ពលរដ្ឋមួយចំនួននៅរាជធានីភ្នំពេញមួយរយៈពេលចុងក្រោយ ហាក់ពុំសូវព្រួយបារម្ភខ្លាំងអំពីការឆ្លងជំងឺកូវីដ-១៩ បំប្លែងថ្មី «អូមីក្រុង» នោះទេ ដោយពួកគេយល់ឃើញថា កូវីដ-១៩ប្រភេទថ្មី ជាជំងឺម្យ៉ាងដែលងាយស្រួលព្យាបាលនិងគ្មានផលប៉ះពាល់អ្វីខ្លាំងដល់អាយុជីវិតនោះទេ ខណៈមន្ត្រីក្រសួងសុខាភិបាលថា ការយល់បែបនេះមិនត្រឹមត្រូវនោះទេ។
បុគ្គលិកបម្រើការនៅក្នុងផ្សារទំនើបមួយកន្លែងស្ថិតនៅក្នុងទីក្រុងភ្នំពេញ លោក ហាក់ បូណ៌មី បានបង្ហាញការយល់ឃើញថា ជំងឺកូវីដ-១៩ បំប្លែងថ្មី «អូមីក្រុង» ជាជំងឺធម្មតាម្យ៉ាង ដែលមិនបង្កការធ្លាក់ខ្លួនឈឺធ្ងន់ ឬយូរ ដូចវីរុសបំប្លែងថ្មីមុនៗនោះទេ។ ដោយលទ្ធភាពនៃការជាសះស្បើយនៃជំងឺនេះមានល្បឿនលឿនជាងជំងឺកូវីដ-១៩ ប្រភេទធម្មតា។
លោក ហាក់ បូណ៌មី មានអាយុ ២៨ឆ្នាំ រស់នៅសង្កាត់ទឹកថ្លា ខណ្ឌសែនសុខ បានថ្លែងថា៖ « បើយើងគិតទៅជាជំងឺធម្មតាក៏បាន កូវីដ-១៩ បំប្លែងថ្មីវាអត់ដូចអាចាស់ទេ! អាថ្មីហ្នឹងវាព្យាយាមលក្ខណៈថា វាឈឺអាចប្រើរយៈពេលយូរ (ជំងឺកូវីដ-១៩ប្រភេទមុន) វាឈឺបីថ្ងៃឬមួយពីរថ្ងៃ បួនថ្ងៃអស់ហើយ។ វាឆាប់ជាទេ ឱ្យតែយើងប្រើថ្នាំលេប»។
បុគ្គលិកបម្រើការនៅផ្សារទំនើបដដែលនេះបានបន្តទៀតថា សម្រាប់ជំងឺកូវីដ-១៩បំប្លែងថ្មី អូមីក្រុងនេះ លោកហាក់ដូចជាមិនសូវព្រួយបារម្ភខ្លាំងនោះទេ។ ដោយសារ បច្ចុប្បន្ននេះ ការប្រើប្រាស់ថ្នាំសម្រាប់ព្យាបាលជំងឺកូវីដ-១៩បំប្លែងថ្មីនេះ គឺមានប្រសិទ្ធភាព និងលោកយល់ថា វីរុសបំប្លែងថ្មីអូមីក្រុងនេះ វាបំប្លែងខ្លួនដូចជំងឺផ្តាសាយផងដែរ។
លោក ហាក់ បូរមី បានបញ្ជាក់បន្ថែមថា៖ «គ្មានចាំបាច់ព្រួយបារម្ភខ្លាំងដូចលើកមុនទេ។ ដោយសារឥឡូវថ្នាំឥឡូវមានប្រសិទ្ធភាព ដាក់ទៅវាត្រូវអ៊ីចឹងណា។ វាឈឺទៅ បំប្លែងខ្លួនដូចផ្តាសាយអ៊ីចឹង វាចម្លងលឿនជាងផ្តាសាយ អ៊ីចឹងបើយើងចាត់ទុកជាជំងឺផ្តាសាយម្យ៉ាងទៀតចុះអាហ្នឹង»។
បើតាមយុវជនម្នាក់ទៀតក៏មានការលើកឡើងស្រដៀងគ្នានេះដែរ គឺលោក ម៉ាន គឹមសាន បានប្រាប់ថា ជំងឺកូវីដ-១៩ បំប្លែងថ្មី ប្រភេទអូមីក្រុង មិនមែនជាជំងឺដែលគួរឱ្យព្រួយខ្លាំងដូចជាជំងឺកូវីដ-១៩ ប្រភេទ ដែលតា (Delta) នោះទេ។ លោកយល់ថា ជំងឺកូវីដ-១៩ បំប្លែងថ្មីអូមីក្រុង ជាជំងឺដែលស្រួលព្យាបាល និងដោយសារតែការចាក់វ៉ាក់សាំងបានគ្រប់គ្រាន់ផងដែរ។
