ក្រសួងព័ត៌មាន សម្រេចមិនបន្តអាជ្ញាបណ្ណអាជីវកម្មឱ្យអង្គភាពសារព័ត៌មានចំនួន៣ ដោយសារតែអង្គភាពទាំងនោះបានបំពានលើក្រមសីលធម៌ វិជ្ជាជីវៈសារព័ត៌មាន និងកិច្ចសន្យាដែលតម្កល់ទុកនៅក្រសួង។
អង្គភាពសារព័ត៌មានដែលក្រសួងសម្រេចលុបចោលនោះ រួមមាន អង្គភាពសារព័ត៌មាន Bayongtimes (www.bayongtimes.com) អង្គភាពសារព័ត៌មាន KCTV (www.khmercovertv.com) និងអង្គភាពសារព័ត៌មានកម្ពុជារាល់ថ្ងៃ (www.cambodiatoday.news) ។
ក្នុងលិខិតរបស់ក្រសួងព័ត៌មានបានឱ្យដឹងកាលពីថ្ងៃទី១៥ ខែមីនានេះថា ដើមចមដែលនាំឱ្យក្រសួងសម្រេចមិនបន្តអាជ្ញាបណ្ណឱ្យអង្គភាពសារព័ត៌មានចំនួន៣នោះ ដោយសារតែគណៈកម្មាធិការនីតិកម្មនៃក្រសួងព័ត៌មាន បានរកឃើញថា អង្គភាពទាំង៣នោះធ្វើការផ្សព្វផ្សាយព័ត៌មានបំពានលើក្រមសីលធម៌ វិជ្ជាជីវៈសារព័ត៌មាន និងកិច្ចសន្យាអាជីវកម្មដែលសាម៉ីខ្លួនបានតម្កល់ទុកនៅក្រសួង។
ករណីនេះ ក្រសួងព័ត៌មានប្រាប់ទៅប្រធានមន្ទីរព័ត៌មានទាំង២៥រាជធានី-ខេត្ត មិនអនុញ្ញាតឱ្យបន្តអាជ្ញាបណ្ណដល់អង្គភាពសារព័ត៌មានទាំង៣នោះទៀតឡើយ ។
វីអូឌី មិនអាចសុំការអត្ថាធិប្បាយពីអ្នកនាំពាក្យក្រសួងព័ត៌មាន លោក មាស សុភ័ណ្ឌ បានទេ នៅរសៀលថ្ងៃពុធនេះ ខណៈអ្នកនាំពាក្យមួយរូបទៀត លោក ផុស សុវណ្ណ បដិសេធអធិប្បាយ។
ចាងហ្វាងសារព័ត៌មានកម្ពុជារាល់ថ្ងៃ (www.cambodiatoday.news) លោក ទូច យុទ្ធា មានប្រសាសន៍ថា ការដែលក្រសួងមិនបន្តអាជ្ញាបណ្ណឱ្យអង្គភាពសារព័ត៌មានរបស់លោក ដោយសារតែកាលពីដើមខែកុម្ភៈ លោកបានផ្សព្វផ្សាយអត្ថបទមួយពាក់ព័ន្ធនឹងមន្ត្រីរាជការសំណូមពរទៅលោកនាយករដ្ឋមន្ត្រី ហ៊ុន សែន និងប្រធានអង្គភាពប្រឆាំងអំពើពុករលួយ ស៊ើបអង្កេតក្រុមហ៊ុន២នៅក្រសួងការងារ ដែលបានកិបកេងលុយរដ្ឋរាប់លានដុល្លារក្នុងមួយឆ្នាំៗ ពីគម្រោងដេញថ្លៃសម្ភារសម្រាប់យកទៅផ្គត់ផ្គង់នៅក្រសួងការងារ នាពេលកន្លងមកនេះ។
លោកយល់ថា ការសម្រេចរបស់ក្រសួងជាការបិទសិទ្ធិសេរីភាពនិងជាការបំភិតបំភ័យទៅលើអ្នកសារព័ត៌មាន ខណៈការផ្សព្វផ្សាយព័ត៌មានរបស់អង្គភាពលោកនាពេលកន្លងមក ធ្វើទៅតាមវិជ្ជាជីវៈ និងមានក្រមសីលធម៌។
លោកមានប្រសាសន៍ថា៖ «ខ្ញុំជាអ្នកការពារថវិកាជាតិ មិនមែនទៅបំផ្លាញ អ៊ីចឹងក្រសួងព័ត៌មានគួរតែលើកទឹកចិត្តខ្ញុំ មិនមែនទៅបំភិតបំភ័យ ឬក៏យកកិច្ចការងារដកអាជ្ញាបណ្ណ យកមកបន្លាច ឬក៏បំភិតបំភ័យខ្ញុំនោះទេ»។
