ពលរដ្ឋជាច្រើនគ្រួសារនៅខណ្ឌឫស្សីកែវ រាជធានីភ្នំពេញ ស្វែងរកកិច្ចអន្តរាគមន៍ពីរដ្ឋសភា និងគណបក្សប្រជាជនកម្ពុជា ឱ្យជួយជំរុញអាជ្ញាធរពាក់ព័ន្ធចេញបណ្ណកម្មសិទ្ធិដីធ្លីជូនពួកគេ។
ការស្វែងរកកិច្ចអន្តរាគមន៍នេះបានធ្វើឡើងតាមរយៈការដាក់ញត្តិនៅស្ថាប័នទាំងពីរនេះ ពីសំណាក់ពលរដ្ឋប្រហែល២០នាក់ដែលអះអាងថាជាតំណាងពលរដ្ឋជាង២០០គ្រួសារ នៅភូមិឡកំបោរ សង្កាត់ស្វាយប៉ាក ខណ្ឌឫស្សីកែវ នៅថ្ងៃព្រហស្បតិ៍នេះ។
ពលរដ្ឋម្នាក់រស់នៅភូមិឡកំបោរ អ្នកស្រី ឡុង ប៉ុច ប្រាប់វីអូឌីថា អ្នកភូមិសម្រេចនាំគ្នាទៅរកកិច្ចអន្តរាគមន៍ពីរដ្ឋសភា និងគណបក្សប្រជាជនកម្ពុជា ឱ្យដោះស្រាយដីធ្លីនេះ ដោយសារអាជ្ញាធរមូលដ្ឋានថា ពួកគាត់រស់នៅលើដីរដ្ឋដោយខុសច្បាប់ ខណៈពួកគាត់បានចូលទៅរស់នៅនិងកាន់កាប់លើដីនោះជាង៣០ឆ្នាំមកហើយ។
អ្នកស្រី ឡុង ប៉ុច ឱ្យដឹងថា កាលពីឆ្នាំ២០០៧ អ្នកភូមិបានដាក់សំណើទៅសាលារាជធានីភ្នំពេញ និងស្ថាប័នពាក់ព័ន្ធផ្សេងទៀត ឱ្យចេញបណ្ណកម្មសិទ្ធិជូនពួកគេ ប៉ុន្តែរហូតមកដល់ពេលនេះពុំមានដំណោះស្រាយឡើយ ខណៈក្រុមហ៊ុនផ្ទះល្វែងនិងបុរីនៅជុំវិញនោះ អាជ្ញាធរចេញបណ្ណកម្មសិទ្ធិឱ្យបាន។
ពលរដ្ឋរូបនេះបន្តថា អាជ្ញាធរចាប់ផ្ដើមចោទអ្នកភូមិថារស់នៅលើដីរដ្ឋខុសច្បាប់កាលពីឆ្នាំ២០២០ ខណៈក្រុមហ៊ុនផ្ទះល្វែងនិងបុរីបានចូលទៅអភិវឌ្ឍនិងទិញដីពីប្រជាពលរដ្ឋកាលពីឆ្នាំ២០២០។
អ្នកស្រីបន្ថែមថា៖ «ក្រុមហ៊ុនបុរីដែលចូលមកអភិវឌ្ឍតំបន់ហ្នឹង គាត់បានទិញដីពីប្រជាពលរដ្ឋខ្ញុំធ្វើបុរីដែរ ប៉ុន្តែអាជ្ញាធរលូកដៃចូល ហើយឱ្យក្រុមហ៊ុនបុរីទាំងអស់ហ្នឹងផ្អាកទិញដីពីពួកខ្ញុំវិញ ហើយបានប្ដូរប្រធានបទទៅជាដោះដូរដីជូនឱ្យប្រជាពលរដ្ឋវិញ ដោយថា ប្រជាជនរស់នៅលើដីរដ្ឋខុសច្បាប់វិញ»។
ពលរដ្ឋម្នាក់ទៀត អ្នកស្រី ស៊ីវ លីណា ដែលមានដីទទឹង៥ម៉ែត្រ និងបណ្ដោយ២៥ម៉ែត្រ និយាយថា គ្រួសាររបស់គាត់បានចូលទៅរស់នៅតំបន់នោះតាំងពីឆ្នាំ១៩៨៨ ដោយបានសង់ផ្ទះនិងលក់ដូរនៅទីនោះរហូតមកដល់បច្ចុប្បន្ន។
ពលរដ្ឋរូបនេះបន្តថា ពេលជិតបោះឆ្នោះនាពេលកន្លង ខាងមន្ត្រីគណបក្សប្រជាជនកម្ពុជាដែលចុះឃោសនានៅក្នុងមូលដ្ឋាននោះ តែងតែបានសន្យាជំរុញឱ្យមានបណ្ណកម្មសិទ្ធិដីធ្លីសម្រាប់ពួកគាត់។
