ប្រជាពលរដ្ឋនៅស្រុកគងពិសី ខេត្តកំពង់ស្ពឺ មួយចំនួន នៅតែព្រួយបារម្ភពីការឆ្លងជំងឺកូវីដ-១៩ ខណៈជំងឺនេះបន្តបំប្លែងខ្លួនជាបន្តបន្ទាប់។
កម្មការិនីរោងចក្រកាត់ដេរសម្លៀកបំពាក់ (KY) កញ្ញា ហ៊ន ទាំងស៊ីញ អាយុ២៦ឆ្នាំ បានលើកឡើងថា កញ្ញាធ្លាប់ឮថា ជំងឺកូវីដ-១៩ ទោះបីជាចាក់វ៉ាក់សាំងការពារហើយក្ដី ក៏នៅតែឆ្លងដដែល។
កម្មការិនីនៅខេត្តកំពង់ស្ពឺរូបនេះ មិនយល់ថាតើវាបណ្ដាលមកពីវ៉ាក់សាំង ឬមួយមកពីប្រជាពលរដ្ឋមិនការពារខ្លួននោះឡើយ។ ចំណែកករណីខ្លះ ទោះបីជាពួកគេខំពាក់ម៉ាស់ការពារ លាងដៃនឹងសាប៊ូ បាញ់អាល់កុលជាប់រហូតក្ដី តែវីរុសកូរ៉ូណានៅតែកើតមានបន្ត។ កញ្ញាបានត្អូញត្អែរថា បើជំងឺកូវីដនៅតែបន្ត នឹងធ្វើឱ្យប៉ះពាល់ដល់អាយុជីវិតរបស់ពលរដ្ឋ និងធ្វើឱ្យប៉ះពាល់ដល់សេដ្ឋកិច្ចក្នុងគ្រួសារថែមទៀតផង។
កញ្ញាបានបន្តថា៖ «រឿងមេរោគកូវីដ-១៩ ចេះតែកើតបន្តមិនចប់អ៊ីចឹង ធ្វើឱ្យវិបត្តិសេដ្ឋកិច្ចក្នុងគ្រួសារចេះតែកើតមានបន្ត ជាពិសេសកម្មកររោងចក្រមិនសូវមានការងារថែមម៉ោងធ្វើទេ»។
អ្នកស្រី សន ឡឹង អាយុ៥៧ឆ្នាំ មានមុខរបរជាចុងភៅរោងចក្រ ស្ថិតនៅភូមិចាស់ ឃុំទឹកល្អក់ ស្រុកគងពិសី ខេត្តកំពង់ស្ពឺ ក៏លើកឡើងដែរ អ្នកស្រីមិនយល់ឡើយពីបញ្ហាជំងឺកូវីដ-១៩នេះ។ អ្នកស្រីថា អ្នកស្រីបានចាក់វ៉ាក់សាំងការពារជំងឺកូវីដ-១៩ លើកទី១ ដល់លើកទី៤ ហើយក៏គ្មានបញ្ហាអ្វីដែរចំពោះសុខភាព។ តែអ្នកស្រីនៅតែមិនអស់ចិត្ត ដោយសារអ្នកខ្លះនៅតែឆ្លងកូវីដ-១៩ ឬមួយគេចាក់ថ្នាំហើយមិនស្ដាប់តាមការណែនាំរបស់គ្រូពេទ្យ ទើបធ្វើឱ្យវ៉ាក់សាំងសាបមិនសូវមានប្រសិទ្ធភាព។
អ្នកស្រីបានបន្តថា៖ «ចំពោះខ្ញុំ បើលោកគ្រូពេទ្យប្រាប់ថាចាក់វ៉ាក់សាំងហើយ ត្រូវកុំឱ្យលើកធ្ងន់ ការពារលាងដៃនឹងសាប៊ូ អាល់កុល ពាក់ម៉ាស់ និងមិនឱ្យហូបគ្រឿងស្រវឹង ខ្ញុំនឹងធ្វើតាមដែលលោកគ្រូពេទ្យបានប្រាប់ ប៉ុន្តែចំពោះអ្នកផ្សេងវិញ ខ្ញុំអត់បានដឹងដែរទេ»។
ស្រុកគងពិសី មានចំនួន១៣ឃុំ ហើយឃុំទឹកល្អក់ មានភូមិចំនួន ២៥០ភូមិ ដែលមានគ្រួសារចំនួន ១៦៥០គ្រួសារ ស្មើនឹងប្រជាពរដ្ឋចំនួន ៧ ៥៧៧នាក់។
អ្នកស្រី សឿន សាវ៉ន អាយុ៣៧ឆ្នាំ មុខរបរជាអាជីវករបោកអ៊ុត នៅភូមិព្រៃកន្ទោច ឃុំទឹកល្អក់ ស្រុកគងពិសី ខេត្តកំពង់ស្ពឺ យល់ឃើញថា វីរុសកូរ៉ូណានៅតែកើតមានបន្តមិនចេះចប់មិនចេះហើយ ដោយមិនដឹងថាមកពីអ្វីនោះទេ បើទោះបីជាម្នាក់ៗបានការពារខ្លួនខ្លាចឆ្លងជំងឺនេះហើយក្ដី។
