បុគ្គលិកកាស៊ីណូណាហ្គាវើលដ៍ដែលកំពុងធ្វើកូដកម្ម ទទូចរដ្ឋាភិបាលបំពេញតួនាទីរបស់ខ្លួនជាអ្នកបម្រើរាស្ត្រ ដោះស្រាយបញ្ចប់វិវាទការងាររវាងកម្មករនិងថៅកែ មុនការបោះឆ្នោតមកដល់ ដើម្បីបញ្ចៀសផលប៉ះពាល់ជីវភាពកម្មករ ព្រមទាំងមុខមាត់រដ្ឋាភិបាល ដោយថា បើពួកគាត់បានដំណោះស្រាយ នោះពួកគេនឹងសម្រេចចិត្តលើសន្លឹកឆ្នោតទៅតាមនោះដែរ។
ការទទូចនេះធ្វើឡើង ខណៈកូដករណាហ្គាវើលដ៍ប្រមាណ១០០នាក់បានបន្តប្រមូលផ្ដុំគ្នាតវ៉ានៅមុខក្រុមហ៊ុនជាថ្មីទៀត នៅថ្ងៃសុក្រនេះ ទាមទារឱ្យមានដំណោះស្រាយវិវាទការងារដែលអូសបន្លាយជាង១ឆ្នាំ ខណៈការចរចាជាមួយតំណាងក្រុមហ៊ុន ក្រោមការសម្របសម្រួលរបស់ក្រសួងការងារ មិនទទួលបានលទ្ធផល។
ជាការកត់សម្គាល់ ក្នុងការប្រមូលផ្តុំតវ៉ានៅថ្ងៃនេះ ក្រុមកូដករបានផ្លុំប៉ី វាយស្គរ កាន់បដា ដោយមានខ្លឹមសារទាមទារដំណោះស្រាយការងារ និងសេរីភាពសហជីព។
កូដករ និងជាសមាជិកសហជីពបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ អ្នកស្រី ប៊ន ស៊ីណា លើកឡើងនៅកន្លែងកូដកម្មនោះថា ការដែលគាត់បន្តចេញតវ៉ានេះ គឺក្រោមហេតុផលទាមទារការគោរពសិទ្ធិសហជីពនៅកន្លែងការងារ និងជំរុញឱ្យមានដំណោះស្រាយបញ្ចប់វិវាទឱ្យបានឆាប់ ព្រមទាំងដោះលែងប្រធានសហជីពរបស់ពួកគេ គឺកញ្ញា ឈឹម ស៊ីថរ។
អ្នកស្រីមើលឃើញថា កត្តាដែលធ្វើឱ្យវិវាទនេះអូសបន្លាយ និងមិនអាចរកច្រកចេញបាន គឺបណ្តាលមកពីក្រុមហ៊ុនមានចេតនាចង់បំបិទសហជីពឯករាជ្យ ដែលតែងការពារសិទ្ធិកម្មករពីក្នុងក្រុមហ៊ុនតែម្តង ខណៈក្រសួងការងារពុំបានបំពេញតួនាទីរបស់ខ្លួនបានត្រឹមត្រូវ ក្នុងការដាក់សម្ពាធឱ្យថៅកែគោរពច្បាប់ការងារ និងច្បាប់សហជីពនៅកម្ពុជា។
អ្នកស្រីទទូចរដ្ឋាភិបាលបំពេញតួនាទីរបស់ខ្លួនជាអ្នកបម្រើរាស្ត្រ ដោះស្រាយបញ្ចប់វិវាទការងារនេះ និងជំរុញថៅកែគោរពច្បាប់នៅកម្ពុជា មុនការបោះឆ្នោតជាតិមកដល់។
