ក្រសួងសុខាភិបាលបានប្រកាសមិនទទួលស្គាល់បណ្ណឬវិញ្ញាបនបត្រចាក់វ៉ាក់សាំងកូវីដ-១៩ ដែលចេញដោយក្រុមហ៊ុនឯកជនឬបុគ្គលណា ក្រៅពីក្រសួងសាម៉ីផ្ទាល់ និងក្រសួងការពារជាតិឡើយ។
សេចក្តីប្រកាសព័ត៌មានរបស់ក្រសួងសុខាភិបាល ចុះថ្ងៃទី១២ ខែឧសភា ឆ្នាំ២០២២នេះ បានច្រានចោលទាំងស្រុងចំពោះការប្រកាសផ្សព្វផ្សាយតាមបណ្ដាញសង្គមរបស់ក្រុមហ៊ុនឯកជន និងបុគ្គលមួយចំនួន ដែលថា ពួកគេបានសហការជាមួយក្រសួងសុខាភិបាលក្នុងការធ្វើបណ្ណចាក់វ៉ាក់សាំងកូវីដ-១៩ថ្មី ឬអាចចេញវិញ្ញាបនបត្រចាក់វ៉ាក់សាំងនេះជូនប្រជាពលរដ្ឋសម្រាប់ប្រើប្រាស់ទៅក្រៅប្រទេស។
ករណីនេះ ក្រសួងបញ្ជាក់ថា ការស្នើសុំវិញ្ញាបនបត្រចាក់វ៉ាក់សាំងនេះធ្វើឡើងតាមប្រព័ន្ធអនឡាញដោយខ្លួនឯងឬមានអ្នកស្នើសុំជំនួស តារយៈតំណភ្ជាប់ search.vaccine.gov.kh និងមិនមានការបង់ប្រាក់កម្រៃនោះទេ។
ក្រសួងសុខាភិបាលបន្តថា៖ «សូមបដិសេធចោលទាំងស្រុងនូវការប្រកាសរបស់ក្រុមហ៊ុននិងបុគ្គលទាំងនោះ និងសុំបញ្ឈប់សកម្មភាពឃោសនាទាំងអស់នេះជាបន្ទាន់។ ជាមួយគ្នានេះ គណៈកម្មការចំពោះកិច្ចចាក់វ៉ាក់សាំងកូវីដ-១៩ សូមអំពាវនាវដល់ប្រជាពលរដ្ឋទាំងអស់ត្រូវឈប់ជឿលើការឃោសនាបោកប្រាស់ទាំងនេះ ដើម្បីចៀសវាងការខាតបង់ប្រាក់ និងបង្កឱ្យមានភាពអនាធិបតេយ្យក្នុងសង្គម ដែលធ្វើឱ្យប៉ះពាល់ដល់គោលនយោបាយរបស់រាជរដ្ឋាភិបាល»។
បើតាមរបាយការណ៍របស់ក្រសួងសុខាភិបាល អត្រាអ្នកចាក់វ៉ាក់សាំងកូវីដ-១៩នៅកម្ពុជា គិតត្រឹមថ្ងៃទី១១ ខែឧសភា ឆ្នាំ២០២២ បានចំនួន ៩៣,៦៩% បើធៀបនឹងចំនួនប្រជាជនសរុប១៦លាននាក់។
របាយការណ៍ដដែលបញ្ជាក់លម្អិតថា ការចាក់វ៉ាក់សាំងលើប្រជាជនអាយុពី១៨ឆ្នាំឡើង មានចំនួន ១០៣,០៦% ធៀបជាមួយចំនួនប្រជាជនគោលដៅ ១០លាននាក់, កុមារ-យុវវ័យ អាយុពី១២ឆ្នាំ ទៅក្រោម១៨ឆ្នាំ មានចំនួន ១០០,៥០% ធៀបជាមួយចំនួនប្រជាជនគោលដៅ ១ ៨២៧ ៣៤៨នាក់, កុមារអាយុពី០៦ឆ្នាំ ដល់ក្រោម១២ឆ្នាំ មានចំនួន ១០៨,៧៨% ធៀបជាមួយនឹងប្រជាជនគោលដៅ ១ ៨៩៧ ៣៨២នាក់, កុមារអាយុ០៥ឆ្នាំ មានចំនួន ១៣០,៧៤% ធៀបជាមួយនឹងប្រជាជនគោលដៅ ៣០៤ ៣១៧នាក់, កុមារអាយុ០៣ឆ្នាំ ដល់ក្រោម០៥ឆ្នាំ មានចំនួន ៦៣,០៩% ធៀបជាមួយនឹងប្រជាជនគោលដៅ ៦១០ ៧៣០នាក់៕