ចាងហ្វាងអង្គភាពសារព័ត៌មាន Bayongtimes (www.bayongtimes.com) លោក តិល សាមុត និយាយថា កន្លងមក ស្ថាប័នគាត់តែងតែផ្សព្វផ្សាយព័ត៌មានដែលជារឿងរស៊ើបរបស់មន្ត្រីរដ្ឋាភិបាលមួយចំនួនដែលអសកម្មការងារ និងពាក់ព័ន្ធអំពើពុករលួយជាដើម ទើបនាំឱ្យមន្ត្រីទាំងនោះទាក់ទងទៅមន្ត្រីក្រសួងព័ត៌មានមិនឱ្យបន្តអាជ្ញាបណ្ណដល់អង្គភាពរបស់លោកបែបនេះ។
លោកមានប្រសាសន៍ថា៖ «ព័ត៌មានខ្ញុំផ្សាយសុទ្ធតែមានវិជ្ជាជីវៈទាំងអស់ ហើយរឿងនេះមិនមែនខុសនឹងវិជ្ជាជីវៈសារព័ត៌មានទេ រឿងនេះគឺជារឿងក្រុមមន្ត្រី ដែលគេតែងនិយាយតគ្នាថា ក្រុមមន្ត្រីដែលគេតែងតែនិយាយតគ្នាថា ក្រុមមន្ត្រីគ្រាប់ល្ពៅ មន្ត្រីខិលខូច មន្ត្រីអសកម្មការងារ គាត់ធ្វើខុស យើងចុះផ្សាយ។ អ្នកដែលខ្ញុំផ្សាយរឿងគាត់ហ្នឹង គាត់រត់ទៅក្រុមកាងឱ្យមកបុករុក ធ្វើទុក្ខបុកម្នេញដល់ពួកខ្ញុំដែលជាអ្នកសារព័ត៌មាន»។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា (CamboJa) លោក ណុប វី សង្កេតឃើញថា អង្គភាពសារព័ត៌មានទាំង៣ដែលក្រសួងសម្រេចមិនបន្តអាជ្ញាបណ្ណឱ្យទៀតនោះ ដោយសារតែពួកគេធ្វើការផ្សព្វផ្សាយព័ត៌មានភាគច្រើននិយាយពីចំណុចរសើបរបស់រដ្ឋាភិបាល និងមន្ត្រីពាក់ព័ន្ធ។
លោកចាត់ទុកករណីនេះថាជាការរឹតត្បិតសេរីភាពសារព័ត៌មាននិងប្រព័ន្ធផ្សព្វផ្សាយ រួមទាំងជាសារគំរាមកំហែងដល់ស្ថាប័នព័ត៌មានដែលមានវិជ្ជាជីវៈ លែងហ៊ានផ្សព្វផ្សាយព័ត៌មានរសើបរបស់រដ្ឋាភិបាលបន្តទៀត។
លោកមានប្រសាសន៍ថា៖ «ការបដិសេធ វាអាចជាការគំរាមកំហែងទៅដល់អ្នកសារព័ត៌មាន ឬក៏ស្ថាប័នសារព័ត៌មានផ្សេងទៀតថា បើសិនជាគាត់រាយការណ៍ព័ត៌មានប៉ះពាល់ [រដ្ឋាភិបាល ឬមន្ត្រី] ធ្ងន់ធ្ងរ គឺពួកគាត់អាចប្រឈមជាមួយក្រសួង ក្នុងការមិនបន្តអាជ្ញាបណ្ណដូចគ្នានេះអ៊ីចឹងដែរ»។
អង្គការអ្នកកាសែតគ្មានព្រំដែន កាលពីពេលថ្មីៗនេះ បានបន្តផ្ដល់ចំណាត់ថ្នាក់សេរីភាពសារព័ត៌មាននៅកម្ពុជា ឆ្នាំ២០២១ ស្ថិតនៅក្នុងរូបភាពអាក្រក់ដដែល ដោយនៅលេខរៀងទី១៤៤ ក្នុងចំណោម១៨០ប្រទេសនៅលើពិភពលោក។ សេរីភាពសារព័ត៌មានដែលអង្គការនេះ វាយតម្លៃ បង្ហាញថា កម្ពុជាបានធ្លាក់ចុះ៣ឆ្នាំជាប់ៗគ្នាចាប់តាំងពីឆ្នាំ២០១៧មក។
អង្គការដដែលនោះបន្តថា បើធៀបនឹងបណ្ដាប្រទេសក្នុងតំបន់ កម្រិតសេរីភាពសារព័ត៌មាននៅកម្ពុជាទាបជាងថៃ ម៉ាឡេស៊ី ឥណ្ឌូនេស៊ី ហ្វីលីពីន លើកលែងតែសិង្ហបុរី វៀតណាម ប៊្រុយណេ និងឡាវប៉ុណ្ណោះ៕
