ប្រជាជនមួយចំនួននៅរាជធានីភ្នំពេញ និងខេត្តមួយចំនួន ព្រួយបារម្ភពីការឆ្លងរីករាលដាលនៃជំងឺកូវីដ-១៩ នៅកម្ពុជាឡើងវិញ បន្ទាប់ពីរដ្ឋាភិបាលបានលុបចោលលក្ខខណ្ឌតម្រូវមួយចំនួន ចំពោះអ្នកដំណើរបរទេសចូលមកប្រទេសកម្ពុជា។
ពលរដ្ឋម្នាក់រស់នៅទីក្រុងភ្នំពេញដែលសុំមិនបញ្ចេញឈ្មោះបានលើកឡើងថាការលុបចោលនូវលក្ខខណ្ឌទាំងនេះ គឺមិនមែនជាជម្រើសល្អនោះទេ ពីព្រោះវាគឺជារឿងប្រថុយប្រថានខ្លាំងណាស់។
ពលរដ្ឋម្នាក់រស់នៅទីក្រុងភ្នំពេញរូបនេះបន្តថា៖ «ទោះបីជាករណីឆ្លងវីរុសនេះ បច្ចុប្បន្នបានធ្លាក់ចុះក៏ដោយ តែយើងគួរតែការពារប្រសើរជាងព្យាបាល»។
ពលរដ្ឋរូបនេះបានរំឭកថា ករណីឆ្លងវីរុសកូវីដ-១៩ ដែលបានកើតឡើង ហើយចំលងពេញប្រទេសនោះ គឺភាគច្រើនជាករណីនាំចូលពីក្រៅប្រទេស។
ចំណែកពលរដ្ឋម្នាក់ទៀតនៅឯខេត្តបាត់ដំបង លោក សន សម្បត្តិ បានលើកឡើងថា វាជារឿងល្អ ក្នុងការស្ដារសេដ្ឋកិច្ច និងជាពិសេសវិស័យទេសចរណ៍នៅកម្ពុជា។ ក៏ប៉ុន្តែលោកថា វាជារឿងប្រថុយប្រថានមួយដែរ។
លោក សម្បត្តិ បានលើកឡើងថា៖ «ព្រោះដូចដែលយើងដឹងស្រាប់ហើយថា ទោះបីជាយើងចាក់វ៉ាក់សាំងហើយ ភាគរយនៃការឆ្លងនៅតែមាន ដូចនេះវាជាចំណុចមួយដែលយើងគួរពិចារណាដូចគ្នា»។
លោកបន្តថា វាដូចជាការលុបបំបាត់ចោលការសង្កេតមួយដែរក្នុងគ្រាដែលយើងសង្កេតយើងនៅតែមានការឆ្លង ដែលបង្កដោយសារតែភ្ញៀវទេសចរចុះទម្រាំតែលុបចោលលក្ខខណ្ឌទាំងនេះទៀត។
លោក សម្បត្តិ បន្ថែមទៀតថា៖ «ខ្ញុំគិតថា បើសិនជាមានការធ្វេសប្រហែសអ្វីមួយវាក៏អាចនាំឲ្យមានរលកថ្មីមកប្រទេសកម្ពុជាយើងដូចគ្នា អ៊ីចឹងយើងគួរតែប្រយ័ត្នទាំងអស់គ្នា»។
យ៉ាងណាមិញ ពលរដ្ឋម្នាក់ទៀតនៅខេត្តសៀមរាបឈ្មោះ ធី បានលើកឡើងថា ចំពោះការបើកឲ្យមានដំណើរការទេសចរណ៍ឡើងវិញ ដោយមិនធ្វើចត្តាឡីស័កនិងការលុបចោលលក្ខខណ្ឌទប់ស្កាត់ទាំងអស់នេះ វានឹងធ្វើឱ្យមានហានិភ័យខ្ពស់ ផ្ទុយទៅវិញ ប្រសិនបើយើងនាំគ្នាព្យាយាមគោរពនិងអនុវត្តវិធានការសុខាភិបាលឬការពារខ្លួនដោយរក្សាគម្លាត វានឹងកាត់បន្ថយចំនួនអ្នកឆ្លងនៅកម្ពុជាបាន។
