អ្នកភូមិអះអាងថា ពួកគេជាង៤០០នាក់ មកពីឃុំចំនួន៤ នៃស្រុកស្រែអំបិល ខេត្តកោះកុង បានប្រមូលផ្ដុំគ្នានៅមុខសាលាស្រុក នាព្រឹកថ្ងៃព្រហស្បតិ៍នេះ ដើម្បីជំរុញទៅអាជ្ញាធរស្រុកឱ្យពន្លឿនការដោះស្រាយបញ្ចប់ជម្លោះដីធ្លី និងស្នើសុំដីសម្បទានសង្គមកិច្ចពីរដ្ឋ។
តំណាងសហគមន៍១៩៧ ខេត្តកោះកុង អ្នកស្រី ដេត ហួរ ប្រាប់វីអូឌីថា ក្រុមរបស់គាត់ទៅសាលាស្រុកនៅព្រឹកនេះ គឺដើម្បីសួរនាំរដ្ឋបាលស្រុក អំពីដំណើរការដោះស្រាយជម្លោះដីធ្លីរវាងពលរដ្ឋ១៩៧គ្រួសារ ជាមួយក្រុមហ៊ុន ហេង ហ៊ុយ អភិវឌ្ឍន៍ (Heng Huy Development Co., Ltd) ក្រោយពីក្រសួងមហាផ្ទៃ និងអាជ្ញាធរខេត្ត បានប្រគល់ភារកិច្ចនេះឱ្យអាជ្ញាធរស្រុកដោះស្រាយ។
តំណាងសហគមន៍រូបនេះឱ្យដឹងថា ពួកគាត់ទាំង១៩៧គ្រួសារ ត្រូវបានក្រុមហ៊ុន ហេង ហ៊ុយ រំលោភយកដីធ្លីតាំងពីឆ្នាំ២០០៧ ហើយពួកគាត់បានតវ៉ាជាង៣ឆ្នាំហើយរហូតមកដល់ពេលនេះ មិនទាន់ទទួលបានដំណោះស្រាយនៅឡើយទេ ខណៈតំណាងពលរដ្ឋ១០នាក់កំពុងជាប់បណ្ដឹងនៅតុលាការពាក់ព័ន្ធការតវ៉ាដីធ្លីជាមួយក្រុមហ៊ុនមួយនេះ។
អ្នកស្រីបន្ថែមថា៖ «យើងចង់ដឹងថា អាជ្ញាធរបានយកចិត្តទុកដាក់ដោះស្រាយជូនប្រជាពលរដ្ឋយើងឬអត់! ព្រោះប្រជាពលរដ្ឋយើង គាត់អ្នកបាត់បង់ដីធ្លីផង គាត់កំពុងប្រឈមនឹងប្រព័ន្ធតុលាការផង ហើយអ្នកខ្លះបានធ្លាក់ខ្លួនក្រីក្រផង។ អ៊ីចឹងហើយ ខ្ញុំគ្រាន់តែចង់ប្រាប់ពួកគាត់ពីទុក្ខលំបាករបស់ពួកយើង។ ពួកយើងចង់បានឱ្យមានជីវភាពគ្រប់គ្រាន់ កុំឱ្យមានការដាក់សម្ពាធពីអាជ្ញាធរ និងអ្នកមានលុយមានអំណាច»។
តំណាងសហគមន៍៧៦៦ នៅឃុំដងពែង អ្នកស្រី គៀត គឹមស៊ុន ឱ្យដឹងថា ក្រុមរបស់គាត់មានពលរដ្ឋរងផលប៉ះពាល់ចំនួន ២២៦គ្រួសារ បាននាំគ្នាទៅសាលាស្រុកនៅព្រឹកនេះ ដើម្បីស្នើសុំដីសម្បទានសង្គមកិច្ចពីរដ្ឋ ដោយថា ពួកគាត់ជាពលរដ្ឋក្រីក្រកំពុងខ្វះដីធ្លីសម្រាប់ធ្វើកសិកម្មបង្កបង្កើនផលចិញ្ចឹមជីវិត។
អ្នកស្រីបន្តថា កន្លងមក ពួកគាត់ធ្លាប់បានដាក់សំណើទៅរដ្ឋបាលស្រុកម្ដងហើយ ប៉ុន្តែរហូតមកដល់ពេលនេះ មិនទាន់មានការដោះស្រាយជូនពួកគាត់ឡើយ។
អ្នកស្រីបន្ថែមថា៖ «ប្រជាជនយើងក្រីក្រណាស់ អត់មានដីធ្លីអីសម្រាប់បង្កបង្កើនផលធ្វើកសិកម្មទេ»។
