ពលរដ្ឋជាង៣០០នាក់ មកពីសហគមន៍ចំនួន៦ នៃស្រុកបទុមសាគរ និងស្រុកស្រែអំបិល ខេត្តកោះកុង បាននាំគ្នាទៅប្រមូលផ្ដុំនៅមុខសាលាដំបូងខេត្ត នៅថ្ងៃពុធនេះ ខណៈតំណាងពួកគេចូលសវនាការពាក់ព័ន្ធជម្លោះដីធ្លីជាមួយឧកញ៉ា ហេង ហ៊ុយ។
តំណាងពលរដ្ឋ១៧៥គ្រួសារ នៅស្រុកស្រែអំបិល អ្នកស្រី ផាវ ញ៉ើង ប្រាប់វីអូឌីថា តំណាងអយ្យការអមសាលាដំបូងខេត្តកោះកុង លោក វ៉ៃ ភីរម្យ បានកោះហៅតំណាងពលរដ្ឋ១០នាក់ និងសាក្សី៥នាក់ ឱ្យចូលសវនាការលើកទី២ នៅទីថ្ងៃទី២០ ខែមេសានេះ ពាក់ព័ន្ធបទចោទ «បរិហារបង្កាច់កេរិ៍្ត និងបទញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ទៅតាមបណ្ដឹងរបស់ឧកញ៉ា ហេង ហ៊ុយ។
តំណាងពលរដ្ឋរូបនេះឱ្យដឹងទៀតថា សវនាការនៅថ្ងៃនេះ ក៏មានពលរដ្ឋ៤៦០នាក់ មកពីសហគមន៍ចំនួន៦ រួមមាន សហគមន៍ព្រលាន សហគមន៍៨៤៣ សហគមន៍១៧៥ សហគមន៍១២៩ សហគមន៍៧៦៦ និងសហគមន៍១៩៧ នៃស្រុកបទុមសាគរ និងស្រុកស្រែអំបិល បាននាំគ្នាឡើងទៅប្រមូលផ្ដុំគ្នានៅមុខសាលាដំបូងខេត្តកោះកុង ដើម្បីគាំទ្រដល់តំណាងរបស់ពួកគេដែលចូលសវនាការនោះដែរ។
តំណាងពលរដ្ឋទាំង១០នាក់ដែលត្រូវចូលសវនាការនោះ រួមមាន អ្នកស្រី កើត នៅ, អ្នកស្រី អ៊ិន ធូ, អ្នកស្រី ដេត ហួរ, អ្នកស្រី អើ វី, អ្នកស្រី អ៊ីប តឹង, លោក ពូ ហ៊ួន, លោក គង់ មែន, លោក សុខ ជៃ, លោក ហេង ជៃ និងលោក ឆាន់ ឈឿន។ នេះបើតាមដីកាកោះហៅរបស់តុលាការចុះថ្ងៃទី៤ ខែមេសា ឆ្នាំ២០២២។
ចាប់តាំងពីពាក់កណ្ដាលឆ្នាំ២០១៩មក ក្រុមពលរដ្ឋ១៩៧គ្រួសារនៅខេត្តកោះកុង បានឡើងមកតវ៉ានៅរាជធានីភ្នំពេញ ដើម្បីរកអន្តរាគមន៍ពីក្រសួងរៀបចំដែនដី ជួយដោះស្រាយវិវាទដីធ្លីរបស់ពួកគាត់ ដោយអះអាងថា ក្រុមហ៊ុន ហេង ហ៊ុយ បានរំលោភយកដីពួកគាត់តាំងពីឆ្នាំ២០០៧ ប៉ុន្តែការចោទនេះត្រូវបានលោក ហេង ហ៊ុយ ច្រានចោល និងបានប្ដឹងតំណាងពលរដ្ឋទៅតុលាការផងដែរ។
ពាក់ព័ន្ធករណីនេះ ក្រសួងរៀបចំដែនដី បដិសេធដោះស្រាយឱ្យពលរដ្ឋទាំងនោះជាបន្តបន្ទាប់ និងស្នើទៅអាជ្ញាធរពាក់ព័ន្ធឱ្យចាត់វិធានការផ្លូវច្បាប់ចំពោះអ្នកដែលក្រសួងថាបានញុះញង់ឱ្យពលរដ្ឋ១៩៧គ្រួសារនោះឡើងមកតវ៉ាដីធ្លីនៅរាជធានីភ្នំពេញផងដែរ៕