អ្នកស្រីបានបន្តថា៖ «ខ្ញុំក៏មានការងឿងឆ្ងល់ដែរ តើមេរោគចង្រៃមួយនេះ វាបំប្លែងខ្លួនបានយ៉ាងម៉េច ខ្ញុំនៅតែបារម្ភនិងការពារជានិច្ចចំពោះមេរោគកូវីដ-១៩។ ប៉ុន្តែអ្នកខ្ លះគេអត់បារម្ភ មិនភ័យខ្លាច! ធម្មតា គេរកអី គេធ្វើអី ជាធម្មតារបស់គេ ហើយក៏អត់មានបញ្ហាអ្វីដែរ»។
ទាក់ទងការលើកឡើងរបស់ពលរដ្ឋខាងលើនេះ លោក ប៊ុន ថុល ប្រធានមន្ទីរពេទ្យបង្អែកឃុំពេជ្រមុនី ស្រុកគងពិសី ខេត្តកំពង់ស្ពឺ បានមានប្រសាសន៍ថា ជំងឺកូវីដ-១៩ វាកើតមានតាំងពីឆ្នាំ២០១៩មកម្ល៉េះ។ លោកថា មិនដល់មួយឆ្នាំផង មេរោគនេះ វាបំប្លែងខ្លួនពីវីរុសដែលតា (Delta) ទៅជា អូមីក្រុង (Omicron) និងចេញពីអូមីក្រុង ទៅជា (A B 2) ជាដើម។
លោកបានបន្តថា៖ «កាវិវត្តរបស់វីរុសកូរ៉ូណានេះ កើតមុនដំបូងតូច យូរទៅវាធំឡើង វាប្លែកបន្តិចម្ដងៗ វាបំប្លែងខ្លួន! យើងមិនអាចសន្មតថាចប់ពេលណានោះទេ។ ដូច្នេះ មានតែយើងទាំងអស់គ្នាការពារ និងស្ដាប់តាមការណែនាំរបស់ក្រសួងសុខាភិបាល ៣កុំ ៣ការពារ»។
លោកវេជ្ជបណ្ឌិត អូន ម៉ោន ប្រធានការិយាល័យសុខាភិបាលស្រុកប្រតិបត្តិគងពិសី មិនអាចផ្ដល់បទសម្ភាសន៍បានទេ ដោយលោកមានការរវល់។
ចំណែកលោក យិន សំអន បុគ្គលិកពេទ្យជំងឺកូវីដ-១៩ ស្រុកគងពិសី បានមានប្រសាសន៍ថា ជំងឺកូវីដ-១៩ មិនអាចមើលស្រាលបានទេ។ លោកថា ពលរដ្ឋត្រូវការពារខ្លួនតាមការផ្សព្វផ្សាយរបស់ក្រសួងសុខាភិបាល។
លោកបានបន្តថា៖ «ដោយមានការបារម្ភហើយខ្លាចពីសំណាក់បងប្អូនប្រជាពលរដ្ឋ ដោយសារតែជំងឺកូវីដ-១៩ មិនដឹងពេលណាវារលាយរលត់អស់នោះទេ ការរីករាលដាលនៃជំងឺកូរ៉ូណានេះមានតិចមានច្រើន វាបំប្លែងខ្លួន! ដូច្នេះយើងត្រូវតែចាក់ថ្នាំការពារជំងឺកូវីដ-១៩ឱ្យបានគ្រប់ៗគ្នា ហើយស្ដាប់តាមការណែនាំរបស់ក្រសួងសុខាភិបាល ៣កុំ ៣ការពារ ដោយលាងដៃនឹងសាប៊ូឱ្យបានញឹកញាប់ បាញ់អាល់កុល ពាក់ម៉ាស់ ជាដើម វាមានតែប៉ុណ្ណឹង អត់មានអីហួសពីហ្នឹងទៀតទេ»។
គិតត្រឹមថ្ងៃទី២៤ ខែមីនា កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១៣៥ ៣៤៤នាក់ ក្នុងនោះ អ្នកជំងឺព្យាបាលជាសះស្បើយចំនួន១៣១ ៣១៣នាក់ និងអ្នកស្លាប់កើនដល់ចំនួន៣ ០៥៤នាក់។ ចំណែកករណីឆ្លងអូមីក្រុងក្នុងសហគមន៍វិញ ក្រសួងថា គិតមកដល់ពេលនេះបានកើនដល់១៣ ៥៧៧នាក់៕
អត្ថបទដោយលោក ចាន់ ឌឿន ពលរដ្ឋអ្នកសារព័ត៌មានខេត្តកំពង់ស្ពឺ