ធនាគារអភិវឌ្ឍន៍អាស៊ី (ADB) បានព្យាករថា សេដ្ឋកិច្ចកម្ពុជានឹងកើនឡើង ៥,៣% នៅឆ្នាំ២០២២ និង ៦,៥% នៅឆ្នាំ២០២៣ ដោយសារកំណើននៃការនាំចេញទំនិញ និងលំហូរវិនិយោគផ្ទាល់ពីបរទេស។
សេចក្ដីប្រកាសព័ត៌មានរបស់ ADB ដែលបានផ្សព្វផ្សាយនៅថ្ងៃពុធនេះ លើកឡើងថា យោងតាមរបាយការណ៍ទស្សនវិស័យអភិវឌ្ឍន៍អាស៊ី (ADO) ឆ្នាំ២០២២ ផលិតកម្មឧស្សាហកម្មត្រូវបានរំពឹងថានឹងកើនឡើង ៨,១% នៅឆ្នាំនេះ និង ៩,១% នៅឆ្នាំក្រោយ ហើយកំណើននេះក៏នឹងជំរុញដល់ការអនុវត្តយុទ្ធសាស្ត្រអភិវឌ្ឍន៍វិស័យកាត់ដេរ ផលិតស្បែកជើង និងកាបូប ផងដែរ។
សេចក្ដីប្រកាសព័ត៌មានដដែលបន្តថា ការនាំចេញទំនិញនិងសេវាកម្មត្រូវបានព្យាករថានឹងកើនឡើងនៅឆ្នាំនេះនិងឆ្នាំក្រោយ ដោយសារកំណើនតម្រូវការក្រៅស្រុកលើផលិតផលកម្ពុជា ព្រមជាមួយនឹងការងើបឡើងវិញជាបណ្ដើរៗនៃវិស័យទេសចរណ៍ ខណៈវិស័យសេវាកម្មត្រូវបានព្យាករថានឹងងើបឡើងវិញនៅកម្រិត ៤,៨% ក្នុងឆ្នាំ២០២២ និងកើនដល់ ៦,៨% ក្នុងឆ្នាំ២០២៣។
ក្នុងរបាយការណ៍នេះក៏បានអំពាវនាវដល់រដ្ឋាភិបាលកម្ពុជាធ្វើពិពិធកម្មសេដ្ឋកិច្ចរបស់ខ្លួន ដើម្បីជំរុញកំណើនប្រកបដោយចីរភាព។
នាយកស្ដីទីប្រចាំប្រទេសកម្ពុជារបស់ ADB លោក Anthony Gill បានលើកឡើងក្នុងសេចក្ដីប្រកាសព័ត៌មានថា៖ «កំណើនសេដ្ឋកិច្ចរបស់ប្រទេសកម្ពុជាបានងើបឡើងវិញដល់ប្រមាណ ៣% ក្នុងឆ្នាំ២០២១ បន្ទាប់ពីបានធ្លាក់ចុះ ៣,១% ក្នុងឆ្នាំ២០២០។ រាជរដ្ឋាភិបាលបានអនុវត្តគោលនយោបាយនានា ដើម្បីកាត់បន្ថយផលប៉ះពាល់អវិជ្ជមាននៃកូវីដ-១៩ មកលើអាជីវកម្ម និងប្រាក់ចំណូលរបស់ប្រជាពលរដ្ឋ និងគាំទ្រដល់ការស្ដារសេដ្ឋកិច្ចឡើងវិញ»។
លោកបន្ថែមថា ការចាក់វ៉ាក់សាំងប្រឆាំងនឹងកូវីដ-១៩ បានអនុញ្ញាតឱ្យកម្ពុជាបើកព្រំដែនរបស់ខ្លួនឡើងវិញ សម្រាប់ពាណិជ្ជកម្មនិងទេសចរណ៍ ដែលនាំទៅរកការរំពឹងទុកវិជ្ជមាននៃកំណើនសេដ្ឋកិច្ចសម្រាប់ឆ្នាំនេះ និងឆ្នាំ២០២៣។
លោក Anthony Gill បានថ្លែងទៀតថា៖ «ការបង្កើនពាណិជ្ជកម្មនិងទេសចរណ៍តែមួយមុខ នឹងមិនគ្រប់គ្រាន់ដើម្បីជួយកម្ពុជាឱ្យមាននិរន្តរភាពកំណើនសេដ្ឋកិច្ចខ្ពស់នោះទេ»។
លោកថា កម្ពុជាដែលធ្លាប់តែផ្ដោតលើការផលិតនិងការនាំចេញសម្លៀកបំពាក់ ទំនិញធ្វើដំណើរ និងស្បែកជើង អាចទទួលបានអត្ថប្រយោជន៍ពីការធ្វើពិពិធកម្មនៃឧស្សាហកម្មធុនស្រាល ដូចជា កង់ គ្រឿងបន្លាស់ អេឡិចត្រូនិច និងផលិតផលខ្សែភ្លើង ជាដើម ហើយការធ្វើពិពិធកម្មនេះនឹងធ្វើឱ្យសេដ្ឋកិច្ចមានភាពធន់នឹងវិបត្តិនានានៃតម្រូវការក្រៅស្រុក។
បើតាមសេចក្ដីប្រកាសព័ត៌មានដដែល បច្ចុប្បន្ន ADB កំពុងអនុវត្តគម្រោងវិនិយោគចំនួន២,៣ពាន់លានដុល្លារនៅកម្ពុជា។ សម្រាប់ឆ្នាំ២០២១ ADB បានអនុម័តផ្ដល់ប្រាក់កម្ចី និងជំនួយឥតសំណងចំនួន៣២៧,១លានដុល្លារ ហើយបានកៀរគរថវិកាបន្ថែមចំនួន៥លានដុល្លារ តាមរយៈសហហិរញ្ញប្បទានសម្រាប់ប្រទេសកម្ពុជា។
ថវិការបស់ ADB ដែលត្រៀមសម្រាប់កម្ពុជាក្នុងឆ្នាំ២០២២-២០២៥ រួមមាន កម្ចីសម្បទានចំនួន១,៤៤ពាន់លានដុល្លារ និងជំនួយឥតសំណងចំនួន៣៧លានដុល្លារ ដើម្បីគាំទ្រដល់ការអភិវឌ្ឍសេដ្ឋកិច្ច និងការងើបឡើងវិញពីជំងឺរាតត្បាតកូវីដ-១៩៕
