លោកនាយករដ្ឋមន្ត្រី ហ៊ុន សែន បានច្រានចោលសារជាសំណេរដែលលោកសរសេរប្រកាសកាលពីប៉ុន្មានឆ្នាំមុនថា ចូលឆ្នាំខ្មែរឆ្នាំនេះបើកប្រាក់ខែឌុប។
ប្រមុខរដ្ឋាភិបាលកម្ពុជា បានថ្លែងនៅក្នុងពិធីសម្ពោធដាក់ឱ្យប្រើប្រាស់មន្ទីរពេទ្យមិត្តភាពកម្ពុជា-ចិន ព្រះកុសុមៈ កាលពីព្រឹកថ្ងៃទី២១ ខែមីនា ថា សារជាសំណេរដែលគេចែកចាយលើបណ្តាញសង្គមហ្វេសប៊ុកកាលពីពេលថ្មីៗនេះ គឺជាសារចាស់របស់លោក។ លោកថា សំណេរនោះ មានតាំងពីប៉ុន្មានឆ្នាំមុនមកម្ល៉េះ ពោលគឺតាំងពីមុនផ្ទុះជំងឺកូវីដ-១៩មកម៉្លេះ។ លោកនាយករដ្ឋមន្ត្រីក៏បានប្តេជ្ញាចិត្តដែរថា ឆ្នាំនេះត្រូវតែប្រារព្ធពិធីបុណ្យចូលឆ្នាំឲ្យបាន។
លោកបានថ្លែងយ៉ាងដូច្នេះថា៖ «ស្រាប់តែថ្ងៃមុននាំគ្នាផ្អើលម៉ាប្រទេសថា លោកហ៊ុន សែន នឹងបើកអាប្រាក់បៀវត្ស ខែ៣ហើយថែមខែ៤ទៀត តើមានឃើញទេ … ថា ឆ្នាំហ្នឹងនឹងបានបើកប្រាក់ខែឌុប បង្កើនប្រាក់ខែ ខែ៣ ហើយមានអាខែ៤ អត់ទេ។ អាហ្នឹងបង្ហោះតាំងពីហ្ន ដូចឆ្នាំ២០២០ ឆ្នាំ២០១៩»។
លោកនាយករដ្ឋមន្ត្រីបញ្ជាក់បន្ថែមថា៖ «ដូច្នេះសុំកុំភ័ន្តច្រឡំ អាហ្នឹងមិនមែនទេ តែមិនដឹងម៉េចទេ អាហ្វេសប៊ុកហ្នឹង យូរៗចេញមកមួយ»។
មន្រ្ដីរាជការម្នាក់ដែលបម្រើការនៅស្ថាប័នរដ្ឋមួយ បានថ្លែងដោយសុំមិនបញ្ចេញឈ្មោះថា លោកស្រីមិនមានបញ្ហាចំពោះសារចាស់របស់លោកនាយករដ្ឋមន្ត្រីនោះទេ ព្រោះប្រាក់បៀវវត្សរបស់មន្ដ្រីរាជការនៅតែបើកពីរដងក្នុងមួយខែ គ្រាន់តែខែខ្លះបើកដើមខែ និងមានខែខ្លះបើកចុងខែតែប៉ុណ្ណោះ។
អ្នកស្រីបានថ្លែងថា៖ «សម្រាប់ខ្ញុំសារមួយហ្នឹង វាមិនមានអីប៉ះពាល់ទេ ដោយសារតែប្រាក់ខែមួយខែយើងទទួលបានពីរដង អីចឹងព័ត៌មានហ្នឹង ទោះពិតឬមិនពិត ប្រាក់ខែនៅតែចូលក្នុងកុង [គណនី] មួយខែពីរដងដដែលទេ គ្រាន់តែដើមខែឬចុងខែ»។
អ្នកស្រី បន្ថែមថា៖ «សម្រាប់ខ្ញុំបើ បើកឌុបមក គឺចាយអស់លឿន ប៉ុន្ដែបើយើងមិនបើកដើមខែទេ ប៉ុន្ដែដល់ថ្ងៃហ្នឹង គឺចូលកុងដដែលទេ អីចឹងសម្រាប់យើងក្នុងនាមអ្នកធ្វើការរដ្ឋ ប្រាក់ខែចូលដដែល មួយខែពីរដងអត់ដែលបាត់ទេ»។
