ប្រធានាធិបតីរុស្ស៊ី លោក វ្លាឌីមៀរ ពូទីន បានឱ្យដឹងនៅថ្ងៃព្រហស្បតិ៍ម្សិលមិញថា រុស្ស៊ីនៅទីបំផុតនឹងកាន់តែរឹងមាំហើយឯករាជ្យជាងមុនបន្ថែមទៀត បន្ទាប់ពីជម្នះបានរាល់ការលំបាកនានាដែលបណ្ដាលមកពីអ្វីដែលលោកចាត់ទុកថា ជាទណ្ឌកម្មខុសច្បាប់របស់លោកខាងលិច។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ប្រធានាធិបតីរូបនេះបន្ថែមថា រុស្ស៊ីចាត់ទុកសកម្មភាពរបស់ខ្លួនក្នុងប្រទេសអ៊ុយក្រែននេះជាប្រតិបត្តិការយោធាពិសេស ខណៈរុស្ស៊ីមិនមែនជាប្រទេសមួយដែលអាចទទួលយកការសម្របសម្រួលអធិបតេយ្យភាពរបស់ខ្លួនសម្រាប់ការចំណេញផ្នែកសេដ្ឋកិច្ចរយៈពេលខ្លីមួយចំនួននោះទេ។
លោក វ្លាឌីមៀរ ពូទីន បានបន្ថែមឱ្យដឹងនៅក្នុងកិច្ចប្រជុំមួយរបស់រដ្ឋាភិបាលរុស្ស៊ីថា៖ «ទណ្ឌកម្មទាំងនេះអាចនឹងត្រូវបានដាក់ក្នុងករណីណាមួយ ខណៈដែលវាបង្កឱ្យមានជាសំណួរ បញ្ហា និងការលំបាកមួយចំនួនផងដែរ។ ទោះជាយ៉ាងណា យើងធ្លាប់បានជម្នះលើបញ្ហាអស់ទាំងនេះបានកាលពីពេលកន្លងមក ហើយយើងនឹងនៅតែអាចបន្តជម្នះវាបាននៅពេលខាងមុខទៀត»។
គួរបញ្ជាក់ថា ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែន តាមរយៈការចលនាទ័ពរបស់ខ្លួនចូលមកកាន់ប្រទេសក្បែរខាងមួយនេះ។
ជាការឆ្លើយតប សហភាពអឺរ៉ុប និងបណ្ដាប្រទេសមួយចំនួនផ្សេងទៀត ក៏បានសម្រេចដាក់ទណ្ឌកម្មជាបន្តបន្ទាប់លើរុស្ស៊ីផងដែរ ពោលគឺបន្ទាប់ពីការប្រកាសសង្រ្គាមមួយដោយប្រធានាធិបតី លោក វ្លាឌីមៀរ ពូទីន៕
