ក្រសួងកសិកម្ម រុក្ខាប្រមាញ់ និងនេសាទ ស្នើទៅអាជ្ញាធរមូលដ្ឋានត្រូវចុះពិនិត្យ វាយតម្លៃ ជួយណែនាំអ្នកចិញ្ចឹមក្រពើឱ្យមានប្រសិទ្ធភាព ធ្វើយ៉ាងណាឱ្យពួកគេបង្កើនការប្រុងប្រយ័ត្នបន្ថែមទៀត ដើម្បីធានាបាននូវសុវត្ថិភាពទាំងអ្នកចិញ្ចឹម និងទេសចរ។
ការស្នើនេះ ក្រោយមានហេតុការណ៍ក្រពើជាច្រើនក្បាលខាំមន្ត្រីសាលាស្រុកពួក ខេត្តសៀមរាប និងជាអ្នកចិញ្ចឹមផងនោះ បណ្ដាលឱ្យរបួសធ្ងន់កាលពីយប់ឈានចូលថ្ងៃទី១៨ ខែមេសា ឆ្នាំ២០២២ ហើយក្រោយមកបានស្លាប់បន្ទាប់ពីបញ្ជូនមកសម្រាកព្យាបាលនៅមន្ទីរពេទ្យក្នុងរាជធានីភ្នំពេញបានមួយរយៈពេលខ្លី។
ក្នុងសេចក្ដីណែនាំរបស់ក្រសួងកសិកម្ម កាលពីថ្ងៃទី២៥ ខែមេសា ឆ្នាំ២០២២ ស្ដីពីការគ្រប់គ្រង និងរក្សាសុវត្ថិភាពនៅកសិដ្ឋាន ឬកន្លែងចិញ្ចឹមក្រពើ បានអះអាងថា កន្លងមក រដ្ឋបាលជលផលបានរៀបចំ និងផ្សព្វផ្សាយគោលការណ៍ណែនាំស្ដីពីបច្ចេកទេសនៃការគ្រប់គ្រង ការចិញ្ចឹម និងការអភិរក្សក្រពើ ដើម្បីធានាសុវត្ថិភាពនិងប្រសិទ្ធភាពនៅតាមកសិដ្ឋាន ឬកន្លែងចិញ្ចឹមក្រពើនានា។
យ៉ាងណា រដ្ឋបាលជលផលស្នើប្រធានមន្ទីរកសិកម្ម នាយខណ្ឌជលផល សហការជាមួយអាជ្ញាធរថ្នាក់ក្រោមជាតិ និងសមាគមអ្នកចិញ្ចឹមក្រពើ បន្តផ្សព្វផ្សាយ និងចុះណែនាំបន្ថែមដល់អាជីវករ និងវារីវប្បករចិញ្ចឹមក្រពើ ធ្វើយ៉ាងណាត្រូវមានរបងហ៊ុមព័ទ្ធបរិវេណ និងប្រព័ន្ធហេដ្ឋារចនាសម្ព័ន្ធអាងចិញ្ចឹមឱ្យបានរឹងមាំ។
ក្រៅពីនោះ អ្នកចិញ្ចឹមត្រូវសាងសង់ហេដ្ឋារចនាសម្ព័ន្ធអាងចិញ្ចឹមតាមបទដ្ឋានបច្ចេកទេស ដោយយកចិត្តទុកដាក់លើរបងព័ទ្ធជុំវិញអាង បែ ជណ្ដើរ ទ្វារ ស្ពាន និងបង្កាន់ដៃ ឱ្យបានរឹងមាំ ដើម្បីធានាសុវត្ថិភាពខ្ពស់ ចាក់សោរទ្វារឱ្យបានត្រឹមត្រូវ ហាមឃាត់ក្មេងចូលលេងក្នុងបរិវេណចិញ្ចឹមក្រពើ ឬប្រើប្រាស់ក្មេងផ្ដល់ចំណី ឬលាងសម្អាតអាង។
ក្រសួងកសិកម្មបន្តថា៖ «[អាជ្ញាធរពាក់ព័ន្ធត្រូវ] ណែនាំឱ្យអ្នកចិញ្ចឹមមានការប្រុងប្រយ័ត្នខ្ពស់ នៅពេលផ្ដល់ចំណី លាងសម្អាត ឬនៅពេលចាប់ក្រពើ»។
ក្រសួងបន្ថែមថា អ្នកចិញ្ចឹមត្រូវរៀបចំសោភ័ណភាព និងអនាម័យក្នុងបរិវេណកសិដ្ឋាន ឬកន្លែងចិញ្ចឹមក្រពើជាប្រចាំ ដោយគិតគូរអំពីផលប៉ះពាល់បរិស្ថាន និងសុខភាពសាធារណៈ ព្រមទាំងសម្រាប់បម្រើឱ្យទេសចរណ៍។
ក្រសួងកសិកម្មបានជំរុញឱ្យមន្ត្រីជលផលដែលមានសមត្ថកិច្ច ត្រូវចុះត្រួតពិនិត្យ និងវាយតម្លៃលើគុណភាព និងសុវត្ថិភាពអាង នៅតាមកសិដ្ឋាន ឬកន្លែងចិញ្ចឹមក្រពើដែលស្ថិតនៅក្នុងដែនសមត្ថកិច្ចរបស់ខ្លួនឱ្យបានជាប់ជាប្រចាំ។
ក្រសួងបានប្រាប់ឱ្យសមាគមអ្នកចិញ្ចឹមក្រពើ ជួយណែនាំបន្ថែម និងប្រជុំជាទៀងទាត់ ដើម្បីផ្ដល់ឱកាសឱ្យអ្នកចិញ្ចឹមបានចែករំលែកបទពិសោធន៍ពីគ្នាទៅវិញទៅមក លើការងារសុវត្ថិភាព អនាម័យ និងទីផ្សារក្រពើផងដែរ។
កាលពីយប់ឆ្លងចូលថ្ងៃទី១៨ ខែមេសា ឆ្នាំ២០២២ មន្ត្រីសាលាស្រុកពួក លោក ស៊ូ សុធា អាយុ៣៧ឆ្នាំ ត្រូវបានក្រពើខាំឱ្យរបួសធ្ងន់និងបានស្លាប់ក្រោយបញ្ជូនមកព្យាបាលនៅមន្ទីរពេទ្យបានមួយថ្ងៃ។ ហេតុការណ៍នេះកើតឡើងនៅចំណុចទ្រុងក្រពើ ស្ថិតនៅខាងក្រោយផ្ទះរបស់ជនរងគ្រោះ ក្នុងភូមិកំពង់តាយ៉ង ឃុំពួក ស្រុកពួក ខេត្តសៀមរាប។
តាមការសន្និដ្ឋានរបស់សមត្ថកិច្ច ករណីក្រពើខាំនេះកើតឡើងអាចដោយសារជនរងគ្រោះក្រោកទៅបត់ជើងតូចនៅរំលងអធ្រាត្រនោះ ហើយរអិលធ្លាក់ចូលក្នុងអាងសត្វក្រពើ និងត្រូវបានក្រពើខាំតែម្ដង៕
