រដ្ឋាភិបាលចិន បានផ្តល់វ៉ាក់សាំងកូវីដ-១៩ចំនួន ៥លានដូសបន្ថែមទៀត ដល់កម្ពុជា ដើម្បីគាំទ្រដល់ការប្រយុទ្ធប្រឆាំងជំងឺផ្លូវដង្ហើមមួយនេះនៅក្នុងប្រទេស។
យោងតាមការផ្សព្វផ្សាយលើបណ្តាញសង្គមហ្វេសប៊ុករបស់លោកនាយករដ្ឋមន្ត្រី ហ៊ុន សែន បានឱ្យដឹងថា វ៉ាក់សាំងចំនួន ៥លានដូស ក្នុងចំណោមចវ៉ាក់សាំង ២០លានដូស ដែលលោក ស៊ី ជិនពីង ប្រធានាធិបតីនៃសាធារណរដ្ឋប្រជាមានិតចិន បានប្រកាសផ្តល់ជូនកម្ពុជា ក្នុងជំនួបតាមទូរសព្ទជាមួយលោកនាយករដ្ឋមន្ត្រី កាលពីថ្ងៃទី១៨ ខែមីនានោះ បានដឹកមកដល់ប្រទេសកម្ពុជាហើយ នៅព្រឹកថ្ងៃទី២៩ ខែមីនា ឆ្នាំ២០២២នេះ។
ប្រភពដដែល បន្តថា ប្រទេសចិន គឺជាអ្នកដែលបានជួយវ៉ាក់សាំងបង្ការជំងឺកូវីដ-១៩ ដំបូងគេមកកាន់ប្រទេសកម្ពុជា ក្នុងនោះវ៉ាក់សាំងជំនួយចំនួន ៦០ម៉ឺនដូស ត្រូវបានដឹកមកដល់ប្រទេសកម្ពុជា ជាលើកដំបូង កាលពីថ្ងៃទី០៧ ខែកុម្ភៈ ឆ្នាំ២០២១។
បើតាមប្រភពដដែល មកដល់ពេលនេះ ចិនបានផ្តល់ជំនួយវ៉ាក់សាំងមកកាន់កម្ពុជាសរុប ២៨ ៧២៤ ៨០០ដូស ក្នុងនោះ ២០លានដូសជាជំនួយថ្មី៕
