សាលាដំបូងរាជធានីភ្នំពេញ បដិសេធសំណើសុំនៅក្រៅឃុំបណ្តោះអាសន្ន របស់សកម្មជនបក្សប្រឆាំងលោកស្រី យក់ នាង នៅថ្ងៃទី១២ ខែមីនា ឆ្នាំ២០២២ ដោយរក្សាជនជាប់ចោទនៅក្នុងសវនាការ។
ចៅក្រមសាលាដំបូងរាជធានីភ្នំពេញ លោក រស់ ពិសិដ្ឋ បានប្រកាសសេចក្តីសម្រេចនេះ បន្ទាប់ពីបើកសវនាការសួរដេញដោលកាលពីសប្តាហ៍មុន ថាតើគួរដោះលែងឱ្យនៅក្រៅឃុំ ឬបន្តដាក់ឱ្យស្ថិតនៅក្រោមការឃុំខ្លួនជាបណ្តោះអាសន្ន។
លោកស្រី យក់ នាង ជាសមាជិកក្រុមប្រឹក្សារាជធានីភ្នំពេញគណបក្សសង្គ្រោះជាតិដែលត្រូវតុលាការរំលាយ ត្រូវបានសមត្ថកិច្ចរាជធានីភ្នំពេញចាប់ខ្លួនកាលពីថ្ងៃទី១ ខែមេសា ឆ្នាំ២០២២ និងបានបញ្ជូនទៅឃុំខ្លួននៅពន្ធនាគារក្រោមការចោទប្រកាន់ពីបទ «ញុះញង់ និងរួមគំនិតក្បត់»។
ចៅក្រមសាលាដំបូងរាជធានីភ្នំពេញ បានសួរដេញដោលសំណុំរឿងលោកស្រី នៅព្រឹកថ្ងៃអង្គារនេះ ជុំវិញសកម្មភាពរបស់លោកស្រីនៅក្នុងប្រទេសថៃ និងសកម្មភាពគាំទ្រផែនការវិលចូលស្រុករបស់លោក សម រង្ស៊ី កាលពីចុងឆ្នាំ២០១៩។
តុលាការនឹងធ្វើសេចក្តីសន្និដ្ឋានលើសំណុំរឿងរបស់លោកស្រី និងកញ្ញា សេង ធារី រួមជាមួយសកម្មជនបក្សប្រឆាំង៣នាក់ទៀត រួមមាន លោក ហេង ច័ន្ទសុទ្ធី លោក កាក់ កុម្ភារ និងលោក ទុំ ប៊ុនថន នៅថ្ងៃទី៣ ខែឧសភា ខាងមុខនេះ មុនតុលាការចេញសេចក្តីសម្រេចថា តើត្រូវកាត់ទោសពួកគេយ៉ាងណា៕
