កម្មករជាង២០០នាក់ ធ្វើការនៅរោងចក្រកាត់ដេរ ឃែនធើរេន អីភែរឹល (ខេមបូឌា) បាននាំគ្នាតវ៉ាបិទកំណាត់ផ្លូវវេងស្រេង ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ អស់រយៈពេលជិត១ម៉ោង ដើម្បីទាមទារឱ្យថៅកែទូទាត់ប្រាក់អតីតភាពការងារនិងប្រាក់អត្ថប្រយោជន៍ផ្សេងៗតាមច្បាប់ ក្រោយពួកគេអះអាងថា ថៅកែបានប្រមូលសម្ភារផ្សេងៗចេញពីរោងចក្រ ដោយមិនផ្ដល់ដំណឹងដល់កម្មករ។
កម្មការិនីធ្វើការនៅរោងចក្រ ឃែនធើរេន អ្នកស្រី ស៊ុំ វ៉ាន់នី បានឱ្យដឹងថា ដើមចមដែលនាំឱ្យកម្មករផ្ទុះការតវ៉ាបិទកំណាត់ផ្លូវវេងស្រេង នៅព្រឹកថ្ងៃអង្គារនេះ ដោយសារតែថៅកែរោងចក្របានដឹកម៉ាស៊ីនដេរ ម៉ាស៊ីនភ្លើង និងសម្ភារចេញពីក្នុងរោងចក្រ អំឡុងពេលកម្មករឈប់សម្រាកពីការងារនៅថ្ងៃបុណ្យចូលឆ្នាំខ្មែរ។
ស្ត្រីវ័យ៦៣ឆ្នាំរូបនេះបន្តថា ការដឹកសម្ភារចេញនេះ ភាគីរោងចក្រមិនបានជូនដំណឹងដល់កម្មករឬតំណាងកម្មករជាមុនទេ ដែលករណីនេះ កម្មករបារម្ភខ្លាចរោងចក្រនេះបិទទ្វារ ហើយថៅកែអាចរត់យករួចខ្លួន និងមិនដោះស្រាយប្រាក់អត្ថប្រយោជន៍ផ្សេងៗទៅតាមច្បាប់ដល់ពួកគាត់។
អ្នកស្រី ស៊ុំ វ៉ាន់នី និយាយថា៖ «មកតវ៉ារឿងគេ [ថៅកែ] ដឹកអីវ៉ាន់ចេញ [ពីរោងចក្រ]! មុនចូលឆ្នាំ គេបានសន្យារួចហើយ [ថាមិនធ្វើអ៊ីចឹងទេ] តែដល់ពេលចូលឆ្នាំហើយ វាដឹកម៉ាស៊ីនភ្លើងចេញ។ [ថៅកែអាចបិទរោងចក្រនេះ ឬយ៉ាងណា?] គម្រោងវាចង់ឈប់ [ចង់បិទ] តែវាធ្វើអ៊ីចឹង វាធ្វើបណ្ដោះៗ ដល់ពេល[ជញ្ជូនចេញ]អស់ទៅ វាច្រានយើងចេញហើយ។ អ៊ីចឹងយើងធ្វើម៉េច កុំឱ្យវាច្រានយើងទាន់ [បានជាមកតវ៉ាទាមទារ]»។
ជុំវិញករណីនេះ អ្នកស្រីបានទាមទារឱ្យថៅកែត្រូវទូទាត់ប្រាក់អតីតភាពការងារនិងប្រាក់អត្ថប្រយោជន៍ផ្សេងៗជូនកម្មករតាមច្បាប់ ក្នុងករណីភាគីរោងចក្រដឹកសម្ភារចេញព្រោះតែចង់បិទទ្វារនោះ។
កាលពីថ្ងៃទី០៦ ខែមេសា ឆ្នាំ២០២២ តំណាងកម្មករ និងភាគីរោងចក្រ បានធ្វើកិច្ចព្រមព្រៀងដោយភ្ជាប់លក្ខខណ្ឌមួយចំនួនម្តងរួចមកហើយ ក្នុងនោះ គឺចាប់ពីថ្ងៃទី០៦ ខែមេសា រហូតដល់ថ្ងៃទី១៨ ខែមេសា ឆ្នាំ២០២២ ក្រុមហ៊ុនមិនត្រូវដឹកម៉ាស៊ីនចេញពីទីតាំងរោងចក្រឡើយ ហើយចាប់ពីថ្ងៃទី១៩ ខែមេសាទៅ បើសិនក្រុមហ៊ុនមានការចាំបាច់ត្រូវប្រើប្រាស់ម៉ាស៊ីនតូចៗគ្រប់ប្រភេទ ក្រុមហ៊ុននឹងធ្វើការដោះដូរចាប់ពី៤គ្រឿងចុះ។ កិច្ចព្រមព្រៀងនោះបន្តថា ក្រុមហ៊ុនមានសិទ្ធដឹកសម្ភារផលិតកម្មគ្រប់ប្រភេទក្រៅពីម៉ាស៊ីនចេញពីទីតាំងរោងចក្របានគ្រប់ពេលវេលា ដើម្បីឱ្យសង្វាក់ផលិតកម្មដំណើរការបានចាប់ពីថ្ងៃទី០៦ ខែមេសាទៅ។
ភាគីទាំងពីរបានឯកភាពគ្នាទៀតថា៖ «កិច្ចព្រមព្រៀងនេះមានតែរយៈពេល៥ខែប៉ុណ្ណោះ ដោយគិតចាប់ពីថ្ងៃភាគីចុះហត្ថលេខានិងផ្ដិតមេដៃនេះ រហូតដល់ថ្ងៃទី០៦ ខែកញ្ញា ឆ្នាំ២០២២។ ករណីភាគីណាមួយមិនគោរពកិច្ចព្រមព្រៀងនេះ ភាគីនោះត្រូវទទួលខុសត្រូវចំពោះមុខច្បាប់»។
