ក្រសួងសុខាភិបាលបានប្រកាសរកឃើញករណីឆ្លងជំងឺកូវីដ-១៩បំប្លែងថ្មីប្រភេទ «អូមីក្រុង» ជាង១០០នាក់ ខណៈមិនមានករណីស្លាប់ទេ កាលពីថ្ងៃម្សិលមិញនេះ។
សេចក្ដីជូនព័ត៌មានរបស់ក្រសួងសុខាភិបាលចេញផ្សាយនៅថ្ងៃទី១៤ ខែមីនា ឆ្នាំ២០២២នេះ បានឱ្យដឹងថា ដោយផ្អែកតាមលទ្ធផលបញ្ជាក់ដោយម៉ាស៊ីន PCR កាលពីម្សិលមិញ រកឃើញករណីឆ្លងជំងឺកូវីដ-១៩បំប្លែងថ្មី ប្រភេទ «អូមីក្រុង» ចំនួន១៤៥នាក់ ខណៈអ្នកជាសះស្បើយសរុបមានចំនួន៣២៤នាក់ និងគ្មានករណីស្លាប់នោះទេ។
ក្រសួងបានបញ្ជាក់ថា ក្នុងចំណោមអ្នកឆ្លងថ្មីទាំង១៤៥នាក់នោះ មានករណីនាំចូលពីក្រៅប្រទេសចំនួន៣០នាក់ និងឆ្លងក្នុងសហគមន៍ចំនួន១១៥នាក់។
បើតាមក្រសួងសុខាភិបាល គិតត្រឹមព្រឹកថ្ងៃចន្ទនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១៣៤ ២១៣នាក់ ក្នុងនោះ អ្នកជំងឺព្យាបាលជាសះស្បើយចំនួន១២៩ ២៩២នាក់ និងអ្នកស្លាប់ចំនួន៣ ០៤៧នាក់។ រីឯករណីឆ្លង «អូមីក្រុង» ក្នុងសហគមន៍វិញ ក្រសួងថា គិតមកដល់ពេលនេះបានកើនឡើងដល់១២ ៥៤៧នាក់ហើយ៕
