អាជ្ញាធរ និងកងកម្លាំងសន្តិសុខស្ត្រី បានចាប់កូដករក្រុមហ៊ុនណាហ្គាវើលដ៍ជាង១០០នាក់ ដាក់រថយន្តក្រុង បញ្ជូនទៅទុកចោលនៅក្បែរសួនសត្វសាហ្វារី ស្ថិតនៅខណ្ឌជ្រោយចង្វារ រាជធានីភ្នំពេញ ខណៈពួកគេបន្តធ្វើកូដកម្មទាមទារឱ្យក្រុមហ៊ុនគោរពច្បាប់ការងារ និងទម្លាក់ការចោទប្រកាន់លើតំណាងពួកគេចំនួន១៥នាក់។
កូដករក្រុមហ៊ុនណាហ្គាវើលដ៍ កញ្ញា សៀក បញ្ញា ប្រាប់វីអូឌីនៅថ្ងៃអាទិត្យនេះថា សមត្ថកិច្ចនិងកងកម្លាំងសន្តិសុខស្ត្រីរាប់សិបនាក់ បានចាប់ខ្លួនក្រុមកូដករណាហ្គាវើលដ៍ចំនួន១១២នាក់ដាក់ក្នុងរថយន្តក្រុង រួចបញ្ជូនទៅទុកចោលនៅក្បែរសួនសត្វសាហ្វារី ស្តិតនៅភូមិព្រែកតារត្ន័ ឃុំព្រែកតាសេក ខណ្ឌជ្រោយចង្វារ រាជធានីភ្នំពេញ។
កញ្ញាចាត់ទុកការចាប់ខ្លួនក្រុមកូដករម្តងហើយម្តងទៀតថា ជាការរឹតត្បិតសេរីភាពក្នុងការជួបជុំដោយសន្តិវិធី ស្របតាមច្បាប់ការងារនិងច្បាប់រដ្ឋធម្មនុញ្ញ។
ទោះជាយ៉ាងណា កញ្ញាស្នើទៅស្ថាប័នពាក់ព័ន្ធ ជាពិសេសក្រសួងការងារ ត្រូវឈរលើគោលការណ៍ឯករាជ្យ ក្នុងការដោះស្រាយបញ្ចប់វិវាទការងារ រវាងថៅកែក្រុមហ៊ុនជាមួយនឹងក្រុមកូដករឱ្យមានតម្លាភាព ទើបពួកគេឈប់នាំប្រមូលផ្តុំតវ៉ាបន្តទៀត។
កញ្ញានិយាយថា៖ «សូមឱ្យក្រសួងពាក់ព័ន្ធទាំងអស់ អាជ្ញាធរ ក្រសួងការងារនៅចំណុចកណ្តាលជួយសម្របសម្រួលតាមច្បាប់ ឱ្យថៅកែគោរពតាមច្បាប់ប្រទេសយើងទៅគឺវាចប់សព្វគ្រប់ហើយ ប៉ុន្តែខាងក្រសួងការងារគាត់អត់ឈនៅចំណុចកណ្តាលហើយ គាត់បែរទៅជាលម្អៀងទៅខាងក្រុមហ៊ុន ព្យាយាមឱ្យថៅកែរំលោភបំពានច្បាប់ទៅវិញ»។
កញ្ញាបន្ថែមថា៖ «បើអត់មានដំណោះស្រាយទេ ពួកខ្ញុំនិងបន្តចេញតវ៉ាជារៀងរាល់ថ្ងៃរហូតមានដំណោះស្រាយ ព្រោះយើងមិនបានធ្វើអ្វីខុសច្បាប់ត្រូវខ្លាចនោះទេ ទោះមានការចាប់ពួកយើង ក៏ពួកយើងមិនខ្លាចដែរ»។
កន្លងមក រដ្ឋមន្ត្រីក្រសួងមហាផ្ទៃ លោក ស ខេង ធ្លាប់បានជំរុញទៅភាគីពាក់ព័ន្ធម្តងជាពីរដង ឱ្យពន្លឿនការដោះស្រាយវិវាទក្រុមហ៊ុនល្បែងមួយនេះឱ្យបានឆាប់តាមដែលអាចធ្វើទៅបាន ប៉ុន្តែវិវាទនៅតែបន្តអូសបន្លាយ ហើយការចាប់ខ្លួនកូដករក៏នៅតែបន្តកើតមាន មុននឹងមានការដោះលែងឱ្យថ្នាក់ដឹកនាំនិងសកម្មជនសហជីព១១នាក់ បាននៅក្រៅឃុំជាបណ្តោះអាសន្នវិញកាលពីពេលថ្មីៗនេះ។
កាលពីថ្ងៃទី៧ ខែមីនា ឆ្នាំ២០២២ ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា បានជំរុញទៅអាជ្ញាធរកម្ពុជា ត្រូវចូលរួមពិភាក្សាដោះស្រាយតាមការទាមទាររបស់កូដករណាហ្គាវើលដ៍តាមផ្លូវច្បាប់ និងបញ្ឈប់ការរារាំង ធ្វើទុក្ខបុកម្នេញកូដករដែលធ្វើកូដកម្មដោយសន្តិវិធី ក្រោមហេតុផលទប់ស្កាត់កូវីដ-១៩៕