តែយ៉ាងណា កម្មការិនីម្នាក់ទៀត អ្នកស្រី គីម អ៊ី បានលើកឡើងថា បើទោះជាមានកិច្ចព្រមព្រៀងនេះក៏ដោយ ក៏ភាគីរោងចក្រនៅតែបន្តបំពាន ដោយដឹកជញ្ជូនសម្ភារ ដូចជា ម៉ាស៊ីនដេរ ម៉ាស៊ីនភ្លើង និងសម្ភារផ្សេងៗទៀតចេញពីរោងចក្រ ក្នុងអំឡុងពេលកម្មករឈប់សម្រាកបុណ្យចូលឆ្នាំដដែល។
អ្នកស្រីថា៖ «ពីដំបូងឡើយ មុនចូលឆ្នាំ គេថាអត់ដឹកអីវ៉ាន់ គ្រឿងម៉ាស៊ីនអីចេញទេ។ ស្រាប់តែដល់ពេលយើងមកពីចូលឆ្នាំវិញ ម្សិលមិញ [ថ្ងៃទី១៨ ខែមេសា] ហ្នឹង មកដល់បាត់ម៉ាស៊ីនភ្លើង បាត់អីអស់។ អត់មាននិយាយអីប្រាប់កម្មករសោះហ្មង បើបាននិយាយប្រាប់ អត់សូវខឹងទេ! បើនិយាយមុន ប្រាប់ថា៣ខែទៀតបិទ [រោងចក្រ] ក៏អត់ខឹងដែរ តែសុខៗដកចេញអស់រលីង»។
បើតាមអ្នកស្រី គីម អ៊ី នៅមុនពេលបុណ្យចូលឆ្នាំខ្មែរ រោងចក្រមិនសូវមានការងារឱ្យកម្មករធ្វើទេ ហើយថៅកែបានដឹកជញ្ជូនសម្ភារចេញជាបណ្ដើរៗ ដែលជាសញ្ញាមួយបង្ហាញពីភាពមិនប្រក្រតី។
វីអូឌី ពុំទាន់អាចទាក់ទងសុំការបកស្រាយពីតំណាងរោងចក្រកាត់ដេរ ឃែនធើរេន អីភែរឹល (ខេមបូឌា) បានទេ នៅថ្ងៃអង្គារនេះ។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានមានប្រសាសន៍ថា ក្រសួងការងារបាននិងកំពុងដោះស្រាយវិវាទការងារនៅក្នុងរោងចក្រនេះហើយ។
លោកថា៖ «[ខ្ញុំ] បានដឹង [ពីព័ត៌មាននេះហើយ]។ មន្ត្រីកំពុងដោះស្រាយ»។
ប្រធានសហភាពចលនាកម្មករ លោក ប៉ាវ ស៊ីណា ថ្លែងថា មុនពេលនិងអំឡុងពេលចូលឆ្នាំខ្មែរ ខាងរោងចក្រមានសម្ភារនិងក្រណាត់សម្រាប់ឱ្យកម្មករធ្វើការ ប៉ុន្តែបែរជាមិនអនុញ្ញាតឱ្យកម្មករធ្វើការ និងបំពានកិច្ចព្រមព្រៀងដោយដឹកសម្ភារចេញពីរោងចក្រទៅវិញ។ លោកចាត់ទុកសកម្មភាពរបស់រោងចក្រនេះថាមានចេតនាទុច្ចរិត ចង់បិទទ្វាររោងចក្រ ដោយមិនទូទាត់សំណងប្រាក់អតីតភាពការងារនិងប្រាក់អត្ថប្រយោជន៍ផ្សេងៗដល់កម្មករ។
លោកថា៖ «រោងចក្រនេះ គាត់ព្យាយាមធ្វើគ្រប់មធ្យោបាយទាំងអស់ ដើម្បីឱ្យបងប្អូនអ្នកតវ៉ាគាត់អស់ចិត្ត ហើយដាក់ពាក្យលាឈប់ពីរោងចក្រ ដោយសារតែពួកគាត់ដែលនៅតវ៉ាសុទ្ធតែជាអ្នកដែលមានអតីតភាពការងារច្រើនឆ្នាំ សុទ្ធតែជាកម្មករចាស់។ ដូច្នេះហើយគាត់ [ថៅកែ] រកវិធីសាស្ត្រផ្សេងៗធ្វើម៉េចឱ្យកម្មករហ្នឹងគាត់ធុញទ្រាន់ គាត់នឿយណាយនឹងសកម្មភាពហ្នឹង ធ្វើឱ្យគាត់បង្ខំចិត្តដាក់ច្បាប់ឈប់ ដោយមិនទទួលបានកញ្ចប់ការទូទាត់សំណងផ្សេងៗ»។
បើតាមមន្ត្រីសហជីពរូបនេះ សកម្មភាពថៅកែរោងចក្រប្រើវិធីជញ្ជូនសម្ភារចេញពីរោងចក្រក្នុងចេតនាឱ្យកម្មករលាឈប់នេះ បានកើតឡើងជារឿយៗនៅកម្ពុជា ប៉ុន្តែលោកថាកម្រនឹងឃើញមានដំណោះស្រាយណាមួយដែលល្អប្រសើរសម្រាប់កម្មករណាស់។ ទោះជាបែបនេះក្តី លោកថា ដំណោះស្រាយ គឺមានតែក្រសួងពាក់ព័ន្ធទេដែលមានសមត្ថកិច្ចដាក់សម្ពាធឱ្យថៅកែគោរពច្បាប់ការងារ៕