រដ្ឋមន្ត្រីក្រសួងកសិកម្មបានប្រកាសលេខទូរស័ព្ទទាន់ហេតុការណ៍ (Hotline) ចំនួន ៣ខ្សែដើម្បីឱ្យប្រជាពលរដ្ឋជួយរាយការណ៍អំពីបទល្មើសនេសាទខុសច្បាប់នៅបឹងទន្លេសាប ក្រោយពីមានបទបញ្ជារបស់លោកនាយករដ្ឋមន្ត្រី ហ៊ុន សែន។
ក្នុងសេចក្ដីប្រកាសព័ត៌មាន កាលពីថ្ងៃទី២៥ ខែមីនា ក្រសួងកសិកម្ម រុក្ខាប្រមាញ់ និងនេសាទ បានអំពាវនាវឱ្យសាធារណជន និងបណ្ដាញសារព័ត៌មាន រាយការណ៍អំពីបទល្មើសនេសានទៅកាន់លេខទូរស័ព្ទទាន់ហេតុការណ៍៣ខ្សែ (០១២ ៩៩៥ ៦៦៥/ ០១៧ ៧៣៥ ១៦៩/ ០១២ ៨៧១ ០៧១) ប្រសិនបើជាមានបទល្មើសជាក់ស្ដែង។
សេចក្តីប្រកាសដដែលបានបញ្ជាក់ដែរថា ក្រសួងបាននិងកំពុងចាត់វិធានការយ៉ាងម៉ឺងម៉ាត់ ក្នុងការបង្ក្រាបបទល្មើសជលផលជុំវិញបឹងទន្លេសាបឱ្យមានប្រសិទ្ធភាពខ្ពស់ ពិសេសបទល្មើសអួនអូសទឹកសាប ឆក់ត្រជាក់ និងបទល្មើសដទៃទៀត ដែលធ្វើឱ្យប៉ះពាល់ធ្ងន់ធ្ងរដល់ធនធានជលផល។
ការប្រកាសលេខទូរស័ព្ទសម្រាប់ឱ្យសាធារណជន និងបណ្ដាញសារព័ត៌មានរាយការណ៍នេះ បានធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន កាលពីថ្ងៃទី២៣ ខែមីនា ឆ្នាំ២០២២ បានស្ដីបន្ទោសមន្ត្រីពាក់ព័ន្ធ រួមទាំងរដ្ឋមន្ត្រីក្រសួងកសិកម្ម លោក វេង សាខុន ជុំវិញបទល្មើសនេសាទនៅបឹងទន្លេសាបដោយប្រើប្រាស់ឧបករណ៍ទំនើបៗ។
បន្ថែមពីនេះ លោកក៏បានចេញបញ្ជាឱ្យកងកម្លាំងចម្រុះចុះបង្ក្រាបបទល្មើសទាំងនោះ តែមិនបានប្រកាសចំណាត់ការផ្លូវច្បាប់ចំពោះមន្ត្រីដែលទទួលខុសត្រូវនៅតាមបណ្ដាខេត្តជាប់បឹងទន្លេសាបទាំងនោះទេ។
ក្រោយពីមានបញ្ជានេះ អាជ្ញាធរខេត្តជាប់បឹងទន្លេសាបបានចាប់ផ្តើមធ្វើយុទ្ធនាការចុះបង្ក្រាបបទល្មើសនេសាទ ខណៈម្សិលមិញលោក ហ៊ុន សែន លើកឡើងបន្ថែមទៀតថា បទល្មើសនៅបឹងទន្លេសាបនៅតែកើតមាន ព្រោះតែមន្ត្រីធ្វើការតែពេលលោករម្លឹក។
យុទ្ធនាការនេះបានកើតឡើង នៅប៉ុន្មានថ្ងៃក្រោយពីប្រធានរាជបណ្ឌិត្យសភាកម្ពុជា លោក សុខ ទូច បានចុះស្រាវជ្រាវ និងទប់ស្កាត់បទល្មើសនេសាទនៅបឹងទន្លេសាប ដោយបានរកឃើញបទល្មើសនេសាទទ្រង់ទ្រាយធំនៅលើបឹងទន្លេសាទ ស្ថិតនៅក្នុងខេត្តពោធិ៍សាត់ ដោយជនល្មើសជាជនជាតិវៀតណាមបានប្រើប្រាស់ឧបករណ៍នេសាទខុសច្បាប់ ដូចជា ឆក់ត្រជាក់ (យ៉ាំងកាវ) ឆក់ក្ដៅ ឈិបយន្ត និងឆក់ទូកលឿន ដែលបានបំផ្លាញមច្ឆជាតិទាំងតូចទាំងធំ ទាំងត្រីមានស្រកា និងត្រីអត់ស្រកា ផងដែរ៕
