មន្ត្រីជាន់ខ្ពស់ក្រសួងសុខាភិបាលបានក្រើនរំលឹកប្រជាពលរដ្ឋមួយចំនួនដែលយល់ច្រឡំថា ជំងឺកូវីដ-១៩ អូមីក្រុង ដូចគ្នានឹងជំងឺផ្តាសាយធម្មតាដែរនោះ គឺជារឿងមិនត្រឹមត្រូវនោះទេ។
រដ្ឋលេខាធិការនិងជាអ្នកនាំពាក្យក្រសួងសុខាភិបាលលោកស្រី ឱ វណ្ណឌីន បានថ្លែងនៅក្នុងពិធីបើកយុទ្ធនាការជាតិអប់រំសុខភាព ក្រោមប្រធានបទ «វីរុសកូវីដ-១៩ បំប្លែងថ្មីអូមីក្រុង ឆ្លងលឿនជាងមុនអាចបង្កឲ្យមានហានិភ័យធ្ងន់ធ្ងរដល់អ្នកនិងគ្រួសារ» ដែលប្រព្រឹត្តទៅ នៅសាលាខេត្តកំពង់ស្ពឺ កាលពីថ្ងៃទី២២ ខែមីនា ឆ្នាំ២០២២ មានបងប្អូនប្រជាជនមួយចំនួនភ្លេចខ្លួន ក្នុងការគាំពារពីជំងឺឆ្លងមួយនេះ គឺជារឿងគួរឲ្យព្រួយបារម្ភ។
លោកស្រី ឱ វណ្ណឌីន ថ្លែងថា៖ «យើងសង្កេតឃើញថា បងប្អូនប្រជាពលរដ្ឋមួយចំនួនហាក់ដូចជាភ្លេចខ្លួន ដោយយល់ឃើញថា ជំងឺកូវីដ-១៩ ជាពិសេសបច្ចុប្បន្នប្រភេទអូមីក្រុងវាអត់ធ្ងន់ធ្ងរហើយវាដូចផ្តាសាយធម្មតា គាត់ឈឺតិចតួចៗទៅ បាត់ហើយ វាអត់មានអីគាត់ជាព្រួយបារម្ភទេ»។
លោកស្រី ឱ វណ្ណឌីន បន្តទៀតថា៖ «នេះគឺជាចំណុចមួយដែលធ្វើឲ្យយើងព្រួយបារម្ភ»។
យ៉ាងណាមិញ តាមបទសម្ភាសន៍ជាមួយនឹងពលរដ្ឋម្នាក់ដែលរស់នៅទីក្រុងភ្នំពេញដោយសុំមិនបង្ហាញឈ្មោះ យល់ឃើញថា ស្ថានភាពកូវីដ-១៩ អូមីក្រុង នេះមិនសូវជាធ្ងន់ធ្ងរធៀបទៅនឹងវីរុស Delta ទេ។
ពលរដ្ឋរូបនេះថ្លែងថា៖ «ខ្ញុំមិនសូវជាព្រួយបារម្ភក្នុងការឆ្លងវីរុសនេះធៀបទៅនឹង Delta ទេព្រោះយើងស្ថិតនៅរស់ក្នុងបរិបទនេះប្រហែលជាបីឆ្នាំហើយ ដែលអាចឲ្យយើងរៀនសម្របនិងចេះការពារខ្លួនច្រើនជាងមុន»។
រីឯពលរដ្ឋម្នាក់ទៀតឈ្មោះ រីណា ក៏បានលើកឡើងថា៖ «សម្រាប់ខ្ញុំ វាគឺជារឿងធម្មតាពីព្រោះយើងអាចព្យាបាលវាបាន បើសិនជាខ្ញុំចង់ចេញទៅក្រៅ ជាមួយនឹងមិត្តភក្តិខ្ញុំនឹងទៅពីព្រោះខ្ញុំពាក់ម៉ាស់និងឧស្សាហ៍លាងដៃ ហើយពួកយើងក៏មិនសូវទៅកន្លែងណាដែលអ៊ូអរដែរ»។
កញ្ញា រីណា បានបន្តទៀតថា៖ «ដូចខ្ញុំនិយាយខាងលើអ៊ីចឹង ខ្ញុំមិនខ្លាចក្នុងការឆ្លងវីរុសនេះទេ ពីព្រោះវាអាចព្យាបាលបានស្រួល ហើយខ្ញុំក៏បានចាក់វ៉ាក់សាំងលើកទីបីហើយដែរ អញ្ចឹងខ្ញុំមិនព្រួយបារម្ភនោះទេ»។
គិតត្រឹមព្រឹកថ្ងៃព្រហស្បតិ៍នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១៣៥ ២៨៥នាក់ ក្នុងនោះ អ្នកជំងឺព្យាបាលជាសះស្បើយចំនួន១៣១ ២១៦នាក់ និងអ្នកស្លាប់កើនដល់ចំនួន៣ ០៥៤នាក់។ ចំណែកករណីឆ្លងអូមីក្រុងក្នុងសហគមន៍វិញ ក្រសួងថា គិតមកដល់ពេលនេះបានកើនដល់ ១៣ ៤៩៩នាក់៕
