លោកនាយករដ្ឋមន្ត្រី ហ៊ុន សែន ថ្លែងថា បុណ្យចូលឆ្នាំថ្មីប្រពៃណីជាតិខ្មែររយៈពេល ២ថ្ងៃ មានពលរដ្ឋជាង២លាននាក់ បានដើរកម្សាន្តនៅតាមបណ្ដាខេត្តនានានៅទូទាំងប្រទេស បន្ទាប់ពីខកខានអស់រយៈពេលពីរឆ្នាំ ដោយសារការឆ្លងរាលដាលជំងឺកូវីដ-១៩។
ក្នុងពិធីអភិសេករូបសំណាកព្រះថោង-នាងនាគ នៅខេត្តព្រះសីហនុ នាព្រឹកថ្ងៃសៅរ៍នេះ លោកនាយករដ្ឋមន្ត្រី ហ៊ុន សែន បានបង្ហាញពីភាពជោគជ័យនៃការចាក់វ៉ាក់សាំងប្រឆាំងនឹងកូវីដ-១៩ ដែលជំរុញឱ្យកម្ពុជាអាចប្រារព្ធពិធីបុណ្យចូលឆ្នាំថ្មីប្រពៃណីជាតិឡើងវិញបាន។
លោកថា៖«ការអក់ខាន ២ ឆ្នាំនេះ យើងមិនទាន់មានវ៉ាក់សាំងគ្រប់គ្រាន់ ដើម្បីចាក់ ក៏ប៉ុន្តែបន្ទាប់ពីបានវ៉ាក់សាំងជោគជាំ មិនមែនជាការចាក់វ៉ាក់សាំងទេ និយាយឱ្យត្រូវតាមន័យរបស់វា គឺការស្រោចវ៉ាក់សាំង ដើម្បីធានាភាពសុំាសហគមន៍របស់ប្រជាជនយើង»។
លោកបន្តថា ពិធីបុណ្យចូលឆ្នាំខ្មែរថ្ងៃទី២ ប្រជាពលរដ្ឋបានដើរលេងកម្សាន្តនៅទូទាំងរាជធានី-ខេត្តជាង ១.៥លាននាក់ ហើយថ្ងៃទី១មានពលរដ្ឋដើរលេងកម្សាន្តជាង៨៦ម៉ឺននាក់។ ដំណើរកម្សាន្តរបស់ពលរដ្ឋក្នុងពិធីបុណ្យប្រពៃណីជាតិនេះ ក្រោយពីកម្ពុជាខកខានប្រារព្ធរយៈពេល ២ឆ្នាំ ដោយសារការឆ្លងរីករាលដាលជំងឺកូវីដ-១៩។
លោកថា៖«ខ្ញុំបានដឹង បានទទួលរបាយការណ៍របស់ឯកឧត្ដម ថោង ខុន ដែលពីថ្ងៃទី១ យើងមានមនុស្សត្រឹមតែ ៨៦ ម៉ឺននាក់ ដែលបានចេញដើរលេង ប៉ុន្តែកាលពីម្សិលមិញ ប្រជាជនកម្ពុជាឡើងដល់ជាង ១.៥លាននាក់ ទៅទស្សនានៅតាមទីកន្លែងផ្សេងៗ ។ យើងក៏មិនភ្លេចការសប្បាយរីករាយរបស់ប្រជាពលរដ្ឋយើងនៅតាមភូមិ ឃុំ តាមវត្តអារាមកន្លែងណាក៏រៀបចំសង្ក្រាន្តទាំងអស់ សង្ក្រាន្តតាមភូមិ សង្ក្រានតាមឃុំ តាមស្រុក តាមខេត្ត និងសង្ក្រាន្តតាមវិទ្យាល័យ និងសាកលសវិទ្យាល័យ»។
យោងតាមរបាយការណ៍ក្រសួងទេសចរណ៍ឱ្យដឹងថា ភ្ញៀវទេសចរក្នុងថ្ងៃទីពីរនៃឱកាសពិធីបុណ្យចូលឆ្នាំថ្មី ត្រូវនឹងថ្ងៃទី១៥ ខែមេសា ឆ្នាំ២០២២ ដោយមានចំនួន១ ៥៧៩ ២៥១នាក់ ក្នុងនោះ ភ្ញៀវជាតិ១ ៥៦៩ ៤៨២នាក់ និងភ្ញៀវបរទេសផ្ទៃក្នុង៩ ៧៦៩នាក់។
បើតាមក្រសួងទេសចរណ៍ដដែលថា ខេត្តគោលដៅដែលភ្ញៀវទេសចរបានដើរលេងកម្សាន្ត ក្នុងនោះ ខេត្តបាត់ដំបង ខេត្តព្រៃវែង ខេត្តបន្ទាយមានជ័យ ខេត្តកំពង់ចាម ខេត្តពោធិ៍សាត់ ខេត្តកំពត ខេត្តសៀមរាប និងខេត្តកំពង់ស្ពឺ ជាដើម៕