ដោយឡែកព្រះសង្ឃមួយអង្គគង់នៅទីក្រុងភ្នំពេញ បានមានសង្ឃដីកាដោយសុំមិនបញ្ចេញព្រះនាមថា រដ្ឋាភិបាលប្រហែលជាអាចគ្រប់គ្រងករណីឆ្លងកូវីដបាន ហើយម្យ៉ាងទៀត លក្ខខណ្ឌបែបហ្នឹង នៅតាមប្រទេសធំៗមួយចំនួន គេធ្វើបែបនេះយូរមកហើយ។
ព្រះអង្គមានសង្ឃដីកាថា៖ «តែនៅតែមានការព្រួយបារម្ភ ខ្លាចតែមានវីរុសប្រភេទថ្មីមកតាមអ្នកដំណើរអន្តរជាតិ ដោយអាត្មាបានគិតថា ករណីឆ្លងអាចនឹងថយចុះបើសិនជាគ្មានវត្តមាននៃវីរុសប្រភេទថ្មីទេនោះ»។
កាលពីថ្ងៃទី១៧ ខែមីនា ឆ្នាំ២០២២ ក្រសួងសុខាភិបាល បានចេញសេចក្តីប្រកាសមួយ ដោយយោងតាមចំណារឯកភាពរបស់លោកនាយករដ្ឋមន្ត្រី ហ៊ុន សែន លុបចោលលក្ខខណ្ឌតម្រូវមួយចំនួនសម្រាប់ជនបរទេសចូលមកក្នុងប្រទេសកម្ពុជា។ ក្នុងនោះ រួមមាន ទី១.លុបចោលនូវលក្ខខណ្ឌតម្រូវឲ្យអ្នកដំណើរបរទេសត្រូវបង្ហាញលទ្ធផលតេស PCR អវិជ្ជមានក្នុងរយៈពេល៧២ម៉ោង មុនមកដល់កម្ពុជា ទី២.លុបចោលការតម្រូវឲ្យធ្វើតេស្តរហ័សនៅពេលមកដល់កម្ពុជា និងទី៣. គឺអនុញ្ញាតឱ្យមានការបើកដំណើរការឡើងវិញនូវការផ្តល់ទិដ្ឋាពេលមកដល់ (Visa On Arrival) សម្រាប់អ្នកដំណើរអន្តរជាតិទាំងអស់ ទាំងអ្នកដំណើរតាមផ្លូវអាកាស ផ្លូវគោក និងផ្លូវទឹក។
ប៉ុន្តែទោះបីមានការលុបចោលលក្ខខណ្ឌតម្រូវដូចមានចែងក្នុងចំណុចទី១ និងទី២ខាងលើនេះក្តី ក្រសួងសុខាភិបាលបានលើកទឹកចិត្តដល់អ្នកដំណើរទាំងអស់ គប្បីធ្វើតេស្តរហ័សដោយខ្លួនឯង។ ជាមួយគ្នានេះ អ្នកដំណើរទាំងអស់ត្រូវបង្ហាញវិញ្ញាបនបត្របញ្ជាក់ការចាក់វ៉ាក់សាំងកូវីដ-១៩ នៅពេលមកដល់កម្ពុជា។ ហើយចំពោះអ្នកដំណើរដែលពុំបានចាក់វ៉ាក់សាំងកូវីដ-១៩ពេញលេញ ត្រូវធ្វើចត្តាឡីស័ករយៈពេល១៤ថ្ងៃនៅតាមទីតាំងដែលកំណត់ដោយក្រសួងសុខាភិបាល ឬអាជ្ញាធរមានសមត្ថកិច្ច។
គិតត្រឹមថ្ងៃទី២៩ ខែមីនា កម្ពុជាមានអ្នកឆ្លងជំងឺកូវីដ-១៩ សរុប ១៣៥ ៥៥២ ស្លាប់ ៣ ០៥៤នាក់ និងព្យាបាលជាសះស្បើយចំនួន ១៣១ ៥២៧នាក់។ ក្នុងចំណោមអ្នកឆ្លងសរុប មានករណីនាំចូលពីក្រៅប្រទេសចំនួន ២១ ២០៨នាក់៕