កម្មករ-កម្មការិនីជាង៤០០នាក់ បម្រើការងារនៅរោងចក្រកាត់ដេរ «រ៉ូស៊ីង ហ្គាមេន» ស្ថិតក្នុងសង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ បាននាំគ្នាបន្តតវ៉ាទាមទារប្រាក់អត្ថប្រយោជន៍ផ្សេងៗទៀត នៅថ្ងៃពុធនេះ ក្រោយពីរោងចក្របិទទ្វារ ដោយគ្មានការដោះស្រាយសំណងតាមផ្លូវច្បាប់ជូនពួកគេ។
ប្រធានសហជីពសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខាវឌូ) ប្រចាំរោងចក្ររ៉ូស៊ីង លោក ខុន ជា ប្រាប់វីអូឌីថា កម្មករជាង១ ០០០នាក់របស់រោងចក្រនេះ ត្រូវបានថៅកែបញ្ឈប់ពីការងារជាបន្តបន្ទាប់ចាប់តាំងពីដើមខែមេសានេះ ដោយពុំបានជូនដំណឹងនិងដោះស្រាយសំណងត្រឹមត្រូវទៅតាមផ្លូវច្បាប់ឡើយ។
ប្រធានសហជីពរូបនេះបន្តថា កម្មករប្រហែលជាង៤០០នាក់ នៅថ្ងៃនេះ បានប្រមូលផ្ដុំតវ៉ានៅមុខនិងក្នុងរោងចក្របន្តទៀត ដើម្បីទាមទារទៅថៅកែឱ្យដោះស្រាយប្រាក់អត្ថប្រយោជន៍ចំនួន៥ចំណុច រួមមាន ប្រាក់ខែចុងក្រោយ ប្រាក់អតីតភាពការងារ ប្រាក់ជូនដំណឹង ប្រាក់សំណងជំងឺចិត្ត និងប្រាក់ដំណាច់ឆ្នាំដែលនៅសល់ ដែលបានកំណត់ដោយច្បាប់។
លោកបន្ថែមថា៖ «ខាងរោងចក្រ ការដោះស្រាយ គេអត់មានផ្ដល់អីឱ្យទេ។ បើនិយាយទៅតាមផ្លូវច្បាប់ វាមានប្រាក់បណ្ដេញចេញ ប្រាក់ជំងឺចិត្ត មានជូនដំណឹង ដែលទាំងអស់មាន៥ចំណុច។ ប៉ុន្តែឥលូវគេឱ្យតែប្រាក់ខែចុងក្រោយ គេឱ្យប្រាក់រម្លឹកអតីតភាពការងារ៧ថ្ងៃ និងប្រាក់លើកទឹកចិត្ត»។
កម្មការិនីធ្វើការនៅរោងចក្ររ៉ូស៊ីង អ្នកស្រី ឆុន ស្រីនី អាយុ២៩ឆ្នាំ ដែលអះអាងថាបម្រើកាងារនៅរោងចក្រនេះ៩ឆ្នាំមកហើយនោះ និយាយថា ការពន្យារពេលមិនដោះស្រាយជូនកម្មករឱ្យបានឆាប់នេះ បានធ្វើឱ្យកម្មករជួបការលំបាកជាខ្លាំង ដូចជា ខាតបង់ពេលវេលា ខ្វះខាតលុយសម្រាប់បង់ថ្លៃបន្ទប់ជួល បង់ធនាគារ និងការចំណាយផ្សេងៗក្នុងគ្រួសារ ជាដើម។
អ្នកស្រីបន្ថែមថា៖ «វាធ្វើឱ្យខាតពេលវេលា ខ្ញុំមិនអាចទៅរកការងារកន្លែងផ្សេងធ្វើបាន បើខ្ញុំនៅចាំគេដោះស្រាយ វាយូរ! ខ្ញុំអត់លុយបង់សងធនាគារ ណាមួយលុយទឹកដោះគោកូន ហើយត្រូវបង់ថ្លៃផ្ទះជួលទៀត»។
បើតាមអ្នកស្រី ឆុន ស្រីនី សំណុំរឿងកម្មកររោងចក្រ រ៉ូស៊ីង បានបញ្ជូនដល់ដៃក្រុមប្រឹក្សាអាជ្ញាកណ្ដាលជាច្រើនថ្ងៃហើយ ប៉ុន្តែរហូតមកដល់ពេលនេះ ពុំទាន់មានការសម្រេចយ៉ាងណានៅឡើយទេ។
