ប្រជាពលរដ្ឋខ្មែរមួយចំនួន ដែលជាពលករចំណាកស្រុក ទៅធ្វើការនៅក្នុងប្រទេសថៃ បានប្រើប្រាស់ថ្នាំ ដើម្បីលេបបង្កាទុកជាមុន នៅមុនពេលឆ្លងជំងឺកូវីដ-១៩ ខណៈអ្នកជំនាញបានព្រមានថា ការធ្វើបែបនេះ នឹងប៉ះពាល់ដល់សុខភាពនៅពេលក្រោយ។
ពលករចំណាកស្រុកធ្វើការនៅប្រទេសថៃម្នាក់ លោក ផុក សុខឃឿន បានអះអាងថា លោកបានប្រើប្រាស់ថ្នាំម្យ៉ាងដែលលោកយល់ថា ជាប្រភេទថ្នាំបុរាណចិន (ឱសថបុរាណ)។ ហើយថ្នាំនេះ គឺលេបក្នុងគោលបំណងដើម្បីការពារទុកជាមុនដើម្បីកម្តៅពោះ ដោយពលកររូបនេះយល់ឃើញថា វីរ៉ុសកូវីដ-១៩ មិនអាចបន្ស៊ំខ្លួននៅក្នុងសីតុណ្ហភាពក្តៅនេះបានទេ។ ម្យ៉ាងវិញទៀត គឺដើម្បីការពារកុំឱ្យកើតមានជំងឺផ្តាសាយផងដែរ។
លោក ផុក សុខឃឿន ដែលមានស្រុកកំណើតនៅភូមិកំរែង ឃុំបាសាក់ ស្រុករុក្ខគិរី ខេត្តបាត់ដំបង ហើយបច្ចុប្បន្នកំពុងធ្វើការនៅក្នុងប្រទេសថៃ។ លោកបានបញ្ជាក់យ៉ាងដូចច្នេះថា៖ «ថ្នាំលេប យើងលេបការពារទុកពេលមុនដេកដើម្បីកម្តៅពោះវាអ៊ីចឹង កម្តៅឱ្យក្តៅអ៊ីចឹង ព្រោះមេរោគហ្នឹងវាខ្លាចក្តៅអ៊ីចឹង ណាមួយកុំឱ្យផ្តាសាយ ផ្តាសអ៊ឹចឹងណាស់ វាមានជាតិល្វីង វាជាប្រភេទឱសថបុរាណចិន។ លេបមួយថ្ងៃ១គ្រាប់រៀងរាល់ថ្ងៃមុនពេលដេក លេបរយៈពេល១ខែអ៊ីចឹង»។
ពលករដដែលបន្ថែមទៀតថា ដោយសារតែលោកមានការព្រួយបារម្ភ បន្ទាប់ពីមានការឆ្លងជំងឺកូវីដ-១៩ នៅប្រទេសថៃច្រើនឡើង រហូតដល់ធ្វើឱ្យលោកសម្រេចចិត្តទិញថ្នាំលេបដើម្បីការពារទុកជាមុនពីការឆ្លងនៃវីរ៉ុសកូវីដ-១៩។
លោកមានប្រសាសន៍ថា៖ «ទិញលេបខ្លួនឯងការពារ ភ័យខ្លាចឆ្លងដំបូងៗ ចេះតែភ័យៗទៅចេះតែលេបការពារទៅ»។
ជាមួយគ្នានេះដែរ អតីតពលករចំណាកស្រុកទៅធ្វើការនៅប្រទេសថៃដែរ គឺអ្នកស្រី បៀ សុណាគ្រី បានបង្ហាញបទពិសោធឆ្លាប់ប្រើប្រាស់ថ្នាំ ដើម្បីលេបបង្កាទុកជាមុន មុនពេលឆ្លងជំងឺកូវីដ-១៩នេះដែរ។ អ្នកស្រីយល់ឃើញថា ការការពារដោយលេបថ្នាំមុនពេលឆ្លងវីរ៉ុសកូវីដ-១៩ គឺមិនមានផលប៉ះពាល់អ្វីទេដល់សុខភាព ពីព្រោះថ្នាំដែលពួកគាត់កំពុងតែលេបនោះ ជាប្រភេទថ្នាំបុរាណចិន។
លោកស្រី បៀ សុណាគ្រី មានស្រុកកំណើតនៅភូមិកំរែង ឃុំបាសាក់ ស្រុករុក្ខគិរី ខេត្តបាត់ដំបងដែរនោះយល់ថា៖ «ខ្ញុំលេបថ្នាំមានអី និយាយរួមយើងលេបការពារវាមិនអីទេ បើយើងសង្ស័យខ្លួនយើង យើងលេបការពារវាមិនអីទេ ថ្នាំហ្នឹងឮគេថាធ្វើពីដើមឈើស្អីមិនដឹងទេ»។