អ្នកស្រី ប៊ន ស៊ីណា និយាយថា៖ «ជិតបោះឆ្នោតដែរហើយ ខ្ញុំសុំរដ្ឋាភិបាល ក៏ដូចជាក្រសួងការងារ ក្រសួងពាក់ព័ន្ធទាំងអស់ ជួយជំរុញឱ្យថៅកែណាហ្គាវើលដ៍គោរពច្បាប់ និងដោះស្រាយវិវាទការងារនេះទៅ ព្រោះថា វាគ្រាន់តែវិវាទតូចមួយ អូសបន្លាយរយៈពេលមួយឆ្នាំជាងហើយ។ ស្រុកខ្មែរយើងមិនដែលមានទេ កូដកម្មរយៈពេលមួយឆ្នាំជាងនេះ តែឥលូវមានហើយ។ អ៊ីចឹងសុំឱ្យរដ្ឋាភិបាល គាត់មានតួនាទីការពារប្រជាជន ក៏ដូចជាកម្មករ អ៊ីចឹងសូមឱ្យគាត់ជួយដោះស្រាយផង ដើម្បីកម្មករមានប្រាក់ខែសម្រាប់ចិញ្ចឹមគ្រួសារ មានប្រាក់ខែសមរម្យ កាត់បន្ថយភាពក្រីក្ររបស់ប្រជាជនយើងនៅក្នុងប្រទេសនេះ»។
កូដករមួយរូបទៀត លោក បៀន រុណដាវិដ អះអាងថា ការដែលកូដករនៅបន្តការតវ៉ានេះ ដោយសារតែការចរចារវាងថៅកែ ក្រសួងការងារ និងតំណាងកូដករ មិនទាន់ទទួលបានលទ្ធផលដោយយុត្តិធម៌នៅឡើយ។ កូដកររូបនេះបន្តថា ការអូសបន្លាយវិវាទនេះ គឺមានតែធ្វើឱ្យកម្មករមានជីវភាពយ៉ាប់យ៉ឺនទៅ រីឯរដ្ឋាភិបាលនឹងកាន់តែរងការរិះគន់ពីសំណាក់មតិជាតិនិងអន្តរជាតិ។
លោក បៀន រុណដាវិដ បន្តថា៖ «ក្នុងនាមខ្ញុំជាប្រជាពលរដ្ឋ ជាកម្មករផង ខ្ញុំចង់ឱ្យរាជរដ្ឋាភិបាលដោះស្រាយគ្រប់បញ្ហាទាំងអស់ ទាំងរឿងដីធ្លី ទាំងរឿងពួកខ្ញុំ រឿងកម្មករ រឿងសហជីពអីហ្នឹង គឺចង់ឱ្យរដ្ឋាភិបាលមានការដោះស្រាយឱ្យបានល្អ ឱ្យបានសមរម្យ ដូចថាជួយឱ្យប្រជាពលរដ្ឋហ្នឹងសប្បាយចិត្តតិចទៅប្រជាពលរដ្ឋអាចនឹងបោះឆ្នោតឱ្យអ៊ីចឹងទៅណា អ៊ីចឹងខ្ញុំចង់ឃើញអ្វីៗល្អមុនបោះឆ្នោតហ្នឹង»។
លោកបញ្ជាក់ថា ពួកគាត់នឹងមិនឈប់ធ្វើកូដកម្មទេ បើគ្មានដំណោះស្រាយតាមច្បាប់ការងារនោះ បើទោះលោកអះអាងថាការធ្វើកូដកម្មអហិង្សាអស់រយៈពេលជាង១ឆ្នាំមកនេះ បានរងនូវការគំរាមកំហែងបំភិតបំភ័យពីសំណាក់ក្រុមហ៊ុន និងអាជ្ញាធរក៏ដោយ។
បើតាមក្រុមកូដករ បច្ចុប្បន្ន នៅសល់បុគ្គលិកជាង១០០នាក់ប៉ុណ្ណោះដែលទាមទារចូលធ្វើការវិញតាមច្បាប់ និងកិច្ចសន្យាការងារ ខណៈបុគ្គលិកដែលគ្មានឈ្មោះកាត់ចំនួនជាង៣០០នាក់ទៀត នៅបន្តស្ម័គ្រចិត្តដោះដូរឈ្មោះឱ្យពួកគេដដែល។
