មន្ត្រីជាន់ខ្ពស់ក្រសួងមហាផ្ទៃព្រមានថា ស្ថាបនិកគណបក្សបេះដូងជាតិ លោក សៀម ភ្លុក នឹងមិនអាចគេចចេញពីសំណាញ់ច្បាប់កម្ពុជាបានឡើយ បើទោះជាលោកបានព្យាយាមដល់ទៅ២លើកមិនចូលទៅបំភ្លឺនៅតុលាការតាមបណ្ដឹងរបស់ក្រសួងក៏ដោយ។
ក្រសួងមហាផ្ទៃបានប្ដឹងលោក សៀម ភ្លុក ពីបទ «ក្លែងស្នាមមេដៃក្នុងការសុំបង្កើតគណបក្សនយោបាយ» ប៉ុន្តែលោក សៀម ភ្លុក បានបដិសេធចូលបំភ្លឺនៅតុលាការ ដោយសម្អាងថា មិនទទួលបានដីកាកោះ។
បញ្ហានេះ អ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់ វីអូឌី នៅថ្ងៃអង្គារនេះថា លោក សៀម ភ្លុក នឹងមិនអាចគេចខ្លួនទៅណាបានឡើយ បើទោះជាលោកបានព្យាយាមគេចវេះមិនចូលបំភ្លឺនៅតុលាការតាមដីកាក៏ដោយ ខណៈអាជ្ញាធរបានចាត់វិធានការខ្លះហើយ ដើម្បីទប់ស្កាត់កុំឱ្យស្ថាបនិកគណបក្សបេះដូងជាតិរូបនេះចេញទៅក្រៅប្រទេសបាន។
លោក ខៀវ សុភ័គ ថា៖ «សំខាន់ធានាថាមនុស្ស[លោក សៀម ភ្លុក]ហ្នឹងអត់រត់ទៅណាទេ! អត់មានច្រករត់ទេ! បើក្នុងរាល់ដីកាអី គេដាក់ទៅក្នុងបញ្ជីមិនឱ្យចេញហើយ»។
មន្ត្រីជាន់ខ្ពស់ក្រសួងមហាផ្ទៃរូបនេះបន្ថែមថា វិធានការបន្ត គឺក្រសួងរង់ចាំតែអនុវត្តតាមការបញ្ជារបស់ស្ថាប័នអយ្យការប៉ុណ្ណោះ។
តែយ៉ាងណា លោក ជូង ជូងី មេធាវីការពារក្ដីឱ្យលោក សៀម ភ្លុក អះអាងថា កូនក្ដីរបស់លោកមិនបានរត់គេចឬគេចវេះនូវការចូលបំភ្លឺដូចការចោទប្រកាន់ឡើយ ពោលគឺគាត់រង់ចាំឱ្យតែសមត្ថកិច្ចបញ្ជូនដីកាបង្គាប់ឱ្យចូលខ្លួនទៅដល់ផ្ទះប៉ុណ្ណោះ។ មេធាវីការពារក្ដីដដែលនិយាយថា កូនក្ដីរបស់គាត់ត្រៀមខ្លួនរួចហើយក្នុងការចូលបំភ្លឺ។
លោក ជូង ជូងី នៅតែបន្តទាមទារឱ្យចៅក្រមចេញដីកាបង្គាប់ឱ្យចូលខ្លួន បញ្ជូនទៅអាសយដ្ឋានកូនក្ដីរបស់លោកនៅទួលស្វាយព្រៃ ខណៈលោកថាកន្លងមក នគរបាលយុត្តិធម៌ពុំបានធ្វើតាមនីតិវិធី ដោយបានបញ្ជូនដីកាទៅខណ្ឌឬស្សីកែវ ដែលខុសទីតាំងទៅវិញ ហើយបែរជាដាក់សម្ពាធថា កូនក្ដីរបស់លោកមានចេតនាគេចវេះពីការចូលខ្លួនឆ្លើយបំភ្លឺ។