តំណាងសហគមន៍១៧៥ នៅឃុំជីខលើ អ្នកស្រី យី គន្ធា និយាយថា ក្រុមរបស់គាត់បានជំរុញទៅអាជ្ញាធរឱ្យពន្លឿនចេញបណ្ណកម្មសិទ្ធិដីធ្លី និងធ្វើផ្លូវក្នុងសហគមន៍ទៅតាមការសន្យា។ អ្នកស្រីថា អាជ្ញាធរវាស់វែងដីធ្លីជូនពួកគាត់ ប៉ុន្តែចេញបណ្ណកម្មសិទ្ធិខុសទីតាំងភូមិ ហើយកន្លងមក អាជ្ញាធរបានសន្យាអភិវឌ្ឍន៍ផ្លូវក្នុងសហគមន៍ជូនពលរដ្ឋ ប៉ុន្តែជាច្រើនឆ្នាំមកហើយ នៅមិនទាន់ឃើញអាជ្ញាធរធ្វើជូនពលរដ្ឋនៅឡើយ។
អ្នកស្រីបន្ថែមថា៖ «អាជ្ញាធរបានវាស់វែងឱ្យពួកខ្ញុំហើយ ប៉ុន្តែយើងរស់នៅព្រែកជីក ដល់គាត់ចេញប្លង់ឱ្យយើង ដាក់នៅភូមិឈូកវិញ ដែលយើងមិនអាចទទួលយកបានទេ។ អីចឹងយើងចង់ឱ្យអាជ្ញាធរស្រុកហ្នឹងបង្ហាញនូវប្លង់ផែនទីព្រំប្រទល់របស់ក្រសួងមហាផ្ទៃ ថាក្រសួងបានកាត់ភូមិព្រែកជីកចូលភូមិឈូកតាំងពីពេលណា»។
អភិបាលរងស្រុកស្រែអំបិល លោក ហុង ប្រុស មានប្រសាសន៍ថា ពលរដ្ឋដែលប្រមូលផ្ដុំគ្នានៅមុខសាលាស្រុកនោះ មកពីឃុំជីខលើ ឃុំដងពែង និងឃុំជីខក្រោម ដោយពួកគេទាមទារឱ្យមានការដោះស្រាយដីធ្លី និងស្នើសុំដីសម្បទានសង្គមកិច្ច។ លោកថា រដ្ឋបាលស្រុកបានទទួលយកសំណើរបស់អ្នកភូមិទៅពិនិត្យនិងពិចារណា ដើម្បីសម្រេចថាដោះស្រាយឬក៏មិនដោះស្រាយ ។
លោកបន្ថែមថា៖ «យើងទទួលសំណើគាត់ដើម្បីពិចារណាមើល ព្រោះថា ដីសម្បទានសង្គមកិច្ច យើងធ្វើការបែងចែកដល់គាត់ ទាល់តែគាត់អត់[មានដី]ពិតប្រាកដមែន។ អ៊ីចឹងយើងត្រូវសិក្សាមើលសិន យើងមិនទាន់មានគោលការណ៍ឱ្យមិនឱ្យទេ យើងត្រូវបង្កើតគណៈកម្មការសិក្សាពីរឿងហ្នឹង»។
មន្ត្រីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន មានប្រសាសន៍ថា បញ្ហាជម្លោះដីធ្លី និងការស្នើសុំដីសម្បទានសង្គមកិច្ចរបស់ពលរដ្ឋនេះ បានកើតឡើងជាច្រើនឆ្នាំមកហើយ ប៉ុន្តែអាជ្ញាធរពាក់ព័ន្ធមិនបានដោះស្រាយបញ្ចប់ជូនពលរដ្ឋនៅឡើយ។
មន្ត្រីសិទ្ធិមនុស្សរូបនេះជំរុញឱ្យអាជ្ញាធរចុះសិក្សាលើសំណើរបស់ប្រជាពលរដ្ឋ និងដោះស្រាយជូនពួកគេឱ្យបានឆាប់ ដើម្បីឱ្យមានដីធ្លីសម្រាប់បង្កបង្កើនផល និងឈប់ដើរតវ៉ាបន្តទៀត។
លោកបន្ថែមថា៖ «អាជ្ញាធរគួរតែចុះសិក្សាពីសំណើរបស់ពួកគាត់ តើគាត់ពិតជាខ្វះខាតដីសម្រាប់ធ្វើស្រែឬចម្ការមែនឬក៏អត់ បើសិនជាអត់ទេ អាជ្ញាធរគួរតែរូតរះក្នុងការផ្ដល់ដីសម្បទានសង្គមកិច្ច ព្រោះថាកន្លងមក ការផ្ដល់ដីដែលភាគច្រើនយើងឃើញថា រដ្ឋាភិបាលបានសម្រេចប្រគល់ដីសម្បទានសេដ្ឋកិច្ចទៅឱ្យក្រុមហ៊ុន។ សម្រាប់ប្រជាពលរដ្ឋ យើងឃើញថាមានភាគតិចបំផុត។ អ៊ីចឹងអាជ្ញាធរគួរតែពិចារណានិងរូតរះក្នុងការពិចារណាសំណើរបស់ប្រជាពលរដ្ឋ»៕