អតីតពលករចំណាកស្រុករូបនេះបានបញ្ជាក់បន្តទៀតថា ការលេបថ្នាំនេះ គឺធ្វើឡើងបន្ទាប់មានការរីករាលខ្លាំងនៃជំងឺកូវីដ-១៩នៅប្រទេសថៃ។ ហើយថៅកែក្រុមហ៊ុនរបស់គាត់បានចែកថ្នាំប្រភេទឱសថបុរាណចិននេះដើម្បីឱ្យបុគ្គលិករោងចក្រលេបបង្កាការពារទុកជាមុន។
អ្នកស្រីបានបន្ថែមទៀតថា៖ «អាថ្នាំហ្នឹង ពួកក្រុមហ៊ុនគេចែកឱ្យពួកមេៗនៅរោងចក្រ គេចែកឱ្យ៦០គ្រាប់ ឱ្យយើងលេបម្តងពីរគ្រាប់ លេប១គ្រាប់ក៏បាន២គ្រាប់ក៏បាន គេថាឱ្យលេបការពារមុន ប៉ុន្តែមិនមែនការពារមិនឱ្យឆ្លងទេ»។
ប្រធានសមគមគ្រូពេទ្យគុណធម៌ លោកវេជ្ជបណ្ឌិត អ៊ូច វុទ្ធី បានលើកឡើងថា ការសម្រុកទៅទិញថ្នាំ (ថ្នាំព្យាបាលជំងឺកូវីដ-១៩) តាមគ្នាដោយគ្មានការយល់ដឹងពីបច្ចេកទេសត្រឹមត្រូវទេ ហើយទៅទិញថ្នាំយកមកប្រើ ដោយគ្មានការពិគ្រោះយោបល់ជាមួយអ្នកជំនាញ វានឹងធ្វើឱ្យប៉ះពាល់ដល់សុខភាព។ លោកថា ការធ្វើរបៀបនេះ គឺជារឿងខុសឆ្គង។
លោកវេជ្ជបណ្ឌិត អ៊ូច វុទ្ធី បានយល់ឃើញថា៖ «សូមបងប្អូនប្រុងប្រយ័ត្នទាំងអស់គ្នា ហើយកុំពពាក់ពពូនជឿតាមគ្នា ដោយគ្មានការយល់ដឹង គ្មានបច្ចេកទេសត្រឹមត្រូវ ទៅទិញថ្នាំមកប្រើវាប៉ះពាល់សុខភាព ហើយបងប្អូនទី១ មិនបានពិគ្រោះយោបល់ជាមួយគ្រូពេទ្យជំនាញៗដែលនៅក្បែរខ្លួន។ ទី២បងប្អូនអត់មានឈឺផង ហើយទៅទិញថ្នាំហ្នឹងលេប (Molnupiravir) ដើម្បីទប់ស្កាត់កូវីដ-១៩ វាអត់មានទេ ថ្នាំវាគ្រាន់ជាអាវុធមួយសម្លាប់មេរោគហ្នឹងឱ្យអស់ ហើយធ្វើឱ្យខ្លួនយើងធូរស្រាលវិញ»។
ប្រធានសមាគមគ្រូពេទ្យគុណធម៌រូបនេះបានបង្ហាញការយល់ឃើញបន្តទៀតថា ការលេបថ្នាំការពារទាំងដែលយើងមិនទាន់មានជំងឺអ្វីផងនេះ វាជារឿងដែលមិនត្រឹមត្រូវ ហើយនៅថ្ងៃខាងមុខអាចប៉ះពាល់ដល់សុខភាពបង្កឱ្យរេស៊ីស្តង់នៃការប្រើប្រាស់ថ្នាំឡើងខ្ពស់ ជាហេតុធ្វើឱ្យពិបាកព្យាបាលនៅពេលជំងឺកើតមានឡើង។
លោកថា «ពេលឈឺប្រើថ្នាំកូវីដ-១៩ហ្នឹង ហើយពេលដែលមិនទាន់ឈឺ ហើយទៅលេបថ្នាំហ្នឹងការពារ វាអត់មានទេ ថ្ងៃក្រោយប៉ះពាល់សុខភាពបងប្អូនច្រើន វានឹងអាចរេស៊ីស្តង់ថ្នាំទៀត ពេលណាដែលបងប្អូនប្រើថ្នាំសាហាវពេក ប្រើថ្នាំខ្លាំងពេក ថ្ងៃក្រោយពេលឈឺប្រើថ្នាំល្មមៗអត់ជាទេ ថ្នាំល្មមៗមិនអាចវាយលុកឈ្នះពួកមេរោគ សាហាវខាងក្រៅបានទេ។ បងប្អូនមានហានិភ័យហ្នឹងមួយទៀត ហើយពេទ្យពេលណាគាត់ឱ្យថ្នាំលេបភ្លាម គេរកមូលហេតុ គេវាយសន្សឹមៗឱ្យយើង ឱ្យថ្នាំល្មមៗសិនកាលណា អាល្មមជាសិនបានន័យថា បងប្អូនឈ្នះមេរោគហ្នឹងហើយ ស្គាល់មេរោគហ្នឹង ថ្ងៃក្រោយប្រើថ្នាំល្មមៗឆាប់ព្យាបាលជា»។