លោក ម៉ាន គឹមសាន មានអាយុ ២២ឆ្នាំ រស់នៅភូមិព្រែក សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ បានលើកឡើងថា៖ «និយាយទៅជំងឺហ្នឹង មិនត្រូវព្រួយបារម្ភខ្លាំងពេកនោះទេ ព្រោះអីជំងឺហ្នឹងវាមិនកាចសាហាវដូចជំងឺ Delta នោះទេ។ ពីព្រោះ ទី១.ដោយសារងាយស្រួលព្យាបាល ទី២.យើងបានការពារវាមុន ចាក់វ៉ាក់សាំងមកដល់ថ្ងៃនេះបាន ៣-៤ ដូសហើយ អ៊ីចឹង នៅពេលដែលយើងកើតវា វាងាយស្រួលព្យាបាលលឿនអ៊ីចឹង»។
លើសពីនេះទៅទៀត បើតាមយុវតីម្នាក់ទៀត កញ្ញា រដ្ឋា ស្រីនុត ដែលជានិស្សិតកំពុងបន្តការសិក្សានៅភ្នំពេញបានបង្ហាញទស្សនៈយល់ឃើញពាក់ព័ន្ធទៅជំងឺកូវីដ-១៩បំប្លែងថ្មី អូមីក្រុងនេះថា ជាជំងឺមួយដែលគ្មានបញ្ហាអ្វីគួរឱ្យព្រួយបារម្ភខ្លាំង ឬ ក៏គ្រោះថ្នាក់ធ្ងន់ធ្ងរខ្លាំងនោះទេ។ ព្រោះកញ្ញាយល់ថា កម្រិតនៃការឆ្លងវីរ៉ុសបំប្លែងថ្មី អូមីក្រុង គឺមានស្ថានភាពស្រាលជាង ជំងឺកូវីដ-១៩ ប្រភេទ Delta, Alpha។ ហើយមួយវិញទៀត ថ្វីដ្បិតវីរុសបំប្លែងថ្មី អូមីក្រុង មានការឆ្លងលឿន ប៉ុន្តែការព្យាបាលងាយស្រួលព្យាបាល និងឆាប់ជាសះស្បើយទៀតផង។
កញ្ញា រដ្ឋា ស្រីនុត បានអះអាងថា៖ «តាមពិតទៅបើនិយាយទៅ វាគ្មានបញ្ហា ឬ គ្រោះថ្នាក់ខ្លាំងទេ។ វាជាវីរុសកម្រិតស្រាលពីវីរុស Delta, Alpha អ៊ីចឹងបើនិយាយទៅស្រាលជាងឆ្ងាយ ប៉ុន្តែវាងាយនឹងឆាប់ឆ្លងអ៊ីចឹង។ បើសម្រាប់ខ្ញុំ វាអត់មានផលវិបាកអីធ្ងន់ធ្ងរនោះទេ! តែបើតាមខ្ញុំដឹង វីរុសហ្នឹងវាឆាប់ឆ្លង ប៉ុន្តែក៏ព្យាបាលឆាប់ជាដែរ»។
ផ្ទុយពីការលើកឡើងខាងលើ លោកស្រីវេជ្ជបណ្ឌិត ឱ វណ្ណឌីន រដ្ឋលេខាក្រសួងសុខាភិបាល បានណែនាំ អំពីលទ្ធភាពនៃការវាយលុករបស់វីរុសកូវីដ-១៩ បំប្លែងថ្មីអូមីក្រុងមកលើសរីរាង្គកាយមនុស្ស ដែលជារឿងមួយមិនអាចធ្វេសប្រហែសបាន។ លោកស្រីវេជ្ជបណ្ឌិតបានបញ្ជាក់បន្ថែមថា ជំងឺកូវីដ-១៩ មិនមែនជាជំងឺផ្តាសាយក្នុងលក្ខណៈធម្មតា និងមិនមែនជាជំងឺសាមញ្ញទេ។ ថ្វីដ្បិតតែវីរ៉ុសបម្លែងថ្មីនេះ មានលក្ខណៈស្រាលក៏ពិតមែន ប៉ុន្តែដោយសារតែការចាក់វ៉ាក់ស៊ាំងចូលសហគមន៍បានច្រើនតែប៉ុណ្ណោះ។
