រដ្ឋមន្ត្រីនៃប្រទេសស្រីលង្កាមួយរូប បានបញ្ជាក់ឱ្យដឹងនៅថ្ងៃពុធម្សិលមិញថា លោកប្រធានាធិបតី ហ្កូតាបាយ៉ា រ៉ាចាប៉ាកសា (Gotabaya Rajapaksa) នឹងមិនលាលែងពីតំណែងឡើយ បើទោះបីជាមានបាតុកម្មតវ៉ានានាកើតឡើងក្នុងប្រទេស ប្រឆាំងនឹងវិធានការក្នុងការដោះស្រាយវិបត្តិសេដ្ឋកិច្ចដ៏អាក្រក់បំផុតរបស់ប្រទេសនេះ និងស្របពេលដែលក្រុមគ្រូពេទ្យបានធ្វើការតវ៉ាតាមដងផ្លូវ ជុំវិញការធ្លាក់ចុះនៃវិស័យសុខាភិបាលយ៉ាងណាក៏ដោយ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
លោកប្រធានាធិបតី Gotabaya Rajapaksa ដែលគ្រប់គ្រងប្រទេសចាប់តាំងពីឆ្នាំ២០១៩ រួមនឹងសមាជិកគ្រួសារផ្សេងទៀតនៅក្នុងមុខតំណែងកំពូលៗ កាលពីថ្ងៃអង្គារ ក៏បានសម្រេចលុបចោលការប្រកាសដាក់ប្រទេសក្នុងភាពអាសន្នដែលខ្លួនបានដាក់ចេញកាលពីសប្ដាហ៍មុនផងដែរ ខណៈដែលសមាជិកសភារាប់សិបនាក់បានសម្រេចចាកចេញពីសម្ព័ន្ធភាពជាមួយរដ្ឋាភិបាលចម្រុះស្រីលង្កាដែលកំពុងកាន់អំណាច។
គួរបញ្ជាក់ថា ប្រជាជនស្រីលង្កាទាំងឡាយបានទទួលរងនូវការខ្វះខាតប្រេងឥន្ធនៈ ថាមពល អាហារ ឱសថ និងរបស់របរផ្សេងៗទៀតអស់រយៈពេលជាច្រើនសប្ដាហ៍មកហើយ ខណៈដែលក្រុមគ្រូពេទ្យក៏បានព្រមានពីប្រព័ន្ធសុខាភិបាលទាំងមូលដែលអាចនឹងដួលរលំនាពេលខាងមុខផងដែរ។
ទាក់ទិននឹងករណីនេះ បាតុកម្មនានាតាមដងផ្លូវបានចាប់ផ្ដើមកាលពីខែមុន និងវិវត្តកាន់តែខ្លាំងឡើងក្នុងប៉ុន្មានថ្ងៃថ្មីៗនេះ ដែលក្នុងនោះប្រជាពលរដ្ឋបានចេញមកតវ៉ា ដើម្បីទាមទារឱ្យលោកប្រធានាធិបតី Gotabaya Rajapaksa ចុះចេញពីតំណែង។
ទោះជាយ៉ាងណា រដ្ឋមន្ត្រីរបស់ប្រទេសស្រីលង្កាមួយរូប លោក Johnston Fernando បានថ្លែងនៅក្នុងសភាជាការឆ្លើយតបទៅនឹងការរិះគន់ពីក្រុមប្រឆាំងថា៖ «ខ្ញុំសូមធ្វើការក្រើនរំលឹកឡើងវិញថា មានមនុស្សជិត៧លាននាក់បានបោះឆ្នោតឱ្យលោកប្រធានាធិបតី»។
រដ្ឋមន្ត្រីដដែលនេះបន្តថា៖ «ក្នុងនាមជារដ្ឋាភិបាលមួយ យើងសូមធ្វើការបញ្ជាក់ឱ្យបានច្បាស់ថា លោកប្រធានាធិបតីនឹងមិនលាលែងពីតំណែងនោះទេ បើទោះបីជាស្ថិតក្នុងកាលៈទេសៈណាក៏ដោយ។ យើងនឹងប្រឈមមុខនឹងបញ្ហានេះ»៕