ឯកសាររបស់រដ្ឋាភិបាលដែលបានចេញផ្សាយកាលពីសប្តាហ៍មុន បង្ហាញពីដីរដ្ឋរាប់រយហិកតា ដែលត្រូវបានធ្វើឯកជនភាវូបនីយកម្មសម្រាប់បុគ្គល និងក្រុមហ៊ុនដែលមានទំនាក់ទំនងគ្នានៅទូទាំងប្រទេស។
សៀវភៅរាជកិច្ចចំនួន ១២ភាគ ត្រូវបានបោះពុម្ពកាលពីថ្ងៃពុធ ដែលជាការចងក្រងនៃបទបញ្ជា និងសេចក្តីសម្រេចរបស់រដ្ឋាភិបាលដែលមានតាំងពីចុងឆ្នាំមុន។ ប្រហែល ១០០ ភាគត្រូវបានចេញផ្សាយជារៀងរាល់ឆ្នាំ ដោយមានការពន្យារពេលពីរបីខែរវាងការសម្រេចចិត្ត និងការបោះពុម្ពផ្សាយ។
ឯកសារចុងក្រោយបំផុតមានយ៉ាងហោចណាស់៨ បង្ហាញពីឯកជនភាវូបនីយកម្មដីរបស់រដ្ឋ។ ដីទំហំប្រមាណ ៣៦ ០០០ ហិកតា ដែលរដ្ឋបានផ្តល់សម្បទានសេដ្ឋកិច្ចទៅក្រុមហ៊ុន Union Development Group ដែលជាគម្រោងដ៏ធំគ្រប់គ្រងដោយជនជាតិចិន ដែលត្រូវបានចោទប្រកាន់ពីបទបណ្តេញពលរដ្ឋចេញពីលំនៅឋានដោយបង្ខំ។ ឧទ្យានជាតិបុទុមសាគរ ដែលមាន ផ្ទៃដីប្រមាណ ១ ១៥៤ ហិកតា ត្រូវបានកំណត់ឡើងវិញ ដើម្បីប្រគល់ជូនប្រជាពលរដ្ឋដែលមិនមានចំនួនច្បាស់លាស់។
លើសពីនេះ ផ្ទៃដីប្រហែល ៦០០ ហិកតានៃតំបន់ដែលគ្រប់គ្រងដោយរដ្ឋផ្សេងទៀតរួមមាន បឹង ព្រៃឈើ ភ្នំ កំពង់ផែ និងអតីតសម្បទានសេដ្ឋកិច្ច ក៏ត្រូវបានធ្វើឯកជនភាវូបនីយកម្ម។
អ្នកស្រី ហ៊ុន សេងនី ដែលជាប្អូនស្រីបង្កើតរបស់លោកនាយករដ្ឋមន្ត្រី ហ៊ុន សែន និងឧកញ៉ា ឡាញ់ ភារ៉ា ទទួលបានដីបឹងតាមោក ឬបឹងទំនប់កប់ស្រូវ រាជធានីភ្នំពេញ ចំនួន ២០ហិកតា។
ដោយឡែក ធនាគារកាណាឌីយ៉ាទទួលបានដី ១០ហិកតានៅស្រុកព្រៃនប់ ខេត្តព្រះសីហនុ ខណៈក្រុមហ៊ុន Premier Land ដែលជាក្រុមហ៊ុនគ្រប់គ្រងដោយកូនស្រី និងកូនប្រសាររបស់លោក លី យ៉ុងផាត់ ជាសមាជិកព្រឹទ្ធសភាគណបក្សកាន់អំណាច បានទទួលដីចំនួន ១៣០ហិកតា ពីកំពង់ផែស្វយ័តក្រុងព្រះសីហនុ។
ការផ្តល់ដីចំនួនបួនផ្សេងទៀតរួមមានដី ១១៣ ហិកតា ដល់ក្រុមហ៊ុន Fuhai Investment នៅព្រៃនប់។ ៥ ហិកតា នៅបឹងតាមោក ជូនបុគ្គលឈ្មោះ រស់ ព្រីប៊ូ ហើយផ្ទៃដី៤៩ ហិកតា ដែលជាអតីតដីសម្បទានសេដ្ឋកិច្ចក្នុងខេត្តមណ្ឌលគិរី ត្រូវបានប្រគល់ទៅបុគ្គលម្នាក់ទៀត ឈ្មោះ ម៉ី កែវមរកត និងដីភ្នំចំនួន ២៨០ ហិកតាក្នុងខេត្តកំពង់ឆ្នាំង ប្រគល់យោធាដំឡើងស្ថានីយរ៉ាដា។
បន្ថែមពីនេះ នៅខេត្តស្ទឹងត្រែង ផ្ទៃដីគម្របព្រៃឈើដែលមានទំហំ ៩៩ហិកតា រដ្ឋាភិបាលបានសម្រេចកាត់ផ្ទៃដីទំហំ ៦៥ហិកតា ឱ្យប្រជាពលរដ្ឋ ១៩៦គ្រួសារ។
