ក្រសួងការងារ និងបណ្តុះបណ្តាលវិជ្ជាជីវៈ ជូនដំណឹងដល់ម្ចាស់ឬនាយករោងចក្រសហគម្រាស ត្រូវអនុញ្ញាតឱ្យកម្មករនិយោជិតរបស់ខ្លួន ឈប់សម្រាកដោយមានប្រាក់ឈ្នួល ក្នុងពិធីបុណ្យចូលឆ្នាំប្រពៃណីជាតិ ចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២២ ខាងមុខនេះ។
សេចក្តីជូនដំណឹងរបស់ក្រសួង ស្តីពី ការអនុវត្តការឈប់សម្រាកក្នុងពិធីបុណ្យចូលឆ្នាំខ្មែរប្រពៃណីជាតិឆ្នាំ២០២២ ចុះថ្ងៃទី២៩ ខែមីនានេះ បានលើកឡើងថា ក្នុងករណីរោងចក្រសហគ្រាសទាំងឡាយណា ដែលកម្មវត្ថុអាជីវកម្មមានចរិតលក្ខណៈសកល ត្រូវប្រព្រឹត្តទៅជាប្រចាំ និងមិនអាចបញ្ឈប់សកម្មភាពបាន ម្ចាស់ឬនាយករោងចក្រសហគ្រាសនោះ អាចរៀបចំបែងចែកកម្មករនិយោជិតបានឈប់សម្រាកទៅតាមថ្ងៃបុណ្យនិមួយៗដោយផ្លាស់វេនគ្នាបាន។
ក្រសួងបន្តថា៖ «កម្មករនិយោជិតដែលធ្វើការនៅថ្ងៃឈប់បុណ្យចូលឆ្នាំខ្មែរឆ្នាំនេះ មានសិទ្ធិទទួលនូវប្រាក់បំណាច់បន្ថែម ដែលមានចំនួនស្មើនឹងប្រាក់ឈ្នួលថ្ងៃធ្វើការធម្មតា»។
ក្រសួងបន្ថែមថា ក្នុងករណីមានការព្រមព្រៀងគ្នា រវាងកម្មករនិយោជិតសាមី និងនិយោជក ឬមានចែងក្នុងបទបញ្ជាផ្ទៃក្នុងរបស់រោងចក្រ សហគ្រាស ឬអនុសញ្ញារួម ការឈប់សម្រាករបស់កម្មករនិយោជិតអាចអនុវត្តនៅពេលណាមួយផ្សេងទៀត ដែលខុសពីថ្ងៃឈប់សម្រាកបុណ្យនេះ។
ជាមួយគ្នានេះដែរ ក្រសួងការងារ ក៏បានក្រើនរំលឹកដល់ម្ចាស់ ឬនាយករោងចក្រសហគ្រាស និងកម្មករនិយោជិតទាំងអស់ ត្រូវបន្តចូលរួមអនុវត្តវិធានការ «៣កុំ ៣ការពារ» និងវិធានការសុខាភិបាលចាំបាច់ផ្សេងទៀតឱ្យបានខ្ជាប់ខ្ជួនផងដែរ៕