រដ្ឋមន្ត្រីការបរទេសអាស៊ាន បានចេញសេចក្តីថ្លែងការណ៍រួមគ្នាមួយ នៅថ្ងៃទី៨ ខែមេសានេះ ថ្កោលទោសចំពោះការសម្លាប់ជនស៊ីវិលនៅក្នុងប្រទេសអ៊ុយក្រែន។
សេចក្តីថ្លែងការណ៍បន្តថា រដ្ឋមន្ត្រីការបរទេសអាស៊ានគាំទ្រការអំពាវនាវរបស់អគ្គលេខាធិការអង្គការសហប្រជាជាតិដែលស្នើឱ្យមានការស៊ើបអង្កេតដោយឯករាជ្យមួយលើការប្រព្រឹត្តអំពើឃោរឃៅទាំងឡាយលើជនស៊ីវិលស្លូតត្រង់ រួមទាំងនៅក្នុងទីក្រុងប៊ូចា (Bucha) ផងដែរ ដើម្បីជៀសវាងករណីទាំងនេះពីការកើតឡើងសារជាថ្មីទៀតនាពេលខាងមុខ និងដើម្បីគោរពដល់យុត្តិធម៌។
រដ្ឋមន្ត្រីការបរទេសអាស៊ាន បានសង្កត់ធ្ងន់ផងដែរអំពីសារៈសំខាន់នៃច្រករបៀងមនុស្សធម៌នានា ដើម្បីអនុញ្ញាតឱ្យមានការដឹកជញ្ជូនប្រកបដោយសុវត្ថិភាពនៃជំនួយមនុស្សធម៌ទាំងឡាយទៅកាន់អ៊ុយក្រែន និងអំពាវនាវយ៉ាងដាច់អហង្ការឱ្យមានកិច្ចខិតខំប្រឹងប្រែងពីគ្រប់ភាគី និងសហគមន៍អន្តរជាតិទាំងឡាយ ដើម្បីរួមគ្នាបញ្ឈប់ការប៉ះទង្គិចគ្នាដែលកាន់តែធ្ងន់ធ្ងរ និងបង្កើនការខិតខំប្រឹងប្រែងលើការបញ្ចប់ជម្លោះ ខណៈដែលករណីនេះនឹងមិនផ្ដល់អ្វីក្រៅពីការបង្ហូរឈាមនោះទេ។
រដ្ឋមន្ត្រីការបរទេសអាស៊ានក៏បានក្រើនរំលឹកសារជាថ្មីនូវការអំពាវនាវរបស់ខ្លួន ឱ្យមានបទឈប់បាញ់ជាបន្ទាន់មួយ ឬការបញ្ចប់សង្រ្គាម ហើយថា មានតែការបន្តកិច្ចសន្ទនានយោបាយដ៏ទូលំទូលាយប៉ុណ្ណោះដែលអាចនឹងនាំទៅរកសន្តិភាពប្រកបដោយនិរន្តរភាពនៅអ៊ុយក្រែន។
គិតរហូតមកដល់ពេលនេះ ការឈ្លានពានរបស់រុស្ស៊ីលើអ៊ុយក្រែនបានឈានចូលមកដល់សប្ដាហ៍ទី៦ហើយ ដែលបានបង្កឱ្យជនស៊ីវិលរាប់ពាន់នាក់ បានស្លាប់បាត់បង់ជីវិត តំបន់ទីក្រុងជាច្រើនប្រែក្លាយទៅជាគំនរបាក់បែក និងបង្កឱ្យមានជាវិបត្តិមនុស្សធម៌ធ្ងន់ធ្ងរកើតឡើង ហើយក្នុងនោះមនុស្សរាប់លាននាក់ក៏បានភៀសខ្លួនចេញពីប្រទេសផងដែរ។
កាលពីថ្ងៃព្រហស្បតិ៍ មហាសន្និបាតអង្គការសហប្រជាជាតិ បានបោះឆ្នោតព្យួររុស្ស៊ីចេញពីក្រុមប្រឹក្សាសិទ្ធិមនុស្សរបស់ខ្លួន ជុំវិញរបាយការណ៍នៃ «ការរំលោភបំពានធ្ងន់ធ្ងរ និងជាប្រព័ន្ធ និងការរំលោភសិទ្ធិមនុស្ស»៕