តំណាងស្ថានទូតរុស្ស៊ីនៅកម្ពុជា មិនចេញមកទទួលញត្តិរបស់ក្រុមយុវជន សង្គមស៊ីវិល ដែលបានដាក់ទៅស្ថានទូតមួយនេះដើម្បីស្នើឱ្យបញ្ចប់សង្គ្រាម និងបញ្ឈប់ការឈ្លានពានទៅលើប្រទេសអ៊ុយក្រែន។
ការបដិសេធទទួលយកញត្តិនេះ ធ្វើឡើងនាព្រឹកថ្ងៃទី៥ ខែមេសា ឆ្នាំ២០២២ នៅពេលតំណាងយុវជនជាច្រើននាក់បានព្យាយាមយកញត្តិទៅដាក់នៅស្ថានទូតរុស្ស៊ីតាមការគ្រោងទុករបស់ខ្លួន។
បើតាមខ្លឹមសារនៃញត្តិនោះ ក្រុមសមាគមសម្ព័ន្ធនិស្សិតបញ្ញវន្តខ្មែរ និងយុវជនស្រលាញ់សន្តិភាពមួយចំនួនបានអំពាវនាវទៅប្រធានាធិបតីប្រទេសរុស្ស៊ី លោក ផ្លាឌីមៀ ពូទីន(VLADIMIR PUTIN) ឱ្យបញ្ឈប់ជាបន្ទាន់នូវសង្គ្រាមនៅអ៊ុយក្រែន និងជ្រើសរើសវិធីសាស្ត្រចរចា ដោយបង្កលក្ខណៈងាយស្រួលសម្រាប់ការផ្គត់ផ្គង់ និងចែកចាយជំនួយមនុស្សធម៌ទៅកាន់ប្រជាជនស៊ីវិលអ៊ុយក្រែន ព្រមទាំងស្តារសន្តិភាពពិភពលោកជាដើម។
យ៉ាងណា តំណាងក្រុមយុវជន បានសម្តែងការខកចិត្តចំពោះតំណាងស្ថានទូតរុស្ស៊ីដែលមិនព្រមចេញមកទទួលញត្តិរបស់ពួកគេពេលនេះ។
រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនមកលើអ៊ុយក្រែន កាលពីដើមខែកុម្ភៈ ពោលគឺបន្ទាប់ពីការប្រកាសសង្រ្គាមមួយដោយប្រធានាធិបតីរុស្ស៊ី លោក វ្លាឌីមៀ ពូទីន ដែលបានធ្វើឱ្យបណ្តាប្រទេសមួយចំនួន រួមនឹងសហភាពអឺរ៉ុបបានសម្រេចដាក់ទណ្ឌកម្មជាបន្តបន្ទាប់លើរុស្ស៊ី៕