លោកស្រី ឱ វណ្ណឌីន បានធ្វើការឆ្លើយតបកាលពីថ្ងៃទី១៧ ខែមីនា ឆ្នាំ២០២២ថា៖ «សូមកុំភ្លេចថា សរីរាង្គកាយយើង ប្រហែលជានឹងអាចមានការប៉ះពាល់សុខភាពតិចក្តី ឬច្រើនក្តី ក្រោយឆ្លងជំងឺកូវីដ-១៩ ប្រសិនជាយើងមិនមានកងការពារក្នុងខ្លួនយើងរឹងមាំទេនោះ។ ការចាក់វ៉ាក់ស៊ាំងដូសទី៣ ឬដូសជម្រុញ នាពេលនេះនឹងជួយពង្រឹងកងការពារនេះ ដើម្បីទប់ស្កាត់ការវាយលុកធ្ងន់ធ្ងរលើសរីរាង្គបុគ្គល និងជួយសង្រ្គោះអាយុជីវិតមនុស្សផងដែរ»។
ប្រធានសមាគមគ្រូពេទ្យគុណធម៌ លោកវេជ្ជបណ្ឌិត អ៊ូច វុទ្ធី បានបង្ហាញទស្សនៈយល់ឃើញថា ជំងឺកូវីដ-១៩បំប្លែងថ្មីអូមីក្រុងនេះ ជាជំងឺមួយដែលងាយស្រួលព្យាបាល ប្រសិនជាយើងរកចំណុចខ្សោយវាឃើញ។ លោក អ៊ូច វុទ្ធី បានបញ្ជាក់បន្តទៀតថា ប្រភេទវីរុសបំប្លែងថ្មីហ្នឹង ប្រហែលជាអាចបញ្ចប់ត្រឹមពូជអូមីក្រុងហ្នឹងហើយ និងបានណែនាំ ប្រជាពលរដ្ឋកុំភ័យស្លន់ស្លោខ្លាំងពេក ពោលគឺត្រូវចេះរៀនរស់នៅនឹងជំងឺកូវីដ-១៩ ប្រភេទបំប្លែងថ្មីអូមីក្រុងដោយអនុវត្តការប្រុងប្រយ័ត្ន និងការពារខ្លួនឱ្យបានត្រឹមត្រូវផងដែរ។
លោកវេជ្ជបណ្ឌិត មានប្រសាសន៍ថា៖ «កូវីដ-១៩បំប្លែងថ្មី អូមីក្រុងក្រោយនេះបញ្ជាក់ដូចខ្ញុំលើកឡើងអ៊ីចឹងប្រហែលជាវាបញ្ចប់ជីវិតពូជអូមីក្រុងហ្នឹងហើយ។ បើអ៊ីចឹងទេ បងប្អូនគួរណាកុំភ័យស្លន់ស្លោ ប៉ុន្តែយើងរៀនរស់នឹងកូវីដ! បាទត្រូវចេះប្រយ័ត្ន ការពារខ្លួនព្រោះអូមីក្រុងវាឆ្លងលឿន ក៏បាត់លឿនដែរ។ ហើយបើយើងដឹងចំណុចខ្សោយវា យើងប្រើថ្នាំតែល្មមវាជាហើយ»។ គួររំឮកផងដែរថា ជំងឺកូវីដ-១៩ បំប្លែងថ្មី ប្រភេទអូមីក្រុងបានឆ្លងចូលក្នុងប្រទេសកម្ពុជាពាក់កណ្តាលខែធ្នូ ឆ្នាំ២០២១។
គិតត្រឹមថ្ងៃទី៣០ ខែមីនា នេះ កម្ពុជាមានអ្នកឆ្លងជំងឺកូវីដ-១៩ចំនួន ១៣៥ ៥៨៥នាក់ ស្លាប់៣ ០៥៤នាក់ និងជាសះស្បើយចំនួន ១៣១ ៥៩៨នាក់។ ចំណែកករណីនាំចូលពីក្រៅប្រទេសសរុប ២១ ២០៨ ខណៈករណីអូមីក្រុងឆ្លងក្នុងសហគមន៍១៣ ៧៩៣នាក់៕
អត្ថបទដោយ ប៊ុនឈូ ពលរដ្ឋអ្នកសារព័ត៌មាន
