អាជ្ញាធរខេត្តព្រះវិហារ បានហាមប្រជាពលរដ្ឋមិនឱ្យចូលក្នុងដីជម្លោះជាមួយក្រុមហ៊ុនចិន «ហេងហ៊្វូ គ្រុប ស៊ូហ្គឺរ អីនដាស្ទ្រី (Hengfu Group Sugar Industry)» ខណៈពលរដ្ឋថា ក្រុមហ៊ុនមួយនេះបានរំលោភយកដីធ្លីរបស់ពួកគេ ក្រោយទទួលបានសម្បទានពីរដ្ឋាភិបាល។
ការហាមប្រាមរបស់អាជ្ញាធរខេត្តព្រះវិហារនេះ ធ្វើឡើងក្រោយពីប្រជាសហគមន៍ប្រហែល២០០នាក់បាននាំគ្នាទៅដាក់ញ្ញត្តិសាលាខេត្ត កាលពីថ្ងៃទី១៥ ខែមីនា ឆ្នាំ២០២២ ដើម្បីរកអន្តរាគមន៍ពីអភិបាលខេត្តជួយដោះស្រាយបញ្ហាដីធ្លីរបស់ពួកគេជាមួយក្រុមហ៊ុនចិន «ហេងហ៊្វូ គ្រុប ស៊ូហ្គឺរ អីនដាស្ទ្រី»។
កាលពីថ្ងៃទី១៧ ខែមីនានេះ រដ្ឋបាលខេត្តព្រះវិហារ បានចេញសេចក្ដីជូនដំណឹងមួយឱ្យដឹងថា ក្រុមហ៊ុនចិន ហេងហ៊្វូ គ្រុប ស៊ូហ្គឺរ អីនដាស្ទ្រី តំណាងឱ្យក្រុមហ៊ុនចំនួន៥ រួមមាន ក្រុមហ៊ុនរូយហ្វេង, ឡានហ្វេង, ហេងរូយ, ហេងយូ និងហេងណុង ទទួលបានដីសម្បទានសេដ្ឋកិច្ចសរុបជាង៤ម៉ឺនហិកតាពីរដ្ឋាភិបាលកម្ពុជា កាលពីឆ្នាំ២០១១ ដើម្បីវិនិយោគដាំដំណាំអំពៅ ស្ថិតនៅភូមិសាស្ត្រស្រុកឆែប ស្រុកត្បែងមានជ័យ និងស្រុកជ័យសែន។
រដ្ឋបាលខេត្តព្រះវិហារ បន្តថា ក្រុមហ៊ុនឧបសម្ព័ន្ធមួយនេះបានដំណើរការសកម្មភាពវិនិយោគរហូតដល់ឆ្នាំ២០១៩ ប៉ុន្តែបានផ្អាកសកម្មភាពវិនិយោគបណ្ដោះអាសន្នវិញ ដោយសារវិបត្តិកូវីដ-១៩ ហើយមានប្រជាពលរដ្ឋមួយចំនួនបានចូលទៅទន្ទ្រានយកយ៉ាងអនាធិបតេយ្យលើដីធ្លីដែលក្រុមហ៊ុនធ្លាប់វិនិយោគ។
លិខិតដដែលនេះបានឱ្យប្រជាពលរដ្ឋដែលកំពុងទន្ទ្រាននិងកាន់កាប់លើដីក្រុមហ៊ុននោះ ត្រូវចាកចេញវិញ និងបញ្ឈប់សកម្មភាពរុករានទៀត ហើយបានព្រមានចាត់វិធានការច្បាប់ផងដែរ ក្នុងករណីមិនព្រមអនុវត្តតាមសេចក្ដីជូនដំណឹងនេះ។
វីអូឌី មិនអាចសុំការបញ្ជាក់បន្ថែមពីអភិបាលខេត្តព្រះវិហារ លោក ប្រាក់ សុវណ្ណ ពាក់ព័ន្ធករណីនេះបានទេ នៅថ្ងៃព្រហស្បតិ៍នេះ។
លោក សឿន ថា ដែលអះអាងថាជាប្រធានសហគមន៍ប្រើសក្អក បានបង្ហាញខកចិត្តចំពោះសេចក្ដីជូនដំណឹងរបស់រដ្ឋបាលខេត្តព្រះវិហារនេះ។ លោកថា ដីទំហំ៣៨៣ហិកតា របស់ជនជាតិដើមភាគតិចកួយ ចំនួន៧៧គ្រួសារ នៅឃុំម្លូរព្រៃ២ ស្រុកឆែប ត្រូវបានក្រុមហ៊ុនចិនមួយនេះ ឈូសឆាយរំលោភយកអស់កាលពីឆ្នាំ២០១២ ដោយមិនបានដោះស្រាយសំណងជូនពលរដ្ឋឡើយ។