ការប្រើប្រាស់ថ្នាំបង្កាមុនពេលឆ្លងជំងឺកូវីដ-១៩ របស់ប្រជាពលរដ្ឋដោយគ្មានវេជ្ជបញ្ជាពីគ្រូពេទ្យនេះ ត្រូវបានអ្នកជំនាញរបស់ក្រសួងសុខាភិបាល លោកស្រីវេជ្ជបណ្ឌិត ឱ វណ្ណឌីន បានអំពាវនាវដល់ប្រជាពលអំពីការប្រើប្រាស់ថ្នាំ Molnupiravir ឱ្យបានត្រឹមត្រូវតាមនីតិវិធីស្តង់ដាសម្រាប់ការថែទាំព្យាបាល អ្នកជំងឺកូវីដ-១៩។ ហើយលោកស្រីបានបញ្ជាក់យ៉ាងច្បាស់ថា ការប្រើប្រាស់ឱសថ Molnupiravir គឺប្រើប្រាស់បានតែសម្រាប់អ្នកមានវិជ្ជមានកូវីដ-១៩ តែប៉ុណ្ណោះ មិនមែនទិញសម្រាប់លេបការពារពីវីរ៉ុសកូវីដ-១៩នោះទេ។
លោកស្រី ឱ វណ្ណឌីន មានប្រសាសន៍ថា៖ «ក្រសួងសុខាភិបាលបានធ្វើការណែនាំ ក្រើនរំលឹកអំពីនីតិវិធីស្តង់ដាដែលយើងត្រូវប្រកាន់យក និងអនុវត្តន៍សម្រាប់ការថែទាំព្យាបាល អ្នកជំងឺកូវីដ-១៩ នៅតាមផ្ទះសម្បែង។ ហើយនៅក្នុងការណែនាំនោះថ្វីដ្បិតតែមានការលើកឡើងអំពីការប្រើប្រាស់នូវឱសថ Molnupiravir ប៉ុន្តែការដែលប្រើប្រាស់នេះ គឺសម្រាប់អ្នកដែលរកឃើញវិជ្ជមានវីរ៉ុសកូវីដ-១៩ តែប៉ុណ្ណោះ មិនមែនសម្រាប់ទិញយកទៅលេបដើម្បីការពារមិនឱ្យឆ្លងកូវីដ-១៩នោះទេ»។
រដ្ឋាលេខាធិការក្រសួងសុខាភិបាលរូបនេះបន្តថា៖ «អ៊ឹចឹងខ្ញុំបញ្ជាក់ហើយបញ្ជាក់ទៀត ព្រោះបងប្អូនមួយចំនួនមានការភាន់ច្រឡំ ហើយម្យ៉ាងទៀតដោយសារការចរាចរនៃវីរ៉ុសកូវីដ-១៩ដែលបច្ចុប្បន្ននេះយើងរកឃើញជារៀងរាល់ថ្ងៃទៅ គាត់ប្រហែលជាមានការភ័យខ្លាចខ្លាំងពេកដែលយើងហៅថា Panic ចាស។ ការភ័យព្រួយបារម្ភវាជាការត្រឹមត្រឹមហើយ ក៏ប៉ុន្តែយើងក៏មិនត្រូវភ័យពេក ហើយក៏មិនត្រូវហ៊ានពេកដែរ! អ៊ីចឹងអ្វីដែលជាកត្តាសំខាន់ គឺការពារខ្លួនយើងទេ ហើយការដែលយើងនាំគ្នាសម្រុកទៅទិញឱសថ Molnupiravir ថ្វីដ្បិតតែយើងមិនទាន់ទាំងរកឃើញវិជ្ជមានវីរ៉ុសកូវីដ-១៩ផង ហើយយើងទិញឱសថនឹងយកមកប្រើប្រាស់វាអត់ត្រឹមត្រូវទេ វាខុសលក្ខណៈបច្ចេកទេសបាត់ទៅហើយ»។
ការព្យាបាលជំងឺកូវីដ-១៩កម្រិតស្រាលត្រូវបានក្រសួងអនុញ្ញាតឱ្យប្រជាពលអាចសម្រាកព្យាបាលនៅផ្ទះដោយខ្លួនឯង ដោយគ្រាន់តែឱ្យពួកគេអនុវត្តន៍តាមការណែនាំរបស់គ្រូពេទ្យ និងទទួលទានថ្នាំ Molnupiravir ដែលមានដាក់លក់នៅក្រសួងប្រៃសណីយ៍ និងទូរគមនាគមន៍ និងទីកន្លែងឱសថស្ថាននានា ដែលមានចុះបញ្ជិការត្រឹមត្រូវពីក្រសួងពាក់ព័ន្ធ៕
អត្ថបទដោយ៖ សេក ប៊ុនឈូ សារព័ត៌មានវ័យក្មេង