សកម្មជននិងសាច់ញាតិគណបក្សសង្រ្គោះជាតិដែលត្រូវបានតុលាការរំលាយ បានសម្ដែងការខកចិត្តនៅពេលសវនាការសួរដេញដោល និងបង្ហាញភស្តុតាងដាក់បន្ទុកលើពួកគេ នៅថ្ងៃនេះ ដោយថា តុលាការមិនមានភស្តុតាងគ្រប់គ្រាន់សម្រាប់ដាក់បន្ទុកលើពួកគេនោះទេ។
កញ្ញា សេង ធារី ថ្លែងប្រាប់អ្នកសារព័ត៌មានបន្ទាប់ពីចេញពីបន្ទប់សវនាការ នាព្រឹកថ្ងៃចន្ទនេះថា នៅក្នុងបន្ទប់សវនាការ មន្ត្រីនគរបាលយុត្តិធម៌ និងតំណាងអយ្យការ បានដកស្រង់អត្ថបទនិងរូបថតនៅលើទំព័រហ្វេសប៊ុករបស់គាត់សរុបចំនួន៩ឯកសារ ដើម្បីយកមកចោទប្រកាន់លើកញ្ញា និងសកម្មជន៣នាក់ទៀត រួមមាន លោក ហេង ច័ន្ទសិទ្ធី, ទុំ ប៊ុនថន និងលោក កាក់ កុម្ភារ ពាក់ព័ន្ធនឹងបទចោទ «ញុះញង់ និងរួមគំនិតក្បត់» ជុំវិញដំណើរការវិលត្រលប់របស់លោក សម រង្ស៊ី ក្នុងព្រឹត្តិការណ៍ ៩ វិច្ឆិកា។
ករណីនេះ កញ្ញា សេង ធារី ចាត់ទុកតុលាការយកភស្តុតាងបង្ហាញដាក់បន្ទុកលើរូបគាត់ថា ជារឿងអស់សំណើច។
កញ្ញាមានប្រសាសន៍ថា៖ «មកពីរឿងហ្នឹងជារឿងបាយឡុកបាយឡ ធ្វើឱ្យពួកយើងអស់សំណើច គាត់អត់អាចឆ្លើយ គាត់ជំរុញទៅគ្នាគាត់ ហើយនៅពេលឱ្យទៅចង្អុលទៅច្បាប់ណាមួយ គាត់ថា គាត់ជាសមត្ថកិច្ចមើលការខុសត្រូវផ្នែកច្បាប់ ប៉ុន្តែអត់មានមាត្រាច្បាប់ណាដែលគាត់ចង្អុលបង្ហាញទៅបាន។ វាជាការលេងសើចជាមួយជីវិតរបស់ប្រជាពលរដ្ឋ»។
អ្នកស្រី ព្រុំ ចាន់ថា ដែលអះអាងថាជាភរិយារបស់សកម្មជនបក្សប្រឆាំង លោក កាក់ កុម្ភារ បានថ្លែងប្រាប់អ្នកសារព័ត៌មានថា នៅក្នុងបន្ទប់សវនាការសួរដេញដោលពេញមួយព្រឹកនេះ អ្នកស្រីសង្កេតឃើញថា តុលាការហាក់មិនមានភស្តុតាងគ្រប់គ្រាន់ក្នុងការដាក់បន្ទុកលើសកម្មជនគណបក្សសង្គ្រោះជាតិដែលត្រូវបានគេរំលាយនោះទេ។
ផ្ទុយទៅវិញ អ្នកស្រីបញ្ជាក់ថា តុលាការចោទប្រកាន់លើស្វាមីរបស់អ្នកស្រី និងសកម្មជនផ្សេងៗទៀត កន្លងមក ពាក់ព័ន្ធនឹងបទចោទ «ញុះញង់ និងរួមគំនិតក្បត់» គឺជាការចោទប្រកាន់ផ្នែកនយោបាយតែប៉ុណ្ណោះ។
អ្នកស្រីមានប្រសាសន៍ថា៖ «បើសិនជាសម្ដេច ហ៊ុន សែន គាត់បញ្ជាថា ឱ្យតុលាការដោះលែង គាត់នឹងដោះលែង ហើយបើសម្ដេចថា មិនអាចដោះលែង ស្ថានភាពនយោបាយនៅតានតឹង គឺអត់ទេ។ អានេះជារឿងនយោបាយ មិនមែនជារឿងសាលដីកាតុលាការទេ រឿងនយោបាយត្រូវដោះស្រាយតាមប្រព័ន្ធនយោបាយ មិនមែនយកពួកគាត់មកដាក់គុកទាំងអស់ កំហុសសុទ្ធ ហើយឱ្យតុលាការមកដោះស្រាយ មិនមែនទេ»។
លោក ជូង ជូងី មេធាវីការពារក្ដីកញ្ញា សេង ធារី មានប្រសាសន៍ថា ភស្តុតាងរបស់អយ្យការ និងមន្ត្រីនគរបាលយុត្តិធម៌ ដែលយកមកបង្ហាញនៅតុលាការដើម្បីដាក់បន្ទុកកូនក្ដីរបស់លោកនោះ មិនទាន់មានទម្ងន់គ្រប់ជ្រុងជ្រោយសម្រាប់ចោទប្រកាន់លើកូនក្ដីរបស់លោកឡើយ។
