សហភាពអឺរ៉ុប នៅថ្ងៃអង្គារនេះ បានអនុម័តជាផ្លូវការនូវការដាក់ទណ្ឌកម្មថ្មីមួយចំនួនទៀតទៅលើរុស្ស៊ី ទាក់ទងនឹងការឈ្លានពានអ៊ុយក្រែន ដែលរួមមានការហាមឃាត់ការវិនិយោគក្នុងវិស័យថាមពលរបស់រុស្ស៊ី ការនាំចេញទំនិញប្រណិត និងការនាំចូលផលិតផលដែកពីប្រទេសរុស្ស៊ី។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ការដាក់ទណ្ឌកម្មដែលចូលជាធរមាននៅថ្ងៃអង្គារនេះ ក៏បានបង្កកទ្រព្យសម្បត្តិរបស់មេដឹកនាំអាជីវកម្មជាច្រើនទៀតដែលគាំទ្ររដ្ឋរុស្ស៊ី ក្នុងនោះរួមទាំងម្ចាស់ក្លឹបបាល់ទាត់យក្ស Chelsea លោក Roman Abramovich ផងដែរ។
ទាក់ទិននឹងករណីនេះ គណៈកម្មការអឺរ៉ុបបានឱ្យដឹងនៅក្នុងសេចក្តីថ្លែងការណ៍មួយថា ការដាក់ទណ្ឌកម្មនេះ រួមមាន ការហាមឃាត់យ៉ាងទូលំទូលាយលើការវិនិយោគថ្មីនៅទូទាំងវិស័យថាមពលរបស់រុស្ស៊ី។
ប្រភពមួយពីសហភាពអឺរ៉ុប បានប្រាប់ទីភ្នាក់ងារសារព័ត៌មាន Reuters ឱ្យដឹងថា វិធានការនេះនឹងប៉ះពាល់ដល់ក្រុមហ៊ុនប្រេងសំខាន់ៗរបស់រុស្ស៊ី ដែលមានដូចជា Rosneft (ROSN.MM), Transneft (TRNF_p.MM) និង Gazprom Neft ប៉ុន្តែសមាជិកសហភាពអឺរ៉ុបនឹងនៅតែអាចទិញប្រេងនិងឧស្ម័នពីក្រុមហ៊ុនទាំងនេះបាន។
គណៈកម្មការអឺរ៉ុបបានបន្ថែមថា ការហាមប្រាមលើការនាំចូលដែកថែបរបស់រុស្ស៊ី ត្រូវបានគេប៉ាន់ប្រមាណថានឹងប៉ះពាល់ដល់ផលិតផលដែលមានទំហំទឹកប្រាក់ប្រមាណ៣,៣ពាន់លានអឺរ៉ូ (ស្មើនឹងប្រមាណ៣,៦ពាន់លានដុល្លារ) ។
ជាមួយគ្នានេះ ក្រុមហ៊ុនរបស់សហភាពអឺរ៉ុបទាំងឡាយក៏នឹងមិនត្រូវបានអនុញ្ញាតឱ្យនាំចេញទំនិញប្រណិតណាមួយទៅកាន់ប្រទេសរុស្ស៊ី ដែលមានតម្លៃលើសពី៣០០អឺរ៉ូ រួមទាំងគ្រឿងអលង្ការផងដែរ ខណៈដែលការនាំចេញរថយន្តដែលមានតម្លៃលើសពី៥ម៉ឺនអឺរ៉ូ ក៏នឹងត្រូវហាមឃាត់។
គួរបញ្ជាក់ថា រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនទៅលើអ៊ុយក្រែនតាមផ្លូវគោក ផ្លូវអាកាស និងសមុទ្រ ដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតីរុស្ស៊ី លោក វ្លាឌីមៀរ ពូទីន ដែលបានធ្វើឱ្យបណ្តាប្រទេសមួយចំនួនផ្សេងទៀត ក្រៅពីសហភាពអឺរ៉ុប ក៏បានសម្រេចដាក់ទណ្ឌកម្មជាបន្តបន្ទាប់លើរុស្ស៊ីផងដែរ៕