វីអូឌី មិនទាន់អាចសុំការបញ្ជាក់ពីតំណាងក្រុមហ៊ុនណាហ្គាវើលដ៍ និងអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ជុំវិញការតវ៉ារបស់កូដករនេះបានទេ នៅថ្ងៃសុក្រនេះ។
តែយ៉ាងណា លោក ហេង សួរ បានប្រាប់វីអូឌីតាមសារតេឡេក្រាមកាលពីថ្ងៃទី២៣ ខែធ្នូ ឆ្នាំ២០២២ យ៉ាងខ្លីថា ក្រសួងការងារ បន្តអនុវត្តច្បាប់ និងសុំឱ្យគ្រប់ភាគីគោរពច្បាប់និងយន្តការនានាដែលនៅជាធរមាននៅកម្ពុជា ជាជាងបកស្រាយខ្លឹមសារផ្ទុយពីស្ថាប័នសមត្ថកិច្ច។
ប្រធានសម្ព័ន្ធសហជីពកម្ពុជា អ្នកស្រី យ៉ាង សុភ័ណ្ឌ ធ្លាប់លើកឡើងថា វិវាទការងារនៅក្រុមហ៊ុនណាហ្គាវើលដ៍នេះ នៅមានផ្លូវ និងយន្តការដោះស្រាយបញ្ចប់ដោយយុត្តិធម៌។ អ្នកស្រីថា ទាំងកម្មករ និងក្រុមហ៊ុន សុទ្ធតែមានជម្រើស ជាក់ស្តែងកម្មករដែលគ្មានឈ្មោះកាត់ជាច្រើននាក់ សុខចិត្តដោះដូរជាមួយកម្មករដែលត្រូវក្រុមហ៊ុនបញ្ឈប់ត្រឹមចំនួនតិចជាង ខណៈក្រុមហ៊ុនទាមទារបញ្ឈប់បុគ្គលិកនូវចំនួនកំណត់មួយ។
វិវាទការងារក្រុមហ៊ុនណាហ្គាវើលដ៍បានកើតឡើងជាង១ឆ្នាំមកហើយ ក្រោយពេលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩។ យ៉ាងណា បុគ្គលិកដែលចេញធ្វើកូដកម្មជាង១២ខែមកនេះ អះអាងថា ការបញ្ឈប់នោះ ដោយសារថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះ។
ក្រៅពីនោះ កូដករណាហ្គាវើលដ៍ប្រមាណ១០រូបក៏ត្រូវបានសាលាដំបូងរាជធានីភ្នំពេញកោះហៅឱ្យចូលបំភ្លឺជាបន្តបន្ទាប់នាពេលថ្មីៗនេះ ក្រោមបណ្តឹងចំនួន៣របស់ក្រុមហ៊ុន រួមមាន បទរំលោភលើលំនៅឋាន, ធ្វើឱ្យខូចខាតដោយចេតនាស្ថានទម្ងន់ទោស និងចាប់ឃុំឃាំងនិងបង្ខាំងដោយខុសច្បាប់ ដែលក្រុមហ៊ុនបានប្តឹងពួកគេ ខណៈប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ត្រូវបានសមត្ថកិច្ចចាប់ខ្លួន និងបញ្ជូនទៅឃុំខ្លួននៅពន្ធនាគារព្រៃស រាជធានីភ្នំពេញ ពាក់ព័ន្ធបទល្មើសបម្រាម ឬគេចវេះពីការត្រួតពិនិត្យរបស់តុលាការ ក្រោយពេលកញ្ញាបានធ្វើដំណើរត្រលប់មកពីប្រជុំនៅប្រទេសអូស្ត្រាលីវិញ៕