លោកនាយករដ្ឋមន្ត្រី ហ៊ុន សែន បានក្រើនរំលឹកដល់អាជ្ញាធរ និងកម្លាំងសមត្ថកិច្ចពាក់ព័ន្ធទាំងអស់ ឱ្យថែរក្សាការពារសន្តិសុខ សណ្តាប់ធ្នាប់ ជូនពលរដ្ឋក្នុងឱកាសពិធីបុណ្យចូលឆ្នាំប្រពៃណីជាតិខ្មែរឆ្នាំ២០២២។
លោកនាយករដ្ឋមន្ត្រី ហ៊ុន សែន បានសសេរលើហ្វេសប៊ុករបស់លោកនៅថ្ងៃទី១៣ ខែមេសានេះថា ប្រជាពលរដ្ឋកម្ពុជាអាចសប្បាយរីករាយក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរសម្រាប់ឆ្នាំនេះ ខណៈ២ឆ្នាំមុន កម្ពុជាប្រឈមខ្លាំងជាមួយជំងឺកូវីដ-១៩ ដែលប្រជាពលរដ្ឋមិនអាចលេងសប្បាយបាន។
លោក ហ៊ុន សែន ក៏បានសូមថ្លែងអំណរគុណចំពោះអាជ្ញាធរពាក់ព័ន្ធនៅតាមបណ្តាខេត្តមួយចំនួន ដែលបានរៀបចំសង្រ្កាន្តតាមខេត្តរបស់ខ្លួន ដើម្បីផ្ដល់នូវភាពសប្បាយរីករាយដល់ប្រជាពលរដ្ឋកម្ពុជា ក្នុងឱកាសនៃពិធីបុណ្យចូលឆ្នាំប្រពៃណីជាតិខ្មែរផងដែរ។ លោកក៏បានអំពាវនាវដល់ប្រជាពលរដ្ឋដែលដើរកំសាន្ត និងធ្វើដំណើរជិតឆ្ងាយ ឱ្យប្រុងប្រយ័ត្នខ្ពស់ គោរពច្បាប់ចរាចរណ៍ ជាពិសេសត្រូវអនុវត្តនូវវិធានការសុខាភិបាលឱ្យបានខ្ជាប់ខ្ជួន ដើម្បីចៀសឆ្ងាយពីជំងឺកូវីដ-១៩។
ជាមួយគ្នានេះដែរ លោកនាយករដ្ឋមន្ត្រី បានក្រើនរំលឹកដល់អាជ្ញាធរ និងកងកម្លាំងសមត្ថកិច្ច យកចិត្តទុកដាក់ថែរក្សាការពារសន្តិសុខ សណ្ដាប់ធ្នាប់ចរាចរណ៍ ជូនប្រជាពលរដ្ឋឱ្យបានល្អនៅតាមទីអារ៉ាម កន្លែងប្រារព្ធពិធីកម្សាន្តផ្សេងៗ ក៏ដូចជាតាមរមណីយដ្ឋាននានា។
លោកសសេរបន្តថា៖ «សូមទេវតាឆ្នាំថ្មី ព្រះនាមកិរិណីទេវី សូមអភិបាលគ្រប់គ្រង ជួយបីបាច់ថែរក្សាគាំពារ និងប្រសិទ្ធិពរជ័យដល់ប្រជាជនខ្មែរគ្រប់រូប អោយមានមនសិការចិត្តជាកុសលយោគយល់គ្នា រួបរួមសាមគ្គីគ្នាជាមហាគ្រួសារខ្មែរតែមួយនៅលើទឹកដីមាតុភូមិអង្គរជាទីស្នេហាដោយសេចក្តីសុខ ក្សេមក្សាន្ត និងប្រកបដោយកិត្តិយស សេចក្តីថ្លៃថ្នូរក្នុងឯករាជ្យ សន្តិភាព សេរីភាពប្រជាធិបតេយ្យ អព្យាក្រឹត និងវឌ្ឍនភាពសង្គម តរៀងទៅ»។
ពិធីបុណ្យចូលឆ្នាំថ្មីប្រពៃណីជាតិខ្មែរ ប្រារព្ធឡើងរយៈពេល៣ថ្ងៃ គឺចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២២៕