អនុក្រឹត្យទាំងអស់ដែលកាត់ដីរបស់រដ្ឋប្រគល់ទៅឯកជន និងក្រុមហ៊ុនឯកជនទាំងនោះ ត្រូវបានចុះហត្ថលេខាដោយលោក ហ៊ុន សែន។
អ្នកនាំពាក្យរដ្ឋាភិបាលលោក ផៃ ស៊ីផាន មានប្រសាសន៍ថា លោកមិនមានព័ត៌មានអំពីការបែងចែកដីជាក់លាក់នោះទេ រាប់បញ្ចូលទាំងប្អូនស្រីរបស់ ហ៊ុន សេងនី និងឧកញ៉ាផងដែរ។
លោក ផៃ ស៊ីផាន បានមានប្រសាសន៍ថា៖ «ខ្ញុំមិនដឹងថាតើគេកាត់ដីឱ្យឬលក់ឱ្យ និយាយតាមត្រង់ខ្ញុំមិនដឹងទេ»។
លោកបន្តថា៖ «នៅខេត្តព្រះសីហនុ ដីសម្បទានជាធម្មតាត្រូវបានដោះដូរជាមួយបុគ្គល និងក្រុមហ៊ុនឯកជន ដើម្បីជួយផ្តល់មូលនិធិដល់ការអភិវឌ្ឍហេដ្ឋារចនាសម្ព័ន្ធ»។
លោក ផៃ ស៊ីផាន សំដៅលើសំណួរដែលទាក់ទងនឹងការផ្តល់ដីបឹងតាមោកទៅកាន់សាលារាជធានីភ្នំពេញ និងក្រសួងដែនដី ខណៈអភិបាលក្រុងលោក ឃួង ស្រេង និងរដ្ឋមន្ត្រីក្រសួងដែនដីលោក ជា សុផារ៉ា មិនអាចទាក់ទងសុំការបំភ្លឺបានទេកាលពីថ្ងៃសុក្រ។
ស្ត្រីម្នាក់បានលើកលេខទូរសព្ទរបស់លោក ពុង ឃាវសែ ប្រធានក្រុមហ៊ុនកាណាឌីយ៉ា គ្រុប បាននិយាយថា ធនាគារទទួលបានដីនេះព្រោះវាជាកម្មសិទ្ធិរបស់ “អតិថិជនរយៈពេលវែង” ដែលបានខ្ចីប្រាក់ ប៉ុន្តែបានបំពានលក្ខខណ្ឌបញ្ចាំ។
ស្ត្រីម្នាក់នេះសុំបដិសេធមិនបញ្ចេញឈ្មោះ និងថាគាត់ជា “មន្ត្រី” បាននិយាយថា៖ «វាមិនត្រូវបានផ្តល់ឱ្យទេ ហើយបងប្រុសមិនគួរយល់ច្រឡំអំពីរឿងនេះទេ មានឯកសារត្រឹមត្រូវដែលបានបញ្ចាំជាមួយក្រុមហ៊ុនកាណាឌីយ៉ា»។
អ្នកសារព័ត៌មានដែលហៅទូរសព្ទទៅធនាគារត្រូវបានឆ្លងកាត់អ្នកតំណាងក្រុមហ៊ុនជាច្រើននាក់ មុនពេលត្រូវបានគេប្រាប់ថាខ្លួនគ្មានព័ត៌មានអ្វីលម្អិតអំពីដី។
វីអូឌី មិនអាចសុំទាក់ទងអ្នកស្រី លី អាផន ម្ចាស់ក្រុមហ៊ុន Premier Land ដែលត្រូវជាកូនស្រីរបស់លោក លី យ៉ុងផាត់ និងលោក សេង ញ៉ក់ ដែលជាកូនប្រសារ តាមរយៈលេខក្នុងបញ្ចីបានទេ ខណៈបុគ្គលិកម្នាក់ដែលបានលើកទូរសព្ទក្រុមហ៊ុនថានាងនឹងសួរអ្នកគ្រប់គ្រងអំពីរឿងដីនេះឱ្យ។
អភិបាលខេត្តកោះកុង លោកស្រី មិថុណា ភូថង បានមានប្រសាសន៍ថាលោកស្រីជាប់រវល់ និងបដិសេធមិនធ្វើអត្ថាធិប្បាយទេ៕
បកប្រែ និងសម្រួលដោយ កញ្ញា សម ពេជ្រចិន្តា និង កញ្ញា ឃ្លាំង គីមហួយ ពីអត្ថបទដើមភាសាអង់គ្លេស៖ Hun Sen’s Sister, Canadia Bank, Senator’s Family Receive State-Land Plots