របាយការណ៍ថ្មីមួយរបស់គណៈកម្មការទន្លេមេគង្គ បានអំពាវនាវឱ្យមាន «ការទូតទឹក» ជាបន្ទាន់ ដើម្បីគាំពារទន្លេធំជាងគេបំផុតរបស់អាស៊ីអាគ្នេយ៍ ខណៈទន្លេមេគង្គដែលទ្រទ្រង់អាយុជីវិតប្រជាជនរាប់លាននាក់ បានរងផលប៉ះពាល់ខ្លាំងពីគម្រោងហេដ្ឋារចនាសម្ព័ន្ធ និងការប្រែប្រួលអាកាសធាតុ។
នៅថ្ងៃទី១៥ ខែមីនា ម្សិលមិញ គណៈកម្មការទន្លេមេគង្គ (ហៅកាត់ថា MRC) រួមមាន ប្រទេសកម្ពុជា ឡាវ ថៃ និងវៀតណាម បានចេញផ្សាយនូវ “របាយការណ៍សមិទ្ធផល” របស់ខ្លួន សម្រាប់ផែនការយុទ្ធសាស្ត្រ MRC ឆ្នាំ២០១៦-២០២០។
សេចក្ដីប្រកាសព័ត៌មានរបស់ MRC បានលើកឡើងថា របាយការណ៍នេះគូសបញ្ជាក់ពីព្រឹត្តិការណ៍ថ្មីៗ ក្នុងកិច្ចសហប្រតិបត្តិការទន្លេមេគង្គ ដោយបានរំលេចបង្ហាញពីសមិទ្ធផលធំៗ វិធានការដែលបានអនុវត្ត និងសូចនាករសំខាន់ៗ ដែលជួយលើកកម្ពស់ការយល់ដឹងក្នុងតំបន់ទាំងមូល ពីរបៀបនៃការអភិវឌ្ឍ ទឹកជំនន់ និងគ្រោះរាំងស្ងួតដែលកាន់តែធ្ងន់ធ្ងរ បានជះឥទ្ធិពលលើអាងទន្លេមេគង្គក្រោម ទាំងវិជ្ជមាន និងអវិជ្ជមាន។
សកម្មភាពទាំងនេះបានជំរុញប្រទេសជាសមាជិក MRC អំពាវនាវឱ្យចាត់វិធានការបែបសម្របសម្រួល និងមិនធ្លាប់មានពីមុនមក រួមទាំងប្រតិបត្តិការជាមួយនឹងប្រទេសនៅផែ្នកខាងលើទន្លេទាំងពីរ គឺប្រទេសចិន និងមីយ៉ាន់ម៉ា។
សេចក្ដីប្រកាសព័ត៌មានរបស់ MRC បានគូសបញ្ជាក់ថា៖ «សព្វថ្ងៃនេះ ដោយសារទន្លេមេគង្គដែលទ្រទ្រង់អាយុជីវិតប្រជាជន បានរងផលប៉ះពាល់ខ្លាំងពីគម្រោងហេដ្ឋារចនាសម្ព័ន្ធ និងការប្រែប្រួលអាកាសធាតុ ដូច្នេះរបាយការណ៍ថ្មីមួយអំពាវនាវឱ្យមាន “ការទូតទឹក” ជាបន្ទាន់ ដើម្បីគាំពារទន្លេធំជាងគេបំផុតរបស់អាស៊ីអាគ្នេយ៍ និងលើកកម្ពស់ការអភិវឌ្ឍដោយចីរភាពសម្រាប់ប្រជាជនរាប់លាននាក់នៅទូទាំងតំបន់នេះ»។
លោក ប្រាវិត វង្សសូវុន (Prawit Wongsuwon) ឧបនាយករដ្ឋមន្ត្រីថៃ និងជាប្រធានគណៈកម្មាធិការជាតិទន្លេមេគង្គថៃ មានប្រសាសន៍នៅក្នុងសេចក្ដីប្រកាសព័ត៌មានថា បច្ចុប្បន្ន គ្រប់ភាគីពាក់ព័ន្ធត្រូវធ្វើការបន្ថែមទៀត ដើម្បីអនុវត្តយន្តការនិងគ្រប់គ្រងធនធានទឹកនានា។
