លោកនាយករដ្ឋមន្ត្រី ហ៊ុន សែន បានចាត់ទុកថ្ងៃទី៧ ខែឧសភានេះថា គឺជាកំណត់ត្រាលើកដំបូងនៅក្នុងរយៈពេលជាងមួយឆ្នាំ ដែលកម្ពុជារកមិនឃើញអ្នកឆ្លងជំងឺកូវីដ-១៩នោះទេ។
តាមរយៈសារសំឡេងនៅល្ងាចថ្ងៃទី៧ ខែឧសភានេះលោកនាយករដ្ឋមន្ត្រី ហ៊ុន សែន បើទោះបីជាកំពុងស្ថិតនៅក្នុងថ្ងៃកាន់មរណទុក្ខបន្ទាប់ពីបងប្រុសបង្កើតរបស់លោកទើបទទួលមរណភាពក្តី លោកបានប្រកាសថា ថ្ងៃនេះគឺជាលើកដំបូងក្នុងរយៈពេលជិតមួយឆ្នាំ ពោលគឺចាប់តាំងពីថ្ងៃទី២០ ខែកុម្ភៈ ឆ្នាំ២០២១ ដែលកម្ពុជាពុំមានករណីអ្នកឆ្លងជំងឺកូវីដ-១៩ កើតឡើងនោះទេ។
លោកបានចាត់ទុកថា នេះគឺជាជោគជ័យមួយរបស់រដ្ឋាភិបាលកម្ពុជាក្នុងការប្រយុទ្ធប្រឆាំងនឹងជំងឺកូវីដ-១៩។
លោកនាយករដ្ឋមន្ត្រី ហ៊ុន សែន បន្តថា បើទោះបីជានៅថ្ងៃស្អែកមានអ្នកឆ្លងជំងឺកូវីដ-១៩ថ្មី ឬ មិនមានក្តី តែយ៉ាងហោចណាស់កម្ពុជាមានមួយថ្ងៃ (ថ្ងៃទី៧ខែឧសភា) ដែលមិនមានអ្នកឆ្លងជំងឺកូវីដ-១៩ឡើយ។
លោកថា៖ «ថ្ងៃនេះ ខ្ញុំព្រះករុណាខ្ញុំ មានកិត្តិយសដើម្បីទូលប្រគេនទៅដល់ព្រះតេជគុណព្រះសង្ឃគ្រប់ព្រះអង្គ និងជម្រាបជូនបងប្អូនជនរួមជាតិជាទីគោរពស្រលាញ់ថា ថ្ងៃនេះជាលើកដំបូង ក្នុងរយៈពេលចាប់តាំងពីថ្ងៃទី២០ ខែកុម្ភៈ ឆ្នាំ២០២១ ដែលព្រះរាជាណាចក្រកម្ពុជារបស់យើង ពុំមានករណីកូវីដកើតឡើងនោះទេ បានសេចក្តីថា ថ្ងៃនេះយើងពុំមានការឆ្លងសូម្បីមួយករណី គឺសូន្យករណី»។
លោកបន្តថា៖ «រឿងនេះបានកើតឡើងបន្ទាប់ពីការសាកល្បងដ៏ខ្លាំងមួយនៅក្នុងដំណាក់កាលនៃការបើកឱកាសអោយប្រជាជនបានដើរលេងចូលឆ្នាំ ដែលជាការបើកសាកល្បងដ៏ធំធេងហើយដែលពុំធ្លាប់មាននៅក្នុងប្រវត្តិសាស្ត្រ ដែលមានអ្នកចូលរួមដើរលេងដ៏ច្រើនកុះករ»។
តាមរយៈសារសំឡេងនេះ លោកនាយករដ្ឋមន្ត្រីក៏បានថ្លែងអំណរគុណទៅដល់ប្រទេសនានាដែលបានផ្តល់ជំនួយវ៉ាក់សាំងដល់ប្រទេសកម្ពុជាផងដែរ។
គួរជម្រាបជូនថា មួយរយៈពេលចុងក្រោយនេះ តួលេខអ្នកឆ្លងជំងឺកូវីដ-១៩ នៅក្នុងមួយថ្ងៃៗ បានធ្លាក់ចុះមកនៅត្រឹមពីរនាក់ ឬ មួយនាក់ប៉ុណ្ណោះ។
ជាក់ស្តែងនៅថ្ងៃទី៦ ខែឧសភាម្សិលមិញនេះ កម្ពុជាបានរកឃើញអ្នកឆ្លងជំងឺកូវីដ-១៩ ប្រភេទអូមីក្រុងពីរនាក់ប៉ុណ្ណោះ ខណៈអ្នកជំងឺជាសះស្បើយមានចំនួន ៥ នាក់។
គិតត្រឹមថ្ងៃទី៧ ខែឧសភា នេះ កម្ពុជារកឃើញអ្នកឆ្លងជំងឺកូវីដ-១៩ សរុប ១៣៦ ២៦២ នាក់ ក្នុងនោះអ្នកជំងឺព្យាបាលជាសះស្បើយចំនួន ១៣៣ ១៧៧នាក់ និងអ្នកស្លាប់មានចំនួន ៣ ០៥៦នាក់៕