គ្រូបង្រៀនម្នាក់ដែលបង្រៀននៅវិទ្យាល័យមួយនៃរាជធានីភ្នំពេញបានលើកឡើងថា ទោះបីបើកប្រាក់ខែ [បៀវត្ស] ពីរខែចូលគ្នាក៏ដោយ ក៏មិនមានការសប្បាយចិត្តអ្វីដែរ ព្រោះគ្រាន់តែបើកប្រាក់ពីរខែក្នុងពេលតែប៉ុណ្ណោះ មិនមែនបានប្រាក់ខែឌុបនោះទេ។
លោកគ្រូ បានលើកឡើងថា៖ «សារហ្នឹងមិនពិតទេ សារហ្នឹងគ្រាន់តែគេចែករំលែក បើតាមការពិតដូចជាគ្មានទេ ព្រោះគ្មាននរណាប្រាប់ថា បែបនេះអីចឹង ប្រសិនបើបានប្រាក់ឌុបពីរខែមែន សប្បាយដែល ប៉ុន្ដែដូចមិនសប្បាយដែរ បើបើកអីចឹង ព្រោះពេលដែលសប្បាយអត់អីចាយពេលក្រោយ ដោយគ្រាន់តែបើកប្រាក់ខែ៣ ខែ៤ ហ្នឹង មិនមែនបាន bonus ដូចអ្នកធ្វើការឯកជននោះទេ»។
ចំណែកប្រធានសមាគមគ្រូបង្រៀនកម្ពុជាឯករាជ្យអ្នកស្រី អ៊ុក ឆាយ៉ាវី បានថ្លែងថា លោកស្រីមិនបានលឺសារសំឡេងរបស់លោកនាយករដ្ឋមន្ត្រីនោះទេ។
លោកស្រីថ្លែងថា «តាមពិតការឲ្យប្រាក់ខែឌុបហ្នឹង ក៏ខ្ញុំមិនបានលឺដែរ ព្រោះអី វាមិនមែនឲ្យប្រាក់ខែគ្រូឌុបទេ គ្រាន់តែថាបោក បើកដើមខែ ចុងខែអីចឹងទៅ មិនមែនមានន័យថា ឌុបបានប្រាក់ខែឌុបទេ ឧទាហរណ៍ថា ខែ៣ យើងតែងតែបើកនៅសប្ដាហ៍ទី២ទៅសប្ដាហ៍ទី៤ ហើយមួយតង់ទៀតត្រូវបើកនៅចុងខែ ដូច្នេះការបើកប្រាក់ខែឌុប គឺគ្មានលឺទេ»។
ទោះបីជាយ៉ាងណាក្ដី ការបើកប្រាក់ខែឌុបក៏ដោយ ក៏អ្នកគ្រូមិនសប្បាយចិត្តដែរ ព្រោះគ្រូបង្រៀនដូចជាលោកស្រី ត្រូវចំណាយលើការប្រើប្រាស់ និងការចំណាយផ្សេងៗ មិនដែលសល់ឡើយ ដោយប្រាក់បៀវត្សគ្រូបង្រៀននៅមិនទាន់ឆ្លើយតបចំពោះការទូទាត់ផ្សេងៗក្នុងពេលបច្ចុប្បន្នឡើយ។ ដូច្នេះពេលចុងខែត្រូវរកប្រាក់ចំណូលបន្ថែមដើម្បីទប់ការចំណាយរបស់គ្រួសារ។
កាលពីថ្ងៃ១៦ ខែមីនា មានការលោតជាសារសំណេររបស់លោកនាយករដ្ឋមន្ត្រីឡើងវិញ នៅតាមបណ្តាញសង្គមហ្វេសប៊ុក ដោយបញ្ជាក់ថា ការបើកប្រាក់ខែនៅក្នុងខែមេសា មុនចូលឆ្នាំថ្មីប្រពៃណីជាតិនេះ នឹងបើកឌុប ដោយចុងខែ៣ (មីនា) បើកប្រាក់ខែម្តង ហើយនៅខែ៤ (មេសា) មុនចូលឆ្នាំបើកម្តងទៀត។ សារជាសំណេរនោះ ក៏បានសរសេរដែរថា ការបើកប្រាក់បៀវត្សឌុបនេះ នឹងបើករួមជាមួយនឹងប្រាក់មុខងារបន្ថែម ហើយបន្ទាប់មកទៀត នឹងបើកប្រាក់ខែនៅអាទិត្យទី៣នៃខែឧសភា ដើម្បីចៀសវាងបញ្ហាចំណាយរបស់មន្ត្រីរាជការ។ ក៏ប៉ុន្តែ លោកនាយករដ្ឋមន្ត្រីបានចេញមកបដិសេធ៕