អគ្គលេខាធិការរងគណៈកម្មការដោះស្រាយកូដកម្មបាតុកម្មគ្រប់មុខសញ្ញា នៃក្រសួងការងារ និងបណ្តុះបណ្តាលវិជ្ជាជីវៈ លោក វង្ស សុវណ្ណ មានប្រសាសន៍ថា លោកមិនបានកាន់សំណុំរឿងនៅរោងចក្រនេះទេ ប៉ុន្តែមន្ត្រីក្រសួងការងារបានចុះសម្របសម្រួលករណីហើយ ដោយភាគីកម្មករនិងភាគីរោងចក្រមិនព្រមព្រៀងគ្នា ទើបជំរុញទៅក្រុមប្រឹក្សាអាជ្ញាកណ្ដាលដោះស្រាយបន្ត។
វីអូឌី មិនអាចសុំការបញ្ជាក់ពីប្រធានលេខាធិការដ្ឋានក្រុមប្រឹក្សាអាជ្ញាកណ្ដាល លោក ប៉ែន សាវ៉ាត និងប្រធានរដ្ឋបាលរោងចក្ររ៉ូស៊ីង អ្នកស្រី ឡាក់ ដារ៉ាមុន្នី បានទេ នៅថ្ងៃនេះ។
ប៉ុន្តែអ្នកស្រី ឡាក់ ដារ៉ាមុន្នី បានប្រាប់ វីអូឌី កាលពីថ្ងៃទី១១ ខែមេសា ថាករណីរោងចក្របញ្ឈប់កម្មករក្នុងចំនួនច្រើននេះ ដោយសារគ្មានការបញ្ជាទិញ ហើយថាការបញ្ឈប់កម្មករនេះ គឺបានជូនដំណឹងត្រឹមត្រូវទៅតាមផ្លូវច្បាប់។ យ៉ាងណា នៅពេលសួរថា តើរោងចក្រ រ៉ូស៊ីង ត្រូវបិទទ្វារឬយ៉ាងណានោះ ប្រធានរដ្ឋបាលរោងចក្ររូបនេះសុំមិនឆ្លើយនោះទេ។
កាលពីថ្ងៃទី១៩ ខែមេសានេះ កម្មករជាង២០០នាក់ធ្វើការនៅរោងចក្រកាត់ដេរ ឃែនធើរេន អីភែរឹល (ខេមបូឌា) ក៏បាននាំគ្នាតវ៉ាបិទកំណាត់ផ្លូវវេងស្រេងជិត១ម៉ោង ស្ថិតក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ដើម្បីទាមទារឱ្យថៅកែទូទាត់ប្រាក់អតីតភាពការងារ និងប្រាក់អត្ថប្រយោជន៍ផ្សេងៗតាមច្បាប់ ក្រោយពួកគេអះអាងថា ថៅកែបានប្រមូលសម្ភារផ្សេងៗចេញពីរោងចក្រ ដោយមិនផ្ដល់ដំណឹងដល់កម្មករ។
កាលពីថ្ងៃទី៤ ខែមេសា ឆ្នាំ២០២២ សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (CCAWDU) បានបង្ហាញការខកចិត្តចំពោះក្រសួងការងារ ដែលមិនមានចំណាត់ការលើនិយោជក ក្រោយពីរោងចក្របានបិទទ្វារ និងបានបណ្ដេញកម្មករចេញពីការងារ ដោយមិនបានទូទាត់អត្ថប្រយោជន៍ជូនកម្មករនិយោជិតតាមច្បាប់ស្ដីពីការងារ។
សម្ព័ន្ធសហជីពមួយនេះឱ្យដឹងថា រោងចក្រចំនួន២៣ទីតាំង ដែលមានកម្មករសរុប១ ៤០៨នាក់ បានរងគ្រោះដោយការបញ្ឈប់ពីការងារ បន្ទាប់ពួកគេប្រើប្រាស់សិទ្ធិក្នុងការបង្កើតសហជីពក្នុងសហគ្រាសនិងគ្រឹះស្ថានដែលពួកគេកំពុងធ្វើការ ខណៈរោងចក្រខ្លះទៀតត្រូវបានបិទទ្វារដោយសារថៅកែមិនបានទូទាត់ប្រាក់ជូនកម្មករតាមច្បាប់ការងារឡើយ។
មួយទៀតនោះ សំណុំរឿងមួយចំនួនដែលក្រុមប្រឹក្សាអាជ្ញាកណ្ដាលបានដោះស្រាយនិងសម្រេចឱ្យកម្មករឈ្នះហើយ គឺមិនត្រូវបានថៅកែឬនិយោជកអនុវត្តតាមសេចក្ដីបង្គាប់របស់ក្រុមប្រឹក្សាអាជ្ញាកណ្ដាលឡើយ ដែលករណីនេះ សហជីពចាត់ទុកថាជាការរំលោភសិទ្ធិមនុស្សធ្ងន់ធ្ងរ និងជាការកេងប្រវ័ញ្ចកម្លាំងពលកម្មកម្មករ ដែលត្រូវបានហាមឃាត់ដោយច្បាប់ផងនោះ៕
