ស្ថានទូតកម្ពុជាប្រចាំសាធារណរដ្ឋកូរ៉េ បានចេញសេចក្ដីប្រកាសមួយដោយប្រតិកម្មមិនគាំទ្រចំពោះទង្វើនិងសកម្មភាពរបស់បុគ្គលមួយក្រុមតូចដែលបានបង្ករបួសស្នាម និងភាពចលាចល ក្នុងទឹកដីកូរ៉េខាងត្បូង កាលពីពេលថ្មីៗនេះ។
ការចេញសេចក្ដីប្រកាសនេះ កើតឡើងក្រោយពីមានហេតុការណ៍ហិង្សារវាងពលរដ្ឋខ្មែរនិងខ្មែរ កាលពីថ្ងៃទី២៤ ខែមេសា ឆ្នាំ២០២២ នៅហាងជាន់ក្រោមដី ទីក្រុងស៊ូវ៉ុន អំឡុងពេលពលរដ្ឋខ្មែរនាំគ្នាប្រារព្ធអបអរសាទរពិធីបុណ្យចូលឆ្នាំខ្មែរ ដែលធ្វើឱ្យមានមនុស្សមួយចំនួនរងរបួស។
តាមសេចក្ដីប្រកាសនៅថ្ងៃចន្ទនេះ ស្ថានទូតកម្ពុជាប្រចាំកូរ៉េខាងត្បូងបានលើកឡើងថា សកម្មភាពហិង្សាដែលបង្កឡើងពីពលរដ្ឋខ្មែរមួយក្រុមនោះ គឺពិតជាបានធ្វើឱ្យបាត់បង់នូវសណ្ដាប់ធ្នាប់សង្គម និងឆ្លុះបញ្ចាំងពីការបាត់បង់នូវសីលធម៌ក្នុងការរស់នៅ ការបំពាននូវសិទ្ធិមនុស្ស និងខ្វះការសាមគ្គីគ្នារវាងខ្មែរនិងខ្មែរ ជាហេតុធ្វើឱ្យប៉ះពាល់ដល់កិត្តិនាមខ្មែរជាខ្លាំង។
ជាមួយគ្នានេះដែរ ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានស្នើដល់ពលរដ្ឋទាំងអស់ដែលរស់នៅ សិក្សា និងធ្វើការនៅកូរ៉េខាងត្បូង ត្រូវចេះរួបរួមសាមគ្គីគ្នា និងចេះស្រឡាញ់រាប់អានគ្នាក្នុងនាមជាខ្មែរដូចគ្នា ចូលរួមរក្សាសណ្ដាប់ធ្នាប់សង្គម គោរពសិទ្ធិ និងចេះជួយគ្នាទៅវិញទៅមក ព្រោះជាតម្លៃដ៏ល្អផូរផង់របស់ខ្មែរ៕