អតីតគ្រូពេទ្យខេត្តប៉ៃលិន លោក ខឹម មុនីកុសល ពន្យារពេលក្នុងការចូលខ្លួនទៅឆ្លើយបំភ្លឺនៅចំពោះមុខសាលាដំបូងខេត្តប៉ៃលិន នៅថ្ងៃសុក្រនេះ ដោយសារមិនទាន់មានមេធាវីការពារក្ដី និងមិនទាន់បានត្រៀមខ្លួនគ្រប់គ្រាន់។
យោងតាមពាក្យស្នើសុំពន្យារពេលនេះ លោក ខឹម មុនីកុសល បានលើកឡើងហេតុផលថា មកពីលោកទើបតែទទួលបានដីកាកោះហៅឱ្យចូលរួមក្នុងការសាកសួរ កាលពីថ្ងៃទី៥ ខែមីនា ដែលមិនអាចធ្វើឱ្យលោកមានពេលវេលាគ្រប់គ្រាន់ដើម្បីឆ្លើយបំភ្លឺនោះឡើយ និងម្យ៉ាងទៀត ដោយសារលោកនៅមិនទាន់មានមេធាវីការពារក្ដីនៅឡើយដែរ។
លោក ខឹម មុនីកុសល អតីតគ្រូពេទ្យខេត្តប៉ៃលិន និងបច្ចុប្បន្នជាប្រធានក្រុមការងារគណបក្សភ្លើងទៀនប្រចាំខេត្តប៉ៃលិន ត្រូវបានព្រះរាជអាជ្ញាសាលាដំបូងខេត្តនេះ ចេញដីកាកោះហៅឱ្យចូលខ្លួនទៅឆ្លើយបំភ្លឺនៅថ្ងៃទី៨ ខែមេសានេះ ដែលប្ដឹងដោយលោក ចេង តូ ប្រធានភូមិវាលចែង ពីបទ «បរិហារកេរ្តិ៍ជាសាធារណៈ»។ ក្រៅពីនេះ លោកនៅប្រឈមមុខពាក្យបណ្ដឹងមួយទៀតដែលតុលាការបានកោះហៅលោកឱ្យទៅបំភ្លឺនៅថ្ងៃទី២០ ខែមេសា ពីបទ «ញុះញង់ឱ្យមានការរើសអើង»។
លោក ខឹម មុនីកុសល ត្រូវបានអភិបាលខេត្តប៉ៃលិន លោកស្រី បាន ស្រីមុំ បណ្ដេញចេញពីក្របខណ្ឌរដ្ឋជាមន្ត្រីសុខាភិបាលជាន់ខ្ពស់នៃមន្ទីរសុខាភិបាលខេត្តប៉ៃលិន កាលពីថ្ងៃទី១៩ ខែមីនា ឆ្នាំ២០២១ បន្ទាប់ពីលោកបានបង្ហោះសារនៅលើហ្វេសប៊ុករិះគន់មន្ត្រីស្ថាប័នពាក់ព័ន្ធដែលចុះប្រចាំការនៅមណ្ឌលចត្តាឡីស័កនៅមន្ទីរបក្សប្រជាជនកម្ពុជាខេត្តប៉ៃលិនថា «មិនបានជួយធ្វើការងារគ្រូពេទ្យខ្លះនោះទេ ប៉ុន្តែនាំគ្នាអង្គុយលេង Facebook ក្នុងតង់ និងថតរូបបង្អួតគេឯងទៅវិញ»៕
