ជនជាតិដើមភាគតិចនៅក្រុងសែនមនោរម្យ ខេត្តមណ្ឌលគិរី ចោទក្រុមហ៊ុនឯកជនមួយថាបានដាក់គ្រឿងចក្រឈូសឆាយដីព្រៃអាស្រ័យផលរបស់ពួកគេ។
អ្នកសម្របសម្រួលជនជាតិដើមភាគតិចពូនងនៅខេត្តមណ្ឌលគិរី អ្នកស្រី ផ្លឹក ភីរុំ ប្រាប់ វីអូឌី នៅថ្ងៃពុធនេះថា កាលពីថ្ងៃម្សិលមិញ ពលរដ្ឋជនជាតិដើមភាគតិចពូនងប្រហែល៥០នាក់ បាននាំគ្នាតវ៉ាប្រឆាំងក្រុមហ៊ុនឯកជនមួយដែលមិនស្គាល់ឈ្មោះ ខណៈក្រុមហ៊ុននេះដាក់គ្រឿងឈូសឆាយនិងកាយក្រវាត់ព្រំដីរំលោភចូលដីព្រៃសហគមន៍ជនជាតិដើមភាគតិចជាច្រើនហិកតា នៅភូមិឡៅកា សង្កាតសុខដុម ក្រុងសែនមនោរម្យ។
តំណាងជនជាតិដើមភាគតិចរូបនេះ អះអាងថា ជនជាតិដើមភាគតិចពូនង បានគ្រប់គ្រងនិងអាស្រ័យផលលើដីព្រៃទំហំជាង៣០០ហិកតានេះតាំងពីដូនតាមក។ អ្នកស្រីថា ពេលដែលអ្នកភូមិចុះទប់ស្កាត់សកម្មភាពឈូសឆាយរបស់ក្រុមហ៊ុននោះ ក៏មានសមត្ថកិច្ចចាំការពារគ្រឿងចក្ររបស់ក្រុមហ៊ុន និងព្យាយាមហាមឃាត់ពលរដ្ឋមិនឱ្យរារាំងថែមទៀត។
យ៉ាងណា អ្នកស្រីថា ក្រោយពលរដ្ឋផ្ទុះការតវ៉ាខ្លាំង ខាងក្រុមហ៊ុនបានផ្អាកសកម្មភាពឈូសឆាយ ប៉ុន្តែមិនបានដកគ្រឿងចក្រចេញឡើយ។
អ្នកស្រីបន្ថែមថា៖ «ក្រុមហ៊ុនហ្នឹងកន្លងទៅ ធ្លាប់យកដីសហគមន៍ការពារធនធានធម្មជាតិជាង៦០ហិកតារបស់ជនជាតិដើមភាគតិចហ្នឹង មិនទាន់សងមកវិញទេ។ ហើយមួយទៀត ក្រុមហ៊ុនមិនទាន់សងដើមឈើជ័រពួកខ្ញុំទេ ដែលក្រុមហ៊ុនបានឈូសឆាយអស់រាប់ពាន់ដើមតាំងពីឆ្នាំ២០១២។ អីចឹងពួកខ្ញុំមិនឱ្យពួកគាត់បន្តធ្វើសកម្មភាពឈូសឆាយទេ មុននឹងវាស់ដីក្រុមហ៊ុនឱ្យបានច្បាស់លាស់ និងដោះស្រាយសំណងជាមុនសិន បើមិនអាច នឹងមានអំពើហិង្សាកើតឡើងមិនខាន»។
ជនជាតិដើមភាគតិចពូនងម្នាក់ទៀត អ្នកស្រី ញឹត លាត អាយុ២៨ឆ្នាំ បាននិយាយថា ជនជាតិដើមភាគតិចពូនងនៅសង្កាត់សុខដុមភាគច្រើន រស់ពឹងលើការរកអនុផលព្រៃឈើ និងធនធានធម្មជាតិ ដូចជា ការរកជ័រ ឃ្មុំ បន្លែ ផ្លែឈើ និងធ្វើចម្ការវិលជុំ ជាដើម។
