សមត្ថកិច្ចចម្រុះ បានបញ្ជូនជនសង្ស័យចំនួន៤នាក់ទៅតុលាការ ដើម្បីចាត់វិធានការបន្តតាមផ្លូវច្បាប់ ពាក់ព័ន្ធការប្រើប្រាស់ និងជួញដូរគ្រឿងញៀនជិត ៥០គីឡូក្រាម ស្ថិតនៅខណ្ឌច្បារអំពៅ រាជធានីភ្នំពេញ។
នៅក្នុងគេហទំព័ររបស់អគ្គស្នងការដ្ឋាននគរបាលជាតិ បានចុះផ្សាយនៅថ្ងៃទី១៣ ខែមេសានេះថា អគ្គស្នងការរង និងជាស្នងការនគរបាលរាជធានីភ្នំពេញ លោក ស ថេត បានសហការជាមួយកម្លាំងជំនាញ នៃអធិការដ្ឋាននគរបាលខណ្ឌច្បារអំពៅ និងកម្លាំងជំនាញការិយាល័យប្រឆាំងគ្រឿងញៀន ដើម្បីស្រាវជ្រាវបង្ក្រាបមុខសញ្ញាប្រើប្រាស់ និងជួញដូរគ្រឿងញៀន កាលពីថ្ងៃទី០៨-១០ ខែមេសា ឆ្នាំ២០២២។
ប្រភពដដែល បន្តថា ក្រោយពីសហការគ្នាចុះបង្ក្រាបបទល្មើសគ្រឿងញៀននោះ សមត្ថកិច្ចបានដកហូតក្រាមសថ្លាសង្ស័យគ្រឿងញៀនប្រហែល ២គីឡូក្រាម និងឆែកឆេរឃ្លាំងជួលលេខ៨៤២ ភូមិតាង៉ូវកណ្តាល សង្កាត់និរោធ ខណ្ឌច្បារអំពៅ ដោយបានរកឃើញចំនួន៤៥ដុំបន្ថែមទៀត ដែលសរុបមានចំនួន ៤៦គីឡូ ២៣៧,៥៧ក្រាម និងឃាត់ខ្លួនអ្នកជួលឃ្លាំងម្នាក់ឈ្មោះ លីវ វ៉ាងថាវ ហៅ ហ៊ូវ ភេទប្រុស អាយុ៤០ឆ្នាំ ជនជាតិវៀតណាម និងមនុស្សចំនួន០៣នាក់ (ស្រី) ដើម្បីសាកសួរផងដែរ។
ក្រោយពីសាកសួររួច សមត្ថកិច្ចជំនាញបានបញ្ជូនជនសង្ស័យទាំង៤នាក់ និងវត្ថុតាងរឹបអូសគ្រឿងញៀនជិត ៥០គីឡូក្រាម ទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវីធីច្បាប់ ។
វីអូឌី មិនអាចសុំការបញ្ជាក់បន្ថែមពីអគ្គស្នងការរង និងជាស្នងការនគរបាលរាជធានីភ្នំពេញ លោក ស ថេត អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា និងអ្នកនាំពាក្យសាលាដំបូងរាជធានីភ្នំពេញ លោក ប្លង់ សុផល បានទេនៅរសៀលថ្ងៃពុធនេះ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍ និងសន្តិភាព លោក យង់ គិមអេង សង្កេតឃើញថា បទល្មើសគ្រឿងញៀននៅតែបន្តកើតមានជាហូរហែ ជាពិសេសករណីដែលសមត្ថកិច្ចឃាត់ខ្លួនជនសង្ស័យ និងរឹបអូសវត្ថុតាងបានរាប់សិបគីឡូនេះ។ លោកបង្ហាញការព្រួយបារម្ភពីផលប៉ះពាល់ដល់សុវត្ថិភាពប្រជាពលរដ្ឋ និងសន្តិសុខសាធារណៈ ដោយសារតែបញ្ហាគ្រឿងញៀននេះ។
ករណីនេះ លោក យង់ គិមអេង ជំរុញទៅសមត្ថកិច្ចជំនាញសហការជាមួយដៃគូពាក់ព័ន្ធ ដូចជា សង្គមស៊ីវិល និងប្រជាពលរដ្ឋ ហើយពង្រឹងការអនុវត្តច្បាប់ឱ្យបានតឹងរឹងលើជនល្មើស និងមានតម្លាភាពរវាងអ្នកមាន និងអ្នកក្រ ទើបកាត់បន្ថយបទល្មើសគ្រឿងញៀនបានកម្រិតខ្ពស់។
លោកជំរុញដូចនេះថា៖ «បើសិនជាយើងចង់ឱ្យការប្រយុទ្ធប្រឆាំងគ្រឿងញៀននោះមានប្រសិទ្ធិភាពខ្ពស់ លុះត្រាតែលើកទឹកចិត្តឱ្យមានការចូលរួមឱ្យខ្លាំងពីប្រជាពលរដ្ឋ ក៏ដូចជាប្រព័ន្ធផ្សព្វផ្សាយ ហើយត្រូវធ្វើប្រតិកម្មឱ្យទាន់ពេលវេលាពីមន្ត្រីអនុវត្តច្បាប់ដែរ»។
លោកបន្ថែមថា៖ «ករណីគ្រឿងញៀនកើតឡើងមានលក្ខណៈជាសម្ព័ន្ធតាមការជួញដូររបស់ពួកឧក្រិដ្ឋជនច្បាស់លាស់ ហើយយើងគ្រាន់តែមានការស្រាវជ្រាវទៅដល់មេខ្លោងដែលជួញដូរគ្រឿងញៀន ជារឿងមួយសំខាន់ ដែលអាចធ្វើឱ្យបញ្ហានៃការរីករាលដាលនៃគ្រឿងញៀន មានការថមថយជាអប្បរិមាទៅបាន»។
កាលពីថ្ងៃទី ២២ ខែមិនា ឆ្នាំ២០២២ សមត្ថកិច្ចបានឃាត់ខ្លួនជនជាតិចិនតៃវ៉ាន់ចំនួន ៣នាក់ និងរឹបអូសគ្រឿងញៀនបានជាង ១០០គីឡូក្រាម នៅរាជធានីភ្នំពេញ ខណៈថ្ងៃទី២១ ខែមីនានេះដែរ សមត្ថកិច្ចក៏ចាប់បានគ្រឿងញៀនឆ្លងដែន ជិត ៦០០គីឡូក្រាម តាមផ្លូវសមុទ្រ ដែលពួកគេគ្រោងនឹងដឹកចេញទៅប្រទេសទី៣ថែមទៀតផង។
យោងតាមរបាយការណ៍របស់អង្គការសហប្រជាជាតិ ដើម្បីប្រយុទ្ធប្រឆាំងនឹងឧក្រិដ្ឋកម្មគ្រឿងញៀន (UNODC) ចេញផ្សាយកាលពីខែមិថុនា ឆ្នាំ២០២១ បង្ហាញថា កម្ពុជាគឺជាគោលដៅនៃក្រុមឧក្រិដ្ឋជនគ្រឿងញៀនប្រើប្រាស់សម្រាប់ចរាចរគ្រឿងញៀន ផលិត និងចែកចាយបន្ត៕