អគ្គលេខាធិការអង្គការណាតូ (NATO) លោក Jens Stoltenberg បានឱ្យដឹងនៅថ្ងៃព្រហស្បតិ៍ម្សិលមិញថា អស់រយៈពេលជាច្រើនឆ្នាំ អង្គការមួយនេះតែងតែត្រៀមខ្លួនរួចជាស្រេច ដើម្បីផ្ដល់ការគាំទ្ររបស់ខ្លួនសម្រាប់អ៊ុយក្រែន ក្នុងសង្រ្គាមប្រឆាំងនឹងរុស្ស៊ី រួមទាំងការជួយដល់ទីក្រុងកៀវ (Kyiv) ដើម្បីផ្លាស់ប្ដូរពីការប្រើសព្វាវុធក្នុងសម័យសូវៀត ទៅជាអាវុធនិងប្រព័ន្ធយោធាទំនើបរបស់បស្ចិមប្រទេសវិញផងដែរ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ការថ្លែងរបស់អគ្គលេខាធិការអង្គការណាតូរូបនេះ ត្រូវបានធ្វើឡើងបន្ទាប់ពីវិមានក្រឹមឡាំងបានព្រមានថា ការផ្គត់ផ្គង់សព្វាវុធរបស់លោកខាងលិចដល់អ៊ុយក្រែន រួមទាំងអាវុធធុនធ្ងន់នានា បានបង្កជាការគំរាមកំហែងដល់សន្តិសុខនៃទ្វីបអឺរ៉ុប និងបង្កអស្ថិរភាព។
ថ្លែងក្នុងកិច្ចប្រជុំមួយដែលធ្វើឡើងនៅទីក្រុងព្រុចសែល (Brussels) លោក Jens Stoltenberg ថា៖ «យើងត្រូវតែត្រៀមខ្លួនសម្រាប់រយៈពេលវែង។ ជាការពិតណាស់ សង្រ្គាមនេះអាចនឹងបន្តអូសបន្លាយរយៈពេលជាច្រើនខែនិងច្រើនឆ្នាំបន្តទៀត»។
ទាក់ទិននឹងករណីនេះ លោកបន្តថា បណ្ដាប្រទេសលោកខាងលិចនឹងបន្តដាក់សម្ពាធឱ្យបានច្រើនតាមដែលអាចធ្វើទៅបានលើប្រធានាធិបតីរុស្ស៊ី លោក វ្លាឌីមៀរ ពូទីន ដើម្បីឱ្យលោកបញ្ចប់សង្រ្គាមឈ្លានពានលើអ៊ុយក្រែន តាមរយៈការដាក់ទណ្ឌកម្ម ក៏ដូចជាការផ្ដល់ជំនួយយោធាដល់ទីក្រុងកៀវផងដែរ។
លោក Jens Stoltenberg បន្ថែមថា៖ «សម្ព័ន្ធមិត្តរបស់ណាតូ បច្ចុប្បន្នកំពុងតែរៀបចំផ្ដល់ការគាំទ្រក្នុងរយៈពេលវែង រួមទាំងការជួយជ្រោមជ្រែងដល់អ៊ុយក្រែន ក្នុងការផ្លាស់ប្ដូរពីការប្រើបរិក្ខាយោធាសូវៀតដែលហួសសម័យ ទៅជាអាវុធនិងប្រព័ន្ធស្តង់ដាររបស់អង្គការណាតូដែលទំនើបជាងមុនផងដែរ»។
ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំងបន្ទាប់ពីរុស្ស៊ីបានបើកការឈ្លានពានទ្រង់ទ្រាយធំមកលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីការប្រកាសសង្រ្គាមមួយដោយលោកប្រធានាធិបតី វ្លាឌីមៀរ ពូទីន។
ទោះជាយ៉ាងណា រុស្ស៊ីធ្លាប់បានលើកឡើងកាលពីពេលកន្លងទៅថា សកម្មភាពរបស់ខ្លួននេះ គឺជាការអនុវត្ត «ប្រតិបត្តិការយោធាពិសេសមួយ» ដើម្បីបញ្ឈប់រដ្ឋាភិបាលអ៊ុយក្រែនពីការប្រព្រឹត្តអំពើប្រល័យពូជសាសន៍ប្រឆាំងនឹងប្រជាជនរបស់ខ្លួន ខណៈដែលការចោទប្រកាន់នេះ ត្រូវបានប្រទេសលោកខាងលិចចាត់ទុកថា ជាការលើកឡើងដោយគ្មានមូលដ្ឋានច្បាស់លាស់៕