អ្នកស្រីបន្ថែមថា៖ «គណបក្សប្រជាជនកម្ពុជា បានសន្យាជាមួយពួកខ្ញុំច្រើនអាណត្តិហើយ ថាពេលដែលគាត់ជាប់ឆ្នោត គាត់នឹងចេញប្លង់កម្មសិទ្ធិជូនពួកខ្ញុំ ដូចជា ថ្នាក់សង្កាត់ ថ្នាក់ខណ្ឌ គាត់ជាប់ឆ្នោតរហូត។ ដល់ពេលគាត់បានជាប់ឆ្នោតហើយ គាត់បែរជាស្ងាត់ គាត់បែរជាចោទពួកខ្ញុំថារស់នៅខុសច្បាប់ទៅវិញ។ ខ្ញុំចង់ដឹងហេតុអីបានជាពួកគាត់សន្យាខ្យល់អ៊ីចឹង»។
អ្នកស្រី ស៊ីវ លីណា បន្ថែមថា ក្រុមហ៊ុនផ្ទះល្វែងនិងបុរីមានសិទ្ធិលុបបឹងនៅជុំវិញនោះ និងត្រូវបានអាជ្ញាធរចេញបណ្ណកម្មសិទ្ធិជូនថែមទៀត ខណៈពួកគាត់ជាង២០០គ្រួសារ រស់នៅតំបន់នោះជាង៣០ឆ្នាំ តែបែរត្រូវបានចោទប្រកាន់ថារស់នៅខុសច្បាប់ទៅវិញ។
វីអូឌី មិនអាចសុំការឆ្លើយតបពីអ្នកនាំពាក្យរដ្ឋសភា លោក ឡេង ប៉េងឡុង និងអ្នកនាំពាក្យគណបក្សប្រជាជនកម្ពុជា លោក សុខ ឥសាន បានទេ ពាក់ព័ន្ធករណីនេះ។
បើតាមអ្នកស្រី ស៊ីវ លីណា គឺមន្ត្រីរដ្ឋសភាមិនបានទទួលញត្តិពីពួកគាត់ទេ ក្រោយហេតុផលថាញតិ្តនោះធ្វើមិនត្រឹមត្រូវ ខណៈមន្ត្រីនៅទីស្នាក់ការគណបក្សប្រជាជនកម្ពុជាទទួលយក ប៉ុន្តែមិនបានសន្យាអ្វីឡើយ។
អភិបាលខណ្ឌឫស្សីកែវ លោក ឯក ឃុនឌឿន មានប្រសាសន៍យ៉ាងខ្លីថា ពលរដ្ឋទាំងនោះរស់នៅលើផ្លូវសាធារណៈ។ លោកថា អាជ្ញាធរបានសម្របសម្រួលដោះស្រាយជាមួយពលរដ្ឋទាំងនោះជាច្រើនដងហើយ ប៉ុន្តែពួកគេមិនព្រមទទួលយកដំណោះស្រាយ។
លោកបន្ថែមថា៖ «ពួកគាត់រស់នៅលើផ្លូវអូរកំបុត ជាផ្លូវសាធារណៈ ឱ្យយើងចេញបណ្ណកម្មសិទ្ធិឱ្យយ៉ាងម៉េច? យើងព្យាយាមដោះស្រាយជាមួយគាត់ជាច្រើនដងហើយ តែពួកគាត់មិនព្រម»។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា បើអាជ្ញាធរមានឆន្ទៈដោះស្រាយជូនពលរដ្ឋ គួរតែចេញបណ្ណកម្មសិទ្ធិជូនពលរដ្ឋ ព្រោះថា អាជ្ញាធរបានបណ្ដែតបណ្ដោយឱ្យពួកគេរស់នៅលើដីជម្លោះនោះជាង៣០ឆ្នាំទៅហើយ។
មន្ត្រីសិទ្ធិមនុស្សរូបនេះបន្តថា ប្រសិនបើអាជ្ញាធរមិនដោះស្រាយឱ្យបានសមរម្យ និងបណ្ដេញពលរដ្ឋចេញទាំងបង្ខំ នឹងធ្វើឱ្យប៉ះពាល់ដល់សិទ្ធិរបស់ប្រជាពលរដ្ឋក្នុងការទទួលលំនៅឋានសមរម្យដែលធានាដោយច្បាប់ជាតិនិងអន្តរជាតិ។
លោកបន្ថែមថា៖ «គឺវាមានការរំលោភទៅលើបទដ្ឋានសិទ្ធិមនុស្សអន្តរជាតិ ដែលរដ្ឋាភិបាលកម្ពុជាបានផ្ដល់សច្ចាប័ន។ យើងមើលឃើញថា ជម្លោះដីធ្លីនៅកម្ពុជាបច្ចុប្បន្នបានរំលោភច្បាប់អន្តរជាតិដោយកម្រោល ដោយបំពាន រំលោភទាំងច្បាប់ក្នុងស្រុកទៀត ដូចជា រដ្ឋធម្មនុញ្ញជាដើម ដែលបានចែងពីសិទ្ធិមានលំនៅឋានសមរម្យ សិទ្ធិដីធ្លី និងស្ថាប័នរដ្ឋ ត្រូវគិតពីសុវត្ថិភាពរបស់ពលរដ្ឋ ជាដើម»៕