លោកថា៖ «ឱ្យតែសមត្ថកិច្ចបញ្ជូន [ដីកាបង្គាប់ឱ្យចូលខ្លួន] ទៅអាសយដ្ឋានរបស់គាត់ [លោក សៀម ភ្លុក] ដែលត្រឹមត្រូវ គាត់ចូលមកតុលាការហើយ ចាំបាច់រំខានឱ្យសមត្ថកិច្ចមកនាំខ្លួនគាត់ធ្វើអី! [គាត់] ត្រៀមខ្លួនចូលឆ្លើយ ឱ្យតែតុលាការចេញដីកាបង្គាប់ឱ្យចូលខ្លួន ហើយបញ្ជូនទៅដល់អាសយដ្ឋានគាត់នៅទួលស្វាយព្រៃទៅ គាត់នឹងមកចូលខ្លួនហើយ»។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ មិនបានឆ្លើយតបយ៉ាងណាទេជុំវិញរឿងនេះ ដោយលោកថាជាប់រវល់ប្រជុំ។ ដោយឡែក អ្នកនាំពាក្យសាលាដំបូងរាជធានីភ្នំពេញមួយរូបទៀត គឺលោក សួស វិទ្យារ៉ាន់ឌី ពុំអាចទាក់ទងបានឡើយនៅថ្ងៃអង្គារនេះ។
អ្នកសម្របសម្រួលផ្នែកអង្កេត និងតស៊ូមតិ នៃអង្គការខុមហ្រ្វែល លោក កន សាវាង្ស ថ្លែងថា សំណុំរឿងរបស់លោក សៀម ភ្លុក គឺពាក់ព័ន្ធរឿងនយោបាយ ដែលរដ្ឋាភិបាល និងព្រះរាជអាជ្ញារ គួរដោះស្រាយតាមរបៀបនយោបាយជាជាងការប្ដឹងផ្ដល់។
លោកថា តាមបទពិសោធន៍កន្លងមក លោកមិនដែលជួបប្រទះនូវករណីដែលក្រសួងមហាផ្ទៃប្ដឹងផ្ដល់បក្សនយោបាយទៅតុលាការបែបនេះទេ។
លោក កន សាវាង្ស ចាត់ទុកការមិនចូលខ្លួនតាមដីការបស់លោក សៀម ភ្លុក ថាជាសិទ្ធិសម្រេចចិត្តរបស់លោក និងអាស្រ័យលើការជជែកជាមួយមេធាវី។
បើទោះជាយ៉ាងនេះក្ដី មន្ត្រីសង្គមស៊ីវិលរូបនេះថា ច្បាប់ស្ដីពីការចុះបញ្ជីគណបក្សនយោបាយមានការកំណត់ត្រឹមតែការបដិសេធប៉ុណ្ណោះ ពុំមានចំណុចណាមួយចង្អុលបង្ហាញថា បើរកឃើញនូវភាពមិនត្រឹមត្រូវ ហើយត្រូវប្ដឹងទៅតុលាការទេ។
លោកថា៖ «អ៊ីចឹងរឿងហ្នឹងបញ្ចប់ គឺបញ្ចប់ត្រឹមក្រសួងមហាផ្ទៃខ្លួនឯងហ្នឹង! រឿងសំខាន់ គឺគាត់ប្ដឹងទៅតុលាការអំពីរឿងការក្លែងបន្លំអីហ្នឹង។ អ៊ីចឹងចំណុចសំខាន់វានៅត្រង់ហ្នឹង វាមិនមែនសំខាន់នៅលើថាតុលាការចេញ [ដីកាបង្គាប់ឱ្យចូលខ្លួន] ឬមិនចេញទេ ពីព្រោះក្រសួងមហាផ្ទៃជាអ្នកប្ដឹងពាក់ព័ន្ធទៅរឿងការក្លែងបន្លំ [ស្នាមមេដៃក្នុងការសុំបង្កើតគណបក្ស] ហ្នឹង។ អ៊ីចឹងកន្លែងហ្នឹង គឺដក [ពាក្យបណ្ដឹង]ទៅ យើងបញ្ចប់ត្រឹមតែការបដិសេធទៅ រឿងអ្វីគ្រប់យ៉ាងវាបញ្ចប់ហើយ វាអត់មានរឿងអីត្រូវបន្តវែងឆ្ងាយទៀត»។