លោក វង្សសូវុន បន្តថា៖ «នៅក្នុងអាងទន្លេមេគង្គក្រោម ផលប៉ះពាល់នៃការប្រែប្រួលអាកាសធាតុ បង្ហាញនូវផលវិបាកយ៉ាងខ្លាំងសម្រាប់សុខុមាលភាពសង្គម និងសេដ្ឋកិច្ចរបស់យើង ដែលវាតំណាងឱ្យបញ្ហាប្រឈមកំពុងកើតឡើងមួយសម្រាប់អ្នកតាក់តែងគោលនយោបាយ។ ការទូតទឹក កាន់តែមានសារៈសំខាន់ខ្លាំងឡើងក្នុងតំបន់របស់យើង ជាពិសេសទាក់ទិននឹងកំណើននៃចំនួនគម្រោងទំនប់វារីអគ្គិសនី និងហេដ្ឋារចនាសម្ព័ន្ធទឹកដទៃទៀត ព្រមទាំងសកម្មភាពអភិវឌ្ឍន៍នានា»។
បើតាមសេចក្ដីប្រកាសព័ត៌មានរបស់ MRC ដើម្បីសម្រេចឱ្យបាននូវគោលដៅនេះ MRC បានកែសម្រួលក្របខណ្ឌសូចនាកររបស់ខ្លួនសម្រាប់វិស័យទាំង៥ ក្នុងការគ្រប់គ្រងអាងទន្លេ រួមមាន បរិស្ថាន សង្គម សេដ្ឋកិច្ច ការប្រែប្រួលអាកាសធាតុ និងកិច្ចសហប្រតិបត្តិការ។
លោកបណ្ឌិត អាន ពេជ្រហត្ថដា ដែលជានាយកប្រតិបត្តិនៃលេខាធិការដ្ឋាន MRC នាពេលនោះ លើកឡើងថា៖ «យើងបានធានាភាពជាដៃគូជាមួយនឹងមជ្ឈមណ្ឌលទឹកស្ដីពីកិច្ចសហប្រតិបត្តិការឡានឆាងមេគង្គ និងធ្វើឱ្យប្រសើរឡើងនូវភាពជាដៃគូរបស់យើងជាមួយនឹងសមាគមប្រជាជាតិអាស៊ីអាគ្នេយ៍។ កិច្ចសហប្រតិបត្តិការបែបនេះបានផ្ដល់ជាប្រយោជន៍រួចមកហើយ។ កាលពីឆ្នាំមុន MRC និងអាស៊ាន បានរៀបចំសម្ភោធ “កិច្ចសន្ទនាស្ដីពីសន្តិសុខទឹក” ដើម្បីជំរុញឱ្យមានដំណោះស្រាយបែបនវានុវត្តន៍ ចំពោះបញ្ហាប្រឈមដែលកើតមានសម្រាប់សន្តិសុខទឹក»។
បើតាម MRC ទន្លេមេគង្គ ស្ថិតក្នុងចំណោមទន្លេធំជាងគេ និងមានជីវចម្រុះសម្បូរបែបបំផុតលើពិភពលោក។ អាងទន្លេដែលមានក្រឡាផ្ទៃ ៧៩៤ ០០០គីឡូម៉ែត្រការ៉េ គិតចាប់ពីខ្ពស់រាបទីបេ រហូតដល់ដែនដីសណ្តទន្លេមេគង្គ។ ទន្លេនេះមានប្រទេសប្រហែល៥ ០០០គីឡូម៉ែត្រ និងហូរកាត់ប្រទេសចំនួន៦ រួមមាន កម្ពុជា វៀតណាម ឡាវ ថៃ មីយ៉ាន់ម៉ា និងចិន។
អាងទន្លេមេគង្គក្រោម ដែលស្ថិតនៅប្រទេសកម្ពុជា ឡាវ ថៃ និងវៀតណាម គឺជាលំនៅឋានរបស់ប្រជាជនច្រើនជាង៦៥លាននាក់។ អាងទន្លេនេះផ្ដល់លទ្ធភាពសម្រាប់ការធ្វើពាណិជ្ជកម្ម ការដឹកជញ្ជូន សន្តិសុខស្បៀង និងការរកប្រាក់ចំណូល ហើយក៏ជាដែននេសាទទឹកសាបធំជាងគេបំផុតនៅលើពិភពលោកផងដែរ ដែលផ្ដល់ផលត្រី និងវារីសត្វដទៃទៀត ច្រើនជាង៤លានតោនក្នុងមួយឆ្នាំៗ៕