ជនជាតិដើមភាគតិចកួយរូបនេះ អះអាងថា ក្រោយក្រុមហ៊ុនរំលោភយកដីធ្លីអស់ បានធ្វើឱ្យពួកគាត់មានបញ្ហាជីវភាពគ្រួសារ និងជំពាក់បំណុលធនាគារ ដោយសារតែការបាត់បង់មុខរបរ និងដីធ្លីសម្រាប់ធ្វើកសិកម្មចិញ្ចឹមជីវិត។
លោកបន្ថែមថា៖ «កាលពីមុន យើងធ្លាប់មានដីស្រែសម្រាប់ធ្វើស្រែធ្វើចម្ការ មានកន្លែងសម្រាប់ដកអនុផលព្រៃឈើសម្រាប់ប្រើប្រាស់ ប៉ុន្តែបច្ចុប្បន្ន វាអស់ហើយ ក្រុមហ៊ុនរំលោភយកអស់ហើយ។ ដីស្រែចម្ការយើងក៏វាបាត់បង់ ព្រៃឈើដែលយើងធ្លាប់អាស្រ័យផលក៏បាត់បង់ដែរ»។
ជនជាតិដើមភាគតិចកួយនៅឃុំប្រមេរ ស្រុកត្បែងមានជ័យ លោក ថាប់ សុខឃីន អះអាងថា គម្រោងដីសម្បទានសេដ្ឋកិច្ចរបស់ក្រុមហ៊ុនរូយហ្វេង និងឡានហ្វេង បានធ្វើឱ្យប៉ះពាល់ដីអាស្រ័យផលរបស់ពលរដ្ឋចំនួន៣ភូមិ នៃឃុំប្រមេរ ខណៈលោកមិនចាំចំនួនគ្រួសារពលរដ្ឋនិងទំហំដី។
លោកបន្តថា៖ «ពីមុន យើងមានកន្លែងអាស្រ័យផលច្រើន ដូចកន្លែងធ្វើការវិលជុំ កន្លែងបន្លែផ្លែឈើ ផ្សិតជាដើមហ្នឹង ប៉ុន្តែពីក្រុមហ៊ុនគាត់ចូលមក បានធ្វើឱ្យពួកយើងបាត់បង់មុខរបរ អ្នកខ្លះត្រូវបានក្រុមហ៊ុនឈូសឆាយដីធ្លីរបស់ពួកគាត់អស់ គ្មានកន្លែងសម្រាប់ធ្វើចម្ការ។ អ្នកខ្លះបានម្រេចចិត្តចំណាកស្រុកទៅធ្វើការងារតាមខេត្ត និងអ្នកខ្លះចំណាកស្រុករកការងារធ្វើនៅប្រទេសថៃ»។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា ករណីអាជ្ញាធរខេត្តព្រះវិហារចេញសេចក្ដីជូនដំណឹងហាមពលរដ្ឋចូលដីកំពុងមានវិវាទ និងការព្រមានពលរដ្ឋ គឺជាការគេចវេះមិនទទួលខុសត្រូវរបស់អាជ្ញាធរក្នុងការដោះស្រាយផលប៉ះពាល់ដីធ្លីជូនពលរដ្ឋ។ លោកថា វិធានការនេះធ្វើឱ្យប៉ះពាល់ដល់ជីវភាពរស់នៅរបស់ប្រជាពលរដ្ឋ និងជាការរំលោភទៅលើសិទ្ធិអាស្រ័យផល ឬសិទ្ធិទទួលដីធ្លីរបស់ពលរដ្ឋ។
ប្រធានសមាគមរូបនេះជំរុញទៅអាជ្ញាធរខេត្តព្រះវិហារ ដោះស្រាយបញ្ហានេះតាមនីតិវិធី ដោយដកហូតដីធ្លីដែលក្រុមហ៊ុនបានរំលោភយក ផ្ដល់ជូនពលរដ្ឋបានបង្កបង្កើនផលវិញ។
លោកបន្ថែមថា៖ «ហើយមួយវិញទៀត ត្រូវពន្លឿនការដោះស្រាយវិវាទដីធ្លីរវាងក្រុមហ៊ុននិងប្រជាពលរដ្ឋ ដើម្បីធានាថា ប្រជាពលរដ្ឋទាំងអស់ហ្នឹងទទួលបានដីធ្លីគ្រប់គ្រាន់មកវិញ ដើម្បីបង្កបង្កើនផល និងអាស្រ័យផលលើដីរបស់ខ្លួន ក្នុងការលើកកម្ពស់ជីវភាព។ ប្រសិនបើគ្រាន់តែចេញលិខិតព្រមាន ឬក៏ហាមមិនឱ្យប្រជាពលរដ្ឋចូលទៅនោះ វាហាក់បីដូចជាទុកចោល ឬក៏អត់ប្រើប្រាស់យន្តការ និងចំណាត់ការនៃការដោះស្រាយបញ្ហាដីធ្លីនេះទេ»៕