លោក សៀម ភ្លុក ត្រូវបានសាលាដំបូងរាជធានីភ្នំពេញចេញដីកាកោះហៅឱ្យចូលខ្លួនទៅឆ្លើយបំភ្លឺម្ដងរួចមកហើយ កាលពីថ្ងៃទី២២ ខែមីនា ឆ្នាំ២០២២ ពាក់ព័ន្ធនឹងរឿងក្លែងបន្លំស្នាមមេដៃសមាជិកដើម្បីបង្កើតគណបក្សនយោបាយ។ ប៉ុន្តែនៅថ្ងៃទី២២ ខែមីនានោះ លោកមិនបានចូលទៅបំភ្លឺទេ ដោយថាមិនបានទទួលដីកាពីតុលាការ។
ដោយឡែក កាលពីថ្ងៃទី៤ ខែមេសា ឆ្នាំ២០២២ ចៅក្រមស៊ើបសួរសាលាដំបូងរាជធានីភ្នំពេញ បានចេញដីកាបង្គាប់ឱ្យនាំខ្លួនលោក សៀម ភ្លុក ប្រគល់ជូនសាលាដំបូងរាជធានីភ្នំពេញ តាមរយៈកម្លាំងសាធារណៈ ឱ្យបានមុនថ្ងៃទី២៥ ខែដដែល ពាក់ព័ន្ធនឹងបទចោទ «ក្លែងបន្លំ និងប្រើប្រាស់លិខិតក្លែង» ក្នុងការបង្កើតគណបក្សបេះដូងជាតិ ដើម្បីធានាដល់ការស៊ើបសួរឱ្យបានពេញលេញនៅចំពោះមុខចៅក្រមស៊ើបសួរ។
ទោះបីជាយ៉ាងនេះក្ដី កាលពីថ្ងៃទី២០ ខែមេសា លោក សៀម ភ្លុក បានចេញសេចក្ដីប្រកាសព័ត៌មានថា លោកនឹងចូលខ្លួនទៅឆ្លើយបំភ្លឺតាមការកោះហៅរបស់តុលាការ ដោយមិនមានចេតនាគេចវេះដូចការផ្សព្វផ្សាយពាក្យចចាមអារ៉ាមតាមបណ្ដាញសង្គមនិងសារព័ត៌មានខ្លះនោះឡើយ។
គណបក្សបេះដូងជាតិ ដែលគេសង្ស័យថាមានលោក សម រង្ស៊ី ស្ថិតនៅពីក្រោយនៃការបង្កើតគណបក្សនេះ ត្រូវបានក្រសួងមហាផ្ទៃចោទប្រកាន់ថា បាន «ក្លែងស្នាមមេដៃ និងមានចេតនាទុច្ចរិត»។
កាលពីថ្ងៃទី១៦ ខែវិច្ឆិកា ឆ្នាំ២០២១ ក្រសួងមហាផ្ទៃបានបដិសេធសំណើសុំចុះឈ្មោះក្នុងបញ្ជីបង្កើតគណបក្សនយោបាយរបស់ស្ថាបនិកគណបក្សបេះដូងជាតិ។ ដោយមិនសុខចិត្តទៅនឹងការសម្រេចនោះ នៅថ្ងៃទី២៦ ខែវិច្ឆិកា ឆ្នាំ២០២១ លោក សៀម ភ្លុក ក៏បានដាក់ពាក្យបណ្ដឹងទៅតុលាការកំពូលដើម្បីតវ៉ា ប៉ុន្តែបណ្តឹងនោះត្រូវបានតុលាការកំពូលច្រានចោល៕
