កម្ពុជាទទួលវ៉ាក់សាំងបង្ការកូវីដ-១៩ ជាង៣សែនដូស ពីរដ្ឋាភិបាលនៃសាធារណរដ្ឋឥណ្ឌា ដើម្បីប្រយុទ្ធប្រឆាំងនឹងជំងឺកូវីដ-១៩ និងធានាបាននូវការងើបឡើងវិញនៃសកម្មភាពសង្គម-សេដ្ឋកិច្ច។
ក្នុងកម្មវិធីទទួលវ៉ាក់សាំងបង្ការជំងឺកូវីដ-១៩ ជាជំនួយរបស់រដ្ឋាភិបាល និងប្រជាជនឥណ្ឌា នៅវិមានសន្តិភាព នាព្រឹកថ្ងៃអង្គារនេះ លោកនាយករដ្ឋមន្ត្រី ហ៊ុន សែន បានថ្លែងថា រដ្ឋាភិបាលឥណ្ឌា បានផ្តល់វ៉ាក់សាំងកូវីដ-១៩ ប្រភេទ កូវីស្យែល ចំនួន ៣២៥ ០០០ (បីសែនពីរម៉ឺនប្រាំពាន់) ដូស ជូនកម្ពុជា ក្នុងនោះវ៉ាក់សាំងចំនួន ២០ម៉ឺនដូស ត្រូវបានដឹកនាំមកដល់កម្ពុជា នៅល្ងាចថ្ងៃទី១១ ខែមេសា ឆ្នាំ២០២២នេះ។ ដោយឡែកវ៉ាក់សាំងចំនួន ១២៥ ០០០ដូស នឹងត្រូវដឹកមកដល់កម្ពុជានៅថ្ងៃទី១៤ ខែមេសា ឆ្នាំ២០២២។
ករណីនេះ លោកនាយករដ្ឋមន្ត្រី ហ៊ុន សែន បានថ្លែងថា វ៉ាក់សាំងកូវីដ-១៩នេះ ជាអំណោយសប្បុរសធម៌របស់ប្រជាជន និងរដ្ឋាភិបាលឥណ្ឌា ក្រោមគំនិតផ្តួចផ្តើមចតុភាគី ជូនចំពោះប្រជាជន និងរដ្ឋាភិបាលកម្ពុជា ដែលនេះជាសក្ខីភាពពិតប្រាកដនៃចំណងមិត្តភាពរវាងប្រទេសទាំងពីរ។
ក្នុងនាមប្រមុខរាជរដ្ឋាភិបាលកម្ពុជា លោក ហ៊ុន សែន បានថ្លែងអំណរគុណដល់សមាជិកនៃគំនិតផ្ដួចផ្ដើមចតុភាគី ក៏ដូចជាបណ្ដាប្រទេសនានានៅជុំវិញពិភពលោក ចំពោះកិច្ចខិតខំប្រឹងប្រែងក្នុងការប្រយុទ្ធប្រឆាំងជំងឺកូវីដ-១៩ នៅក្នុងប្រទេស តំបន់ និងសកលលោកទាំងមូល ដើម្បីធានាបាននូវការងើបឡើងវិញយ៉ាងឆាប់រហ័សនៃសកម្មភាពសង្គម សេដ្ឋកិច្ច។
ទោះជាបែបនេះក្តី លោកនាយករដ្ឋមន្ត្រី ហ៊ុន សែន ក៏បានក្រើនរំលឹកដល់ប្រជាពលរដ្ឋកុំមានការភ្លេចខ្លួន ដោយសារតែប្រទេសជាច្រើននៅតែបន្តទទួលរងការឆ្លងរាលដាលនៃជំងឺកូវីដ-១៩ នឹងមិនទាន់បើកដំណើរការ សកម្មភាពសង្គម-សេដ្ឋកិច្ចពេញលេញឡើងវិញបាននៅឡើយ។
បន្ថែមពីនេះ លោក ហ៊ុន សែន ជំរុញ និងលើកទឹកចិត្តប្រជាពលរដ្ឋពន្លឿនការចាក់វ៉ាក់សាំងបង្កើតភាពសុំាំក្នុងសហគមន៍ ដែលជាវិធានការឆ្លើយតបដ៏ត្រឹមត្រូវនិងមានប្រសិទ្ធិភាពខ្ពស់។
បើតាមរបាយការណ៍ក្រសួងសុខាភិបាល កំណើនអត្រាចាក់វ៉ាក់សាំងកូវីដ-១៩ នៅកម្ពុជា គិតត្រឹមថ្ងៃទី១១ ខែមេសា ឆ្នាំ២០២២ បានកើនដល់ ៩២,៧៩ភាគរយ បើធៀបនឹងចំនួនប្រជាជនសរុប ១៦លាននាក់ ក្នុងនោះការចាក់វ៉ាក់សាំងលើពលរដ្ឋអាយុចាប់ពី ១៨ឆ្នាំឡើង មាន ១០២,៧២% ធៀបជាមួយចំនួនប្រជាជនគោលដៅ ១០លាននាក់, លើកុមារ-យុវវ័យអាយុពី ១២ឆ្នាំ ទៅក្រោម ១៨ឆ្នាំ មាន ១០០,១៨% ធៀបជាមួយចំនួនប្រជាជនគោលដៅ ១ ៨២៧ ៣៤៨នាក់, លើកុមារអាយុពី ០៦ឆ្នាំ ដល់ក្រោម ១២ឆ្នាំ មាន ១០៧,៨៥% ធៀបជាមួយនឹងប្រជាជនគោលដៅ ១ ៨៩៧ ៣៨២នាក់, លើកុមារអាយុ ០៥ឆ្នាំ មាន ១២៤,៥០% ធៀបជាមួយនឹងប្រជាជនគោលដៅ ៣០៤ ៣១៧នាក់ និងលើកុមារអាយុ ០៣ឆ្នាំ ដល់ក្រោម ០៥ឆ្នាំ មាន ៥២,២៤% ធៀបជាមួយនឹងប្រជាជនគោលដៅ ៦១០ ៧៣០នាក់៕