ប្រទេសកូរ៉េខាងត្បូង នឹងលើកលែងកាតព្វកិច្ចពាក់ម៉ាសនៅទីសាធារណៈ ដោយផ្ដើមអនុវត្តចាប់ពីសប្ដាហ៍ក្រោយទៅ ដើម្បីបន្ធូរបន្ថយការរឹតបន្តឹងទាក់ទងនឹងការឆ្លងរីករាលដាលនៃវីរុសកូវីដ-១៩។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
នាយករដ្ឋមន្រ្តីកូរ៉េខាងត្បូង លោក Kim Boo-kyum បានថ្លែងឱ្យដឹងនៅថ្ងៃសុក្រនេះថា ការសម្រេចចិត្តនេះត្រូវបានធ្វើឡើង ខណៈរដ្ឋាភិបាលមិនអាចបន្តមើលពីផលរំខាន [ពីការពាក់ម៉ាស] ដែលប្រជាពលរដ្ឋរបស់ខ្លួនជួបប្រទះឡើយ ស្របពេលដែលស្ថានភាពនៃជំងឺរាតត្បាតនាពេលបច្ចុប្បន្នហាក់មានភាពធូរស្បើយ បើធៀបនឹងកាលពីពេលកន្លងទៅ។
ទោះជាយ៉ាងណា លោកបន្ថែមថា សាធារណជននៅតែតម្រូវឱ្យពាក់ម៉ាស់ក្នុងករណីដែលពួកគេចូលរួមក្នុងព្រឹត្តិការណ៍ដែលមានមនុស្សចាប់ពី៥០នាក់ឡើងទៅ ដូចជា ការជួបជុំនានា ការប្រគុំតន្ត្រី និងក្នុងកីឡដ្ឋាន ជាដើម។
គួរបញ្ជាក់ថា ប្រទេសកូរ៉េខាងត្បូង នៅថ្ងៃសុក្រនេះ បានប្រកាសរកឃើញអ្នកឆ្លងវីរុសកូវីដ-១៩ថ្មី ចំនួន៥០ ៥៦៨ករណី ដែលធ្លាក់ចុះពីចំនួន៦២០ ០០០ក្នុងមួយថ្ងៃអំឡុងពាក់កណ្ដាលខែមីនា ខណៈក្នុងចំណោមប្រជាជនកូរ៉េខាងត្បូងប្រមាណ៥២លាននាក់ ក្នុងនោះមានជិត៨៧ភាគរយបានចាក់វ៉ាក់សាំងពេញលេញ។ នេះបើយោងតាមទិន្នន័យរបស់ទីភ្នាក់ងារគ្រប់គ្រង និងបង្ការជំងឺឆ្លងកូរ៉េ (KDCA)៕