ជនជាតិដើមភាគតិចពូនងរូបនេះបារម្ភពីការបាត់បង់ព្រៃឈើ មុខរបរ និងកន្លែងគោរពបូជារបស់ជនជាតិដើមភាគតិច ជាពិសេសការប្រែប្រួលអាកាសធាតុ ប្រសិនបើសកម្មភាពឈូសឆាយព្រៃឈើរបស់ក្រុមហ៊ុននេះមិនត្រូវទប់ស្កាត់។
អ្នកស្រីបន្ថែមថា៖ «ពួកខ្ញុំសព្វថ្ងៃរស់នៅពឹងលើព្រៃហ្នឹងហើយ សម្រាប់អាស្រ័យផល ដូចជា រកឃ្មុំចុងផ្ដៅ រកជ័រជាដើមហ្នឹង។ បើសិនយើងទុកព្រៃហ្នឹងក៏វាមានតម្លៃដែរ សម្រាប់អាកាសធាតុ កុំឱ្យវាមានការប្រែប្រួល។ ពួកខ្ញុំបានការពារព្រៃនេះរាប់ឆ្នាំហើយ ស្រាប់តែឆ្នាំនេះ ពួកគាត់ [ក្រុមហ៊ុន] បន្តធ្វើសកម្មភាពឈូសឆាយទៀត អ៊ីចឹងពួកខ្ញុំអត់សុខចិត្តទេ ម្នាក់ៗត្រូវតែតស៊ូ ត្រូវតែលះបង់ ដើម្បីព្រៃនេះ។ បើគាត់នៅតែបន្តផ្ដល់ដើមឈើហ្នឹង ខ្ញុំក៏សុខចិត្តលះបង់ជីវិត ដើម្បីការពារដើមឈើហ្នឹងដែរ»។
វីអូឌី មិនអាចសុំការឆ្លើយតបពីលោក គ្រុយ រីណា ដែលអ្នកភូមិអះអាងថាជាតំណាងក្រុមហ៊ុនបានទេ នៅថ្ងៃពុធនេះ។
ចៅសង្កាត់សុខដុម លោក ពៅ សុផាត អះអាងថា ក្រុមហ៊ុនធ្វើការកាយក្រវាត់ព្រំដីរបស់ក្រុមហ៊ុនដែលទទួលបានសិទ្ធិវិនិយោគពីរដ្ឋាភិបាលស្របតាមច្បាប់។ លោកថា ដីដែលក្រុមហ៊ុនកំពុងធ្វើសកម្មភាពឈូសឆាយនោះ ស្ថិតនៅស្រុកពេជ្រាដា មិនមែនស្ថិតក្នុងក្រុងសែនមនោរម្យឡើយ។
ចៅសង្កាត់រូបនេះបន្តថា ជុំវិញជម្លោះដីធ្លីនេះ គឺហួសពីដែនសមត្ថកិច្ចរបស់លោកក្នុងការដោះស្រាយ ហើយអាជ្ញាធរសង្កាត់ មានសិទ្ធិត្រឹមតែណែនាំដល់ពលរដ្ឋកុំប្រើប្រាស់ហិង្សា និងធ្វើឱ្យប៉ះពាល់ដល់គ្រឿងចក្ររបស់ក្រុមហ៊ុនតែប៉ុណ្ណោះ។
លោកបន្ថែមថា៖ «ខ្ញុំមិនចាំទេឈ្មោះរបស់ក្រុមហ៊ុន ប៉ុន្តែសកម្មភាពគាត់ធ្វើនេះ គ្រាន់តែកាយព្រំតាមគោលការណ៍ដីរបស់គាត់ចាស់។ រឿងនេះមិនដឹងដោះស្រាយយ៉ាងម៉េចទេ ព្រោះជាដីសម្បទានរបស់គេ អ៊ីចឹងវាពិបាកដែរ ពីព្រោះគេមានច្បាប់ទម្លាប់របស់គេត្រឹមត្រូវ»។