លោក ជូងី បញ្ជាក់ថា នៅក្នុងដំណើររឿងនេះ លោកនឹងព្យាយាមការពារកូនក្ដីតាមនីតិវិធីច្បាប់ ដើម្បីការពារប្រយោជន៍កូនក្ដីឱ្យរួចផុតពីការចោទប្រកាន់ផងដែរ។
លោកមានប្រសាសន៍ថា៖ «ការដាក់បន្ទុកជាបន្ទុករបស់មន្ត្រីនគរបាលយុត្តិធម៌ និងតំណាងអយ្យការ ហើយខ្ញុំកំពុងតែដេញដោល ដើម្បីដោះបន្ទុក។ ចំណែកមន្ត្រីនគរបាលយុត្តិធម៌ និងព្រះរាជអាជ្ញា កំពុងតែដេញដោលសម្រាប់ដាក់បន្ទុក»។
លោកបន្ថែមថា៖ «ខ្ញុំប្រើបច្ចេកទេសឱ្យអស់ពីចំណេះដឹងសមត្ថភាពខ្ញុំដែលមាន ដើម្បីការពារកូនក្ដីខ្ញុំទៅតាមផ្លូវច្បាប់»។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ មានប្រសាសន៍យ៉ាងខ្លីថា សំណុំរឿងសកម្មជនគណបក្សសង្គ្រោះជាតិ ដែលតុលាការបើកសវនាការបន្តនៅថ្ងៃចន្ទនេះ ស្ថិតនៅដំណាក់ការជំនុំជម្រះនៅឡើយ ដោយលោកសុំមិនបកស្រាយទេ។
លោកឆ្លើយយ៉ាងខ្លីថា៖ «សំណុំរឿងនេះនៅដំណាក់កាលជំនុំជម្រះ គឺជំនុំជម្រះ គឺជាការបង្ហាញនូវភស្តុតាងរបស់ភាគី ហើយការសម្រេចយ៉ាណា ក្រុមប្រឹក្សាជំនុំជម្រះជាអ្នកសម្រេច។ អ៊ីចឹងនៅក្នុងដំណាក់កាលនេះ យើងមិនអាចឆ្លើយយ៉ាងណានោះទេ»។
ក្រោយសវនាការសួរដេញដោលពេញមួយព្រឹក ប្រធានក្រុមប្រឹក្សាជំនុំជម្រះ លោក រស់ ពិសិដ្ឋ បានសម្រេចផ្អាក ហើយប្រកាសបន្តសវនាការនៅព្រឹកថ្ងៃទី២៨ ខែមីនា ខាងមុខបន្តទៀត។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត បានចាត់ទុកការអូសបន្លាយពេលសួរដេញដោលលើសកម្មជនបក្សប្រឆាំងទាំងនោះថា ដោយសាររឿងនេះពាក់ព័ន្ធនឹងរឿងនយោបាយ។
លោកបញ្ជាក់ថា បើសំណុំរឿងនេះនៅតែបន្តអូសបន្លាយ នឹងធ្វើឱ្យរងការរិះគន់ជាបន្តបន្ទាប់ ខណៈការបោះឆ្នោតខិតជិតចូលមកដល់ ហើយដំណោះស្រាយនៅមិនទាន់បញ្ចប់នៅឡើយ។
លោកមានប្រសាសន៍ថា៖ «កាលណាសវនាការកាន់តែអូសបន្លាយយូរទៅ កាន់រិះគន់នៅតែបន្ត ជាពិសេសការបោះឆ្នោតក្រុមប្រឹក្សាឃុំ-សង្កាត់ក៏ជិតមកដល់ ហើយការបោះឆ្នោតជាតិក៏ជិតមកដល់ សំណុំរឿងរបស់អតីតគណបក្សប្រឆាំងក៏មិនទាន់ត្រូវបានបញ្ចប់នៅឡើយ។ វាអាចទទួលការរិះគន់បន្ថែមទៀតទៅលើដំណើរការនៃសវនាការទាំងអស់ហ្នឹង ដែលអូសបន្លាយពេលវេលាកាន់តែវែងឆ្ងាយនោះ»។
លោកយល់ថា ប្រសិនបើមានដំណោះស្រាយផ្នែកនយោបាយ ឬការចរចាផ្នែកនយោបាយកើតឡើង នោះសំណុំរឿងទាំងនេះអាចនឹងងាយបញ្ចប់ផងដែរ។
ក្នុងសំណុំរឿង «ញុះញង់ និងរួមគំនិតក្បត់» ដែលសាលាដំបូងរាជធានីភ្នំពេញបើកសវនាការនាថ្ងៃទី១ ខែមីនានេះ មានជនជាប់ចោទជាង៤០នាក់ ហើយក្នុងចំណោមជនជាប់ចោទទាំងនោះ គឺមាន៣នាក់កំពុងជាប់ពន្ធនាគារ៕
