សាលាដំបូងខេត្តកោះកុង នឹងបន្តសួរដេញដោលតំណាងអ្នកមានជម្លោះដីធ្លីចំនួន១០រូប តាមបណ្ដឹងចោទប្រកាន់របស់ប្រធានក្រុមហ៊ុន ឧកញ៉ា ហេង ហ៊ុយ នៅខែក្រោយ ជុំវិញបទចោទ «បរិហារកេរ្តិ៍ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
តាមដីកាកោះចុះថ្ងៃទី១៧ ខែមីនា ឆ្នាំ២០២២ តំណាងអយ្យការអមសាលាដំបូងខេត្តកោះកុង លោក វ៉ៃ ភីរម្យ តម្រូវឱ្យមេធាវីការពារក្ដី និងតំណាងពលរដ្ឋទាំងនោះ ចូលបំភ្លឺនៅថ្ងៃទី២៤ ខែមេសា ដើម្បីទាញយកចម្លើយ តាមបណ្ដឹងចោទប្រកាន់របស់ក្រុមហ៊ុនឧកញ៉ា ហេង ហ៊ុយ។
អ្នកស្រី ដេត ហួរ ដែលអះអាងថាជាតំណាងពលរដ្ឋ១៩៧គ្រួសារ និងមានឈ្មោះក្នុងដីកាកោះនោះដែរ បានឱ្យដឹងនៅថ្ងៃពុធនេះថា ការប្ដឹងចោទប្រកាន់ពួកគាត់នេះជារឿងអយុត្តិធម៌ និងថាជាការគំរាមហែងដើម្បីកុំឱ្យពួកគាត់ហ៊ានចេញតវ៉ា។
ស្ត្រីរូបនេះបញ្ជាក់ថា បើទោះជាយ៉ាងនេះក្ដី ពួកគាត់មិនបោះបង់ការតវ៉ាទាមទារដីធ្លីពីក្រុមហ៊ុន ហេង ហ៊ុយ នេះឡើយ ហើយថាពួកគាត់នឹងចូលទៅបំភ្លឺតាមដីកាកោះ ដោយសម្អាងថា ពួកគាត់មិនបានធ្វើអ្វីខុសដូចការចោទប្រកាន់។
អ្នកស្រីថា៖ «ពួកយើងមិនភ័យក្លាចទេ ពួកយើងនៅតែបន្តតវ៉ាទៀត ព្រោះពួកគាត់បាត់បង់ដីធ្លីដោយសារលោក ហេង ហ៊ុយ រំលោភមែន។ ហើយវាអយុត្តិធម៌ណាស់ គេយកដីយើងហើយ គេប្ដឹងយើងទៅតុលាការទៀត។ សួរថា វាយុត្តិធម៌ទេសម្រាប់ខ្ញុំជាពលរដ្ឋក្រីក្រ?»
បើតាមដីកាដដែល តំណាងពលរដ្ឋដែលត្រូវចូលទៅឆ្លើយបំភ្លឺ រួមមាន អ្នកស្រី អិប តឹង, អ្នកស្រី ដេត ហួរ, អ្នកស្រី កើត នៅ, អ្នកស្រី អ៊ិន ធូ, លោក គង់ មែន, លោក ពូ ហួន, លោក សុខ ជ័យ, លោក ហេង ជ័យ, អ្នកស្រី អើប វី និងលោក ឆាន ឈឿន។
ពួកគេទាំងនោះកំពុងមានជម្លោះដីធ្លីជាមួយក្រុមហ៊ុន ហេង ហ៊ុយ អភិវឌ្ឍន៍ (Heng Huy Development Co., Ltd) ស្ថិតក្នុងស្រុកស្រែអំបិល នឹងចូលសវនាការលើកទី២ នៅពាក់កណ្ដាលខែក្រោយនេះ ទៅតាមបណ្ដឹងរបស់ម្ចាស់ក្រុមហ៊ុន។
កាលពីថ្ងៃទី២៤ ខែវិច្ឆិកា ឆ្នាំ២០២១ តុលាការខេត្តនេះបានបើកសវនាការលើសំណុំរឿងនេះម្ដងហើយ ប៉ុន្តែតុលាការមិនទាន់សម្រេចយ៉ាងណាទេ។
បើតាមពលរដ្ឋ ជម្លោះនេះបានកើតឡើងតាំងពីពាក់កណ្ដាលឆ្នាំ២០១៩មកជាបន្តបន្ទាប់ ពួកគេ១៩៧គ្រួសារបានឡើងមកតវ៉ានៅរាជធានីភ្នំពេញ ដើម្បីរកអន្តរាគមន៍ពីក្រសួងរៀបចំដែនដី ជួយដោះស្រាយវិវាទដីធ្លីរបស់ពួកគាត់ ដោយអះអាងថា ក្រុមហ៊ុន ហេង ហ៊ុយ បានរំលោភយកតាំងពីឆ្នាំ២០០៧។
ប៉ុន្តែថា ការតវ៉ានេះត្រូវបានក្រសួងរៀបចំដែនដី បដិសេធដោះស្រាយ។ បន្ថែមពីនេះ ពួកគេមួយចំនួនត្រូវរងការចោទថាបានញុះញង់ឱ្យពលរដ្ឋ១៩៧គ្រួសារនោះទៅវិញ។
មន្ត្រីសម្របសម្រួលសហគមន៍នៅសមាគមសម្ព័ន្ធសហគមន៍កសិករកម្ពុជាប្រចាំខេត្តកោះកុង និងកំពង់ស្ពឺ លោក ញ៉ិល ភាព ដែលឃ្លាំមើលករណីជម្លោះដីធ្លីរបស់ពលរដ្ឋ បានលើកឡើងថា បច្ចុប្បន្ននេះ អ្នកមានលុយមានអំណាច និងអាជ្ញាធរ តែងតែប្រើប្រព័ន្ធតុលាការ ដើម្បីប្រឆាំងពលរដ្ឋមានជម្លោះដីធ្លី ដោយពេញនិយមប្រើប្រាស់បទចោទ «បរិហារកេរិ៍្តជាសាធារណៈ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
មន្ត្រីសង្គមស៊ីវិលរូបនេះចាត់ទុកការប្រើប្រាស់ប្រព័ន្ធតុលាការប្រឆាំងពលរដ្ឋនេះថា ជាការបំបិទសិទ្ធសេរីភាពនៃការបញ្ចេញមតិ ការជួបប្រជុំរបស់ពលរដ្ឋ ដែលធានាដោយច្បាប់ជាតិនិងច្បាប់អន្តរជាតិ។