អ្នកប្រឹក្សាយោបល់បណ្ដាញជនជាតិដើមភាគតិចនៅខេត្តមណ្ឌលគិរី លោក គ្រឿង តុលា មានប្រសាសន៍ថា ព្រៃឈើដែលក្រុមហ៊ុនកំពុងធ្វើសកម្មភាពឈូសឆាយនោះ ជាតំបន់ព្រៃស្រោង និងនៅឆ្ងាយរាប់គីឡូម៉ែត្រពីដីចម្ការរបស់ក្រុមហ៊ុន។
លោក គ្រឿង តុលា អះអាងថា ក្នុងខេត្តមណ្ឌលគិរី មានអាជ្ញាធរ និងក្រុមហ៊ុនគប់គិតគ្នារំលោភយកដីព្រៃរបស់រដ្ឋជាច្រើនករណី។ លោកថា ពួកគេបានបន្លំឈូលឆាយរំលោភយកដីរដ្ឋហួសពីដែនកំណត់រាប់សិបហិកតា ដើម្បីបម្រើផលប្រយោជន៍ផ្ទាល់ខ្លួននិងបក្ខពួក។
តំណាងជនជាតិដើមភាគតិចរូបនេះបានអំពាវនាវដល់រដ្ឋាភិបាលចុះស្រាវជ្រាវ និងចាត់វិធានការលើករណីនេះឱ្យតឹងរ៉ឹង ដើម្បីរក្សាធនធានធម្មជាតិ និងព្រៃឈើរបស់រដ្ឋ។
លោកបន្ថែមថា៖ «សកម្មភាពកាយនេះជាព្រៃស្រោង មិនជាប់ពាក់ព័ន្ធនឹងព្រំដីក្រុមហ៊ុនទេ វានៅឆ្ងាយពីព្រំក្រុមហ៊ុនប្រមាណជា១គីឡូម៉ែត្រឯណោះ។ សកម្មភាពនេះ វាធ្វើឱ្យប៉ះពាល់ដល់ព្រៃឈើ និងជាការបំផ្លិចបំផ្លាញដើមជ័រទឹករបស់ពលរដ្ឋជាច្រើនដើម និងជាកន្លែងដែនជម្រកសត្វព្រៃភ្នំព្រិចរបស់រដ្ឋផងដែរ។ នេះគេហៅថា កន្ទេលធំបន្លំដេកច្រើនជាង» ។
ក្នុងពិធីមួយក្នុងខេត្តមណ្ឌលគិរី កាលពីខែតុលា ឆ្នាំ២០២១ រដ្ឋមន្ដ្រីក្រសួងមហាផ្ទៃ លោក ស ខេង បានទទួលស្គាល់ថា ពិតជាមានការប្រើអំណាចរំលោភយកដីរបស់ប្រជាពលរដ្ឋ និងទ្រព្យសម្បត្តិរដ្ឋនៅខេត្តភាគឦសានមួយនេះប្រាកដមែន។
រដ្ឋមន្ត្រីរូបនេះបានបង្ហាញការសោកស្ដាយចំពោះមន្ដ្រីមួយចំនួន ដែលលោកថា បានប្រើអំណាចរបស់ខ្លួនទៅរំលោភយកដីធ្លីប្រជាពលរដ្ឋ និងទ្រព្យសម្បត្តិរបស់រដ្ឋនៅខេត្តមណ្ឌលគិរី មកធ្វើជាកម្មសិទ្ធិផ្ទាល់ខ្លួន ហើយលោកចាត់ទុកករណីនេះថា ជាភាពលោភលន់របស់មន្ត្រីទាំងនោះ៕