អាជ្ញាធររាជធានីភ្នំពេញ ចោទក្រុមកូដករណាហ្គាវើលដ៍ថាបានប្រើអំពើហិង្សានិងជេរប្រមាទមកលើសមត្ថកិច្ច ខណៈវិវាទការងាររវាងកូដករនិងក្រុមហ៊ុនកាស៊ីណូណាហ្គាវើលដ៍មិនទាន់រកដំណោះស្រាយបាននៅឡើយ។
អ្នកនាំពាក្យរដ្ឋបាលរាជធានីភ្នំពេញ បានចេញសេចក្ដីប្រកាសព័ត៌មានកាលពីល្ងាចថ្ងៃពុធម្សិលមិញថា កន្លងមក អាជ្ញាធរបានណែនាំដល់កូដករណាហ្គាវើលដ៍ឱ្យបញ្ឈប់សកម្មភាពតវ៉ានៅទីសាធារណៈ និងប្រាប់ឱ្យទៅទីលានប្រជាធិបតេយ្យ បើពួកគេចង់សម្ដែងមតិ ប៉ុន្តែកូដករទាំងនោះនៅបន្តសន្សំចិត្តទៅប្រមូលផ្ដុំធ្វើកូដកម្មខុសច្បាប់នៅតាមទីសាធារណៈដដែល។
សេចក្ដីប្រកាសព័ត៌មានដដែល បន្តថា ខ្លួនមានការខកចិត្ត ខណៈបានអប់រំជាច្រើនលើកច្រើនសាលើក្រុមអ្នកតវ៉ា ដើម្បីផ្ដល់ឱកាសឱ្យពួកគេពិចារណានិងភ្ញាក់រឭក ប៉ុន្តែពួកគេទាំងនោះកាន់តែបន្តធ្វើសកម្មភាពខុសច្បាប់ជាបន្តបន្ទាប់ទៀត រហូតដល់បង្កើតឈុតឆាកសម្ដែងក្រោមរូបភាពផ្សេងៗដើម្បីកេងចំណេញ។
ប្រភពដដែលបន្តថា សមត្ថកិច្ចបានអញ្ជើញក្រុមកូដករដែលតវ៉ានៅទីសាធារណៈឱ្យឡើងរថយន្តទៅសម្ដែងមតិនៅទីលានប្រជាធិបតេយ្យ តែពួកគេបែរជាចោទប្រកាន់អាជ្ញាធរថាប្រើអំពើហិង្សាលើពួកគេទៅវិញ។ អាជ្ញាធរអះអាងថា ជាក់ស្ដែង ក្រុមកូដករទៅវិញទេដែលបានបន្តប្រមូលផ្ដុំ ប្រើពាក្យពេចន៍អសុរោះ អាកប្បកិរិយា និងកាយវិការមិនសមរម្យដាក់អាជ្ញាធរ ដើម្បីបញ្ឆេះកំហឹង និងត្រៀមចាំផ្ដិតយករូបភាពផ្សេងៗទុកធ្វើការចោទប្រកាន់មកលើអាជ្ញាធរ។
អ្នកនាំពាក្យរដ្ឋបាលរាជធានីភ្នំពេញថា៖ «ថ្ងៃនេះ ក្រុមបាតុករខ្លួនឯងបានភ្លេចខ្លួនពីការខិតខំសម្ដែងជាជនរងគ្រោះ ទាក់ទាញចំណាប់អារម្មណ៍ និងការអាណិតអាសូរ បែរជាធ្វើសកម្មភាពដោយបានជេរប្រមាថតិះដៀល ប្រើកាយវិការអសីលធម៌ជាទីបំផុត ដែលមិនស័ក្តិសមជានារីខ្មែរ រហូតឈានដល់ប្រើអំពើហិង្សាបង្ករបួសស្នាមមកលើអាជ្ញាធរមានសមត្ថកិច្ច»។
សកម្មជនសហជីព និងជាកូដករណាហ្គាវើលដ៍ កញ្ញា ជឹម រដ្ឋា ច្រានចោលការចោទប្រកាន់នេះ ដោយថា សមត្ថកិច្ចចម្រុះទៅវិញទេដែលជាអ្នកប្រើហិង្សា ពាក្យសម្ដីអសុរោះ និងបៀតបៀនកេរ្តិ៍ខ្មាសក្រុមកូដករ ហើយថែមទាំងចេញលិខិតចោទកូដករជាអ្នកបញ្ឆេះកំហឹងនិងប្រើហិង្សាលើសមត្ថកិច្ចទៅវិញ។
កញ្ញាទាមទារឱ្យសមត្ថកិច្ចទាំងនោះដកខ្លួន បញ្ឈប់នូវការរារាំង និងឈប់ប្រើអំពើហិង្សាលើកូដករតទៅទៀត ជាពិសេសកុំចេញមុខកាងជំនួសក្រុមហ៊ុន ខណៈក្រុមហ៊ុនល្បែងមួយនេះកំពុងរំលោភសិទ្ធិការងារកម្មករខ្មែរ ហើយមិនមានឆន្ទៈចេញមុខដោះស្រាយ។
