រដ្ឋាភិបាលអាមេរិកផ្ដល់មូលនិធិគាំទ្រនូវទឹកប្រាក់ចំនួន២៥លានដុល្លារ សម្រាប់បង្កើនបទពិសោធន៍អំណាននិងការសិក្សារបស់សិស្សនៅកម្រិតបឋមសិក្សានៅកម្ពុជា។
យោងតាមសេចក្ដីប្រកាសព័ត៌មានរបស់ទីភ្នាក់ងារជំនួយអាមេរិក USAID នៅថ្ងៃពុធនេះ បានលើកឡើងថា គម្រោងអប់រំបរិយាបន្ននៅបឋមសិក្សា(IPEA) នឹងជួយបង្កើនដល់សមិទ្ធផលមុនៗរបស់ USAID គាំទ្រលើអំណានកម្រិតថ្នាក់ដំបូង ដែលគេស្គាល់ថាជា «គម្រោងគាំទ្រអំណានភាសាខ្មែរកម្រិតថ្នាក់ដំបូង»។ គម្រោងនេះនឹងធ្វើការរួមគ្នាជាមួយដៃគូពាក់ព័ន្ធក្នុងវិស័យអប់រំនៅទូទាំងប្រទេសកម្ពុជា ដើម្បីបង្កើនបំណិនអក្ខរកម្មមូលដ្ឋានរបស់កុមារ តាមរយៈកម្មវិធី «កុមាររៀន កុមារចេះ» នៃក្រសួងអប់រំ យុវជន និងកីឡា។
ឯកអគ្គរដ្ឋទូតអាមេរិកប្រចាំនៅកម្ពុជា លោក W. Patrick Murphy ត្រូវបានស្រង់ប្រសាសន៍ក្នុងពិធីដាក់ឱ្យអនុវត្តជាផ្លូវការនូវកម្មវិធីអប់រំថ្មីនេះ មកផ្សព្វផ្សាយក្នុងសេចក្ដីប្រកាសព័ត៌មានថា៖ «កុមារនៅថ្ងៃនេះ គឺជាអ្នកដឹកនាំនៅថ្ងៃអនាគត ហើយយើងមានមោទកភាពក្នុងការគាំទ្រដល់កុមារកម្ពុជាតាមរយៈឧបករណ៍សិក្សា ដែលនឹងជួយកុមារឱ្យពូកែឆ្នើមក្នុងពិភពលោក ដែលកាន់តែសម្បូរបែបនិងមានប្រទាក់ក្រឡាគ្នាយ៉ាងស្មុគស្មាញនេះ»។
លោកបន្ថែមថា៖ «យើងមានទំនុកចិត្តថា កិច្ចសហការរបស់យើងលើកម្មវិធី “កុមាររៀនកុមារចេះ” នឹងផ្ដល់អត្ថប្រយោជន៍យ៉ាងទូលំទូលាយដល់សិស្សានុសិស្ស ក៏ដូចជាដល់ព្រះរាជាណាចក្រកម្ពុជាទាំងមូលផងដែរ»។
រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន សង្ឃឹមថា ក្នុងរយៈពេល៥ឆ្នាំទៅមុខទៀត គម្រោងនេះនឹងបន្តការជំរុញនិងលើកកម្ពស់ការសិក្សានៅកម្រិតថ្នាក់ដំបូងឱ្យមានការផ្លាស់ប្ដូរជាវិជ្ជមាន និងបន្តការសម្របសម្រួលនៅក្នុងវិស័យទាំងមូលឱ្យរឹតតែមានប្រសិទ្ធភាព តាមរយៈការពង្រឹងការអនុវត្តកម្មវិធី “កុមាររៀនកុមារចេះ” នៅទូទាំងប្រទេស ជាមួយនឹងការអនុវត្តកម្មវិធីគាំទ្រថ្នាក់អប់រំបរិយាបន្ននេះផងដែរ។
ដោយមានការគាំទ្រពីភ្នាក់ងារជំនួយអាមេរិក USAID កម្មវិធីអំណានបានជួយដល់សិស្សប្រមាណ២០០ ០០០នាក់ ប្រមាណជា ៣២% នៃសិស្សសាលាបឋមសិក្សារដ្ឋទូទាំងប្រទេសកម្ពុជា។ លើសពីនេះទៀត ដៃគូពាក់ព័ន្ធក្នុងវិស័យអប់រំនៅកម្ពុជាបានធ្វើការរួមគ្នាឆ្លើយតបទៅនឹងជំងឺកូវីដ-១៩ តាមរយៈការចែកសម្ភារសិក្សាតាមផ្ទះដល់សិស្សានុសិស្ស និងមាតាបិតាសិស្សថ្នាក់ទី១ និងទី២ នៅទូទាំងប្រទេស ក្នុងអំឡុងពេលបិទសាលារៀនកាលពីឆ្នាំកន្លងទៅផងដែរ។
បើតាម USAID រហូតមកដល់បច្ចុប្បន្ននេះ គ្រូបង្រៀនប្រមាណ៦ ៥០០នាក់ ទទួលបានការបណ្ដុះបណ្ដាលលើការប្រើប្រាស់សម្ភារអំណានថ្នាក់ទី១ និងទី២ រួមជាមួយនឹងមត្តេយ្យកម្រិតខ្ពស់ ដែលជាផ្នែកមួយនៃភាពជាដៃគូរវាងក្រសួងអប់រំ យុវជន និងកីឡា ទីភ្នាក់ងារជំនួយអាមេរិក (USAID) និងភាពជាដៃគូសកលសម្រាប់ការអប់រំ (GPE)។ គ្រូបង្រៀនដែលបានទទួលការបណ្ដុះបណ្ដាល បានអនុវត្តកម្មវិធីអក្ខរកម្មភាសាខ្មែរ និងវិធីសាស្រ្តបង្រៀនថ្មី ក្រោមកិច្ចគាំទ្រពីគ្រូបង្វឹកអំណានដែលមានជំនាញក្នុងខេត្តចំនួន៨។
គម្រោងអប់រំបរិយាបន្ននៅបឋមសិក្សា (IPEA) នឹងបង្កើនលើភាពជោគជ័យថ្មីៗនេះតាមរយៈការពង្រីកការអនុវត្តទៅខេត្តថ្មីបន្ថែមទៀត ដោយសហការជាមួយក្រសួងអប់រំ យុវជន និងកីឡា និងដៃគូនានា ដើម្បីឈានទៅកាន់ការអនុវត្តទូទាំងប្រទេស។ ទន្ទឹមនឹងការសហការដោយផ្ទាល់ជាមួយអង្គការដៃគូពាក់ព័ន្ធក្នុងការគាំទ្រដល់សាលាអប់រំពិសេស គម្រោងអប់រំបរិយាបន្នថ្នាក់បឋមសិក្សា (IPEA) នឹងគាំទ្រដល់គ្រូបង្រៀនដែលកំពុងបង្រៀនកុមារគថ្លង់ ឬមានកម្សោយការស្ដាប់៕