្រីការពារជាតិ លោក Sergei Shoigu បានឱ្យដឹងថា អ្នកស្ម័គ្រចិត្តចំនួន១៦ ០០០នាក់ នៅមជ្ឈិមបូព៌ា បានត្រៀមខ្លួនរួចជាស្រេច ដើម្បីមកប្រយុទ្ធជាមួយកងកម្លាំងដែលគាំទ្រដោយរុស្ស៊ីនៅក្នុងតំបន់ Donbass ភាគខាងកើតអ៊ុយក្រែន។
ជាមួយគ្នានេះ លោក Sergei Shoigu ក៏បានស្នើផងដែរថា មីស៊ីល Javelin និង Stinger ផលិតដោយលោកខាងលិច ដែលត្រូវបានចាប់យកដោយកងទ័ពរុស្ស៊ីនៅអ៊ុយក្រែន គួរតែត្រូវបានប្រគល់ឱ្យទៅកងកម្លាំងក្នុងតំបន់ Donbass។
ជាការឆ្លើយតប លោក ពូទីន ថា៖ «ទាក់ទងនឹងការប្រគល់អាវុធ ជាពិសេសអាវុធដែលផលិតដោយលោកខាងលិច ដែលបានធ្លាក់ទៅក្នុងដៃរបស់កងទ័ពរុស្ស៊ី ខ្ញុំគាំទ្រសកម្មភាពនៃការប្រគល់អាវុធទាំងនេះទៅឱ្យអង្គភាពយោធានៃសាធារណរដ្ឋប្រជាមានិត Lugansk និង Donetsk»។
លោកបានថ្លែងប្រាប់ទៅកាន់លោក Sergei Shoigu ថា៖ «សូមធ្វើសកម្មភាពនេះចុះ»។
គួរបញ្ជាក់ថា រុស្ស៊ីបានបើកការឈ្លានពានលើអ៊ុយក្រែន កាលពីថ្ងៃទី២៤ ខែកុម្ភៈ ដែលធ្វើឡើងភ្លាមៗបន្ទាប់ពីប្រធានាធិបតីរុស្ស៊ី លោក វ្លាឌីមៀរ ពូទីន បានប្រកាសទទួលស្គាល់តំបន់ផ្តាច់ខ្លួនចំនួនពីរនៅភាគខាងកើតអ៊ុយក្រែនជារដ្ឋឯករាជ្យ។
ទាក់ទិននឹងករណីនេះ រុស្ស៊ីបានលើកឡើងថា ខ្លួនកំពុងអនុវត្ត «ប្រតិបត្តិការយោធាពិសេសមួយ» ដើម្បីបញ្ឈប់រដ្ឋាភិបាលអ៊ុយក្រែនពីការប្រព្រឹត្តអំពើប្រល័យពូជសាសន៍ប្រឆាំងនឹងប្រជាជនរបស់ខ្លួន ខណៈដែលការចោទប្រកាន់នេះត្រូវបានប្រទេសលោកខាងលិចចាត់ទុកថា ជាការលើកឡើងដោយគ្មានមូលដ្ឋានច្បាស់លាស់។
យោងតាមការឱ្យដឹងពីលោក Sergei Shoigu យោធារុស្ស៊ីក៏គ្រោងនឹងពង្រឹងព្រំដែនផ្នែកខាងលិចរបស់ខ្លួន បន្ទាប់ពីលោកមើលឃើញពីការកើនឡើងនៃអង្គភាពយោធាលោកខាងលិចនៅតាមព្រំដែនរុស្ស៊ី៕