កញ្ញា ជឹម រដ្ឋា និយាយថា៖ «ហេតុអីបានគាត់ត្រូវប្រើអំពើហិង្សា ទាត់ធាក់ វាយដំ និងបង្ខំឱ្យពួកខ្ញុំឡើងឡានទៅទីលានប្រជាធិបតេយ្យ ពីព្រោះពួកខ្ញុំដែលជាកូដករ ពួកខ្ញុំធ្វើកូដកម្មដោយស្របច្បាប់និងអហិង្សាជាមួយនឹងក្រុមហ៊ុនឯកជន ថៅកែក្រុមហ៊ុនណាហ្គាវើលដ៍ អ៊ីចឹងកន្លែងដែលពួកខ្ញុំត្រូវឈរធ្វើកូដកម្ម គឺនៅប្របរបងរបស់ក្រុមហ៊ុន អានេះបើតាមច្បាប់ចែងស្ដីពីច្បាប់ធ្វើកូដកម្ម»។
អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ ថ្លែងថា ពុំមែនជារឿងចម្លែកនោះទេ ដែលអាជ្ញាធរចោទប្រកាន់កូដករថាបង្កអសន្តិសុខសង្គមនិងប្រើហិង្សាលើសមត្ថកិច្ចនេះ ខណៈកន្លងមកក៏មានការចោទប្រកាន់ដូចគ្នានេះដែរ។
លោកថា៖ «កន្លងមកហ្នឹង គឺទម្រង់[សកម្មភាព]របស់ខាងអាជ្ញាធរនេះ គឺជាទម្រង់ហិង្សារួចហើយ ដូចជា ប្រើប្រាស់នូវការចាប់បង្ខំ រុញច្រាន ហើយមានការបៀតបៀនទៅលើកម្មករនិយោជិតដែលជាស្ត្រីហ្នឹង អ៊ីចឹងជាក់ស្ដែងណាស់ អាហ្នឹងវាពិបាកនៅក្នុងការបដិសេធណាស់»។
មន្ត្រីសង្គមស៊ីវិលរូបនេះទទូចឱ្យអាជ្ញាធរប្រើប្រាស់វិជ្ជាជីវៈជាស្ថាប័នអនុវត្តច្បាប់និងថែរក្សាសណ្ដាប់ធ្នាប់ ជួយសម្រួលឱ្យកម្មករធ្វើកូដកម្មដោយសន្តិវិធី ដើម្បីឱ្យពួកគេទទួលបានដំណោះស្រាយសមរម្យពីក្រុមហ៊ុន បន្ទាប់ពីវិវាទការងារបានអូសបន្លាយជាច្រើនខែមកហើយ។ លោកក៏ចង់ឃើញស្ថាប័នពាក់ព័ន្ធបញ្ឈប់នូវការធ្វើទុក្ខបុកម្នេញ សកម្មភាពអសីលធម៌ បញ្ឈប់នូវទម្រង់នៃអំពើហិង្សាលើក្រុមកូដករ និងចេញមុខធ្វើយ៉ាងណាជំរុញឱ្យក្រុមហ៊ុននិងកូដករអាចឈានដល់ការបញ្ចប់វិវាទដោយតម្លាភាព។
កាលពីថ្ងៃម្សិលមិញនេះដែរ ក្រសួងការងារ និងបណ្ដុះបណ្ដាលវិជ្ជាជីវៈក៏បានចេញសេចក្ដីជូនដំណឹងពីវឌ្ឍនភាពនៃការដោះស្រាយវិវាទការងាររួមនៅក្រុមហ៊ុនណាហ្គាវើលដ៍ ក្រោយគូភាគីវិវាទជួបប្រជុំរកដំណោះស្រាយជាលើកទី៥។
បើតាមក្រសួងការងារ តំណាងភាគីកម្មករបន្តទាមទារក្រុមហ៊ុនល្បែងមួយនេះពិភាក្សាលើចំណុចអនុញ្ញាតឱ្យបុគ្គលិកដែលចង់ចូលធ្វើការវិញ មកពិភាក្សាមុននឹងឈានទៅពិភាក្សាចំណុចវិវាទផ្សេងទៀត ហើយចំពោះកម្មករដែលព្រមឈប់ពីការងារ ទាមទារឱ្យមានការទូទាត់សំណងឱ្យបានត្រឹមត្រូវតាមច្បាប់។ ចំណែកភាគីក្រុមហ៊ុនបន្តប្រកាន់ជំហរមិនទទួលយកកម្មករដែលត្រូវបានបញ្ឈប់ពីការងារឱ្យចូលវិញទេ ហើយក៏មិនពិចារណាដោះដូរកម្មករតាមសំណើរបស់ក្រុមអ្នកតវ៉ានេះដែរ។
ក្រសួងការងារថា ការប្រជុំលើកទី៥នេះ នៅមិនទាន់មានលទ្ធផល និងត្រូវរង់ចាំប្រជុំបន្ទាប់នៅថ្ងៃទី២៩ ខែមីនា។ យ៉ាងណា ក្រសួងអះអាងថា នឹងខំសម្របសម្រួលភាគីទាំងពីរឱ្យឯកភាពគ្នា៕
