មន្ត្រីជាន់ខ្ពស់ក្រសួងសុខាភិបាល បញ្ជាក់ថា ក្រសួងនៅមិនទាន់អាចវាយតម្លៃពីស្ថានភាពនៃការឆ្លងរាលដាលជំងឺកូវីដ-១៩ ក្នុងអំឡុងពិធីបុណ្យចូលឆ្នាំខ្មែរបាននៅឡើយទេ ខណៈពិធីបុណ្យនេះទើបនឹងបញ្ចប់ ប៉ុន្តែក្រសួងកំពុងបន្តតាមដានពីស្ថានភាពនេះរហូតដល់ដំណាច់ខែមេសា។
រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វណ្ណឌីន មានប្រសាសន៍ប្រាប់ក្រុមអ្នកសារព័ត៌មានតាមបណ្ដាញទំនាក់ទំនងសង្គមតេឡេក្រាមនៅថ្ងៃចន្ទនេះថា ការព្រួយបារម្ភ ឬមិនព្រួយបារម្ភពីការឆ្លងវីរុសកូវីដ-១៩នោះ គឺគួរពិនិត្យមើលតាមស្ថានភាពនៃការសប្បាយរីករាយរបស់ប្រជាពលរដ្ឋក្នុងពិធីបុណ្យចូលឆ្នាំ ហើយក៏ជាការទទួលខុសត្រូវនិងការសម្រេចចិត្តរបស់បុគ្គលម្នាក់ៗនិងក្រុមគ្រួសារ ក្នុងការអនុវត្តការការពារការចម្លងជំងឺកូវីដ-១៩ដែរ។
លោកស្រីបន្តថា៖ «យើងមិនទាន់អាចវាយតម្លៃស្ថានភាពនៃការឆ្លងបាននៅឡើយទេ ព្រោះទើបតែបញ្ចប់ពិធីអបអរបុណ្យចូលឆ្នាំប្រពៃណីជាតិខ្មែរយើង ដែលត្រូវរង់ចាំនិងបន្តពិនិត្យមើលក្រែងមានស្ថានភាពនៃការផ្ទុះ ការឈឺណាមួយ នៅតំបន់ណាមួយ រហូតដល់ដំណាច់ខែមេសានេះ»។
ទោះជាយ៉ាងណា លោកស្រី ឱ វណ្ណឌីន បានអំពាវនាវដល់ប្រជាពលរដ្ឋ បើសិនមានការសង្ស័យណាមួយ ត្រូវធ្វើតេស្តរហ័ស ឬទៅពិនិត្យសុខភាពនៅតាមមន្ទីរពេទ្យរដ្ឋដែលនៅជិតផ្ទះ។
លោកស្រីបន្តថា៖ «បើលទ្ធផលបង្ហាញវិជ្ជមានកូវីដ-១៩ និងបើក្នុងលក្ខណៈស្រាល សូមនៅដោយឡែក ការពារកុំឱ្យឆ្លងទៅក្រុមគ្រួសារ និងអ្នកដទៃ ហើយថែទាំព្យាបាលខ្លួននៅផ្ទះឱ្យបានល្អហ្មត់ចត់ តាមការណែនាំរបស់ក្រសួងសុខាភិបាលនាពេលកន្លងមក។ បើមានរោគសញ្ញាសង្ស័យថាវិវត្តទៅធ្ងន់ធ្ងរ សូមប្រញាប់ទៅស្វែងរកការព្យាបាលនៅតាមមន្ទីរពេទ្យរដ្ឋ កុំសម្ងំនៅផ្ទះ ដែលអាចស្លាប់បាត់បង់ជីវិតបាន»។
មន្ត្រីសុខាភិបាលរូបនេះក៏បានអំពាវនាវដល់ប្រជាពលរដ្ឋទៅចាក់វ៉ាក់សាំងកូវីដ-១៩ ទាំងដូសមូលដ្ឋាន និងដូសជំរុញ (ទី៣ និងទី៤) ឱ្យបានគ្រប់ៗគ្នា ដើម្បីរក្សាបាននូវភាពស៊ាំរបស់បុគ្គលនិងសហគមន៍ សម្រាប់រក្សានិរន្តរភាពនៃការរស់នៅធម្មតាតាមគន្លងប្រក្រតីភាពថ្មីផងដែរ។
បើតាមក្រសួងសុខាភិបាល គិតត្រឹមព្រឹកថ្ងៃចន្ទនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១៣៦ ០៧៦នាក់ ក្នុងនោះ អ្នកជំងឺព្យាបាលជាសះស្បើយចំនួន១៣២ ៧៨៩នាក់ និងអ្នកស្លាប់មានចំនួន៣ ០៥